ଯବାନଙ୍କୁ ଚକମା ଦେଇ ଖସିଗଲେ ମହିଳା ମାଓବାଦୀ

ଭୁବନେଶ୍ୱର(ଓଡ଼ିଶା ରିପୋର୍ଟର): ମାଓନେତ୍ରୀ ଅରୁଣାଙ୍କ ନେତୃତ୍ୱରେ ବଡ଼ଧରଣର ଆକ୍ରମଣ ଯୋଜନା ଚାଲିଥିଲା। ମାତ୍ର କୋରାପୁଟ ପୋଲିସ୍ ଏହାକୁ ପଣ୍ଡ କରିଦେଇଛି। ଡୋକରୀଘାଟି ଏନ୍‌କାଉଣ୍ଟରରେ ୪ ଜଣ ମାଓବାଦୀଙ୍କ ମୃତ୍ୟୁ ଘଟିଥିବା ବେଳେ ବହୁ ମାରଣାସ୍ତ୍ର ଜବତ କରିଛି। ଏମାନଙ୍କ ଭିତରୁ ୩ ଜଣଙ୍କର ପରିଚୟ ମିଳିଛି। ହେଲେ ଘଟଣାସ୍ଥଳରୁ ଖସିଯାଇଥିଲେ ମାଓନେତ୍ରୀ ଅରୁଣା। ଖସିଯାଇଥିବା ମାଓବାଦୀଙ୍କୁ ଧରିବା ପାଇଁ ଏବେ ବି କମ୍ବିଂ ଜାରି ରହିଛି।

ଆନ୍ଧ୍ର ଓଡ଼ିଶା ସ୍ପେଶାଲ୍ ଜୋନାଲ୍ କମିଟିର ଡିଭିଜିନାଲ୍ ହେଡ୍ ଅରୁଣା ନେତୃତ୍ୱରେ ଡୋକରୀଘାଟି ଅଞ୍ଚଳରେ କ୍ୟାମ୍ପ କରିଥିଲେ। ୧୫ରୁ ଅଧିକ ମାଓବାଦୀ ଏଥିରେ ସାମିଲ ଥିଲେ। ଗୁଇନ୍ଦା ସୂଚନାକୁ ଆଧାର କରି କୋରାପୁଟ୍‌ ଡିଭିଏଫ୍‌ ଓ ଏସ୍ଓଜି ଯବାନମାନେ ମିଳିତ ଭାବେ ଅପରେସନ କରିଥିଲେ। ଯବାନଙ୍କୁ ଦେଖି ମାଓବାଦୀମାନେ ଗୁଳି ଚାଳନା କରିଥିଲେ। ପାଖାପାଖି ୧ ଘଣ୍ଟା ଧରି ଚାଲିଲା ଗୁଳି ବିନିମୟ। ଟଳି ପଡ଼ିଥିଲେ ୪ ମାଓବାଦୀ। ସୁରକ୍ଷାକର୍ମୀଙ୍କୁ ଚକମା ଦେଇ ଖସି ଯାଇଥିଲେ ଅରୁଣା। ପୋଲିସ ଘଟଣାସ୍ଥଳରୁ ୪ଟି ଅତ୍ୟାଧୁନିକ ଏସ୍ଏଲ୍ଆର୍, ଗୋଟିଏ ଇନ୍‌ସାସ୍ ଓ ଗୋଟିଏ ଥ୍ରୀ ନଟ୍ ଥ୍ରୀ ରାଇଫଲ୍ ଜବତ କରିଛି। ମୃତ ମାଓବାଦୀଙ୍କ ମଧ୍ୟରୁ ଦୁଇଜଣ କ୍ୟାଡର ମାଓବାଦୀ ଥିଲେ। ସେମାନଙ୍କ ମଧ୍ୟରୁ ୩ ଜଣଙ୍କ ପରିଚୟ ମିଳିପାରିଛି। ସେମାନେ ହେଲେ ଉଙ୍ଗୀ ଓରଫ ଆରତୀ, ରବିତା ଓ କୁମାରୀ। ଛତିଶଗଡ଼ ଡିଭିଜନରେ କାମ କରୁଥିବା ଉଙ୍ଗୀ ନାଁରେ ୪ ଲକ୍ଷ ଟଙ୍କା ପୁରସ୍କାର ରାଶି ରହିଥିବା କୋରାପୁଟ ଏସ୍‌ପି କହିଛନ୍ତି। ଏବେ ମଧ୍ୟ ଉକ୍ତ ଜଙ୍ଗଲରେ କମ୍ୱିଂ ଅପରେସନ୍‌ ଚାଲିଛି।

Previous ArticleNext Article

Send this to a friend