ଆଜି ରାଜ୍ୟର ସମସ୍ତ ଘରୋଇ ହସ୍ପିଟାଲ ବନ୍ଦ

ଭୁବନେଶ୍ୱର(ଓଡ଼ିଶା ରିପୋର୍ଟର): ଆଜି ରାଜ୍ୟବ୍ୟାପୀ ବନ୍ଦ ରହିବ ଘରୋଇ ହସ୍ପିଟାଲ। ରାଜ୍ୟର ସବୁ ଘରୋଇ ହସ୍ପିଟାଲ, ପାଥୋଲ୍ୟାବ୍ ଓ ଡାଇଗ୍ନୋଷ୍ଟିକ ସେଣ୍ଟର ସକାଳ ୬ ଟାରୁ ଆସନ୍ତାକାଲି ସକାଳ ୬ଟା ପର୍ଯ୍ୟନ୍ତ ୨୪ ଘଣ୍ଟା ଧରି ବନ୍ଦ ରହିବ। କ୍ଲିନିକାଲ ଏଷ୍ଟାବ୍ଲିସମେଣ୍ଟ ଆକ୍ଟକୁ ବିରୋଧ କରି ଏହି ବନ୍ଦ ଡାକରା ଦିଆଯାଇଛି।

ଘରୋଇ ମେଡିକାଲର ଆଉଟ ଡୋର ବନ୍ଦ ରହିବ ଏବଂ ନୂଆ ରୋଗୀଙ୍କୁ ଆଡମିଶନ କରାଯିବନି। ହେଲେ ପୂର୍ବରୁ ଆଡମିଶନ ହୋଇଥିବା ରୋଗୀଙ୍କ ଚିକିତ୍ସାରେ ଜାରି ରହିବ। ଘରୋଇ ଚିକିତ୍ସା ସଂସ୍ଥାଗୁଡ଼ିକର ବନ୍ଦ ଡାକରା ନେଇ ସ୍ୱାସ୍ଥ୍ୟ ବିଭାଗ ପକ୍ଷରୁ ଆଗୁଆ ପଦକ୍ଷେପ ଗ୍ରହଣ କରାଯାଇଛି। ରୋଗୀମାନେ ଯେମିତି କୌଣସି ଅସୁବିଧାର ସମ୍ମୁଖୀନ ନ ହେବେ ସେ ଦିଗରେ ଦୃଷ୍ଟି ଦେବାକୁ ସବୁ ସରକାରୀ ମେଡିକାଲକୁ ନିର୍ଦ୍ଦେଶ ଦିଆଯାଇଛି।

ସେହିଭଳି କଟକ ଏସ୍‌ସିବି ମେଡିକାଲ କଲେଜ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଛି। ମେଡିକାଲର ସମସ୍ତ ଡାକ୍ତର ଓ କର୍ମଚାରୀଙ୍କ ଛୁଟି ବାତିଲ କରାଯାଇଛି। କାଜୁଆଲିଟି, ଟ୍ରମାକେୟାର ଏବଂ ସ୍ତ୍ରୀ ଓ ପ୍ରସୂତି ବିଭାଗ ପାଇଁ ଅଧିକ ସଂଖ୍ୟକ ପାରା ମେଡିକାଲ ଷ୍ଟାଫ୍ ଓ ଡାକ୍ତରଙ୍କୁ ନିୟୋଜିତ କରାଯାଇଛି।

ଏସ୍‌ସିବି ମେଡିକାଲ କଲେଜର ଜରୁରୀକାଳୀନ ଅଧିକାରୀ ଡାକ୍ତର ଭୁବନାନନ୍ଦ ମହାରଣା କହିଛନ୍ତି,“କାଜୁଆଲିଟି ଓ ଲେବର ରୁମ୍‌ରେ ଅଧିକ ରୋଗୀ ହେବାର ଆଶଙ୍କା ଥିବାରୁ ତାଙ୍କ ବିଭାଗର ସମସ୍ତ ଡାକ୍ତରଙ୍କୁ ଆଲର୍ଟ କରାଯାଇଛି। ଏସ୍‌ସିବିକୁ ଯେଉଁ ରୋଗୀ ଆସିବେ ତାଙ୍କର ଯେମିତି ଚିକିତ୍ସାରେ କିଛି ଅବହେଳା ନ ହୁଏ ସେଥିପ୍ରତି ଦୃଷ୍ଟି ଦିଆଯିବାକୁ ନିର୍ଦ୍ଦେଶ ଦିଆଯାଇଛି।”

Previous ArticleNext Article

Send this to a friend