ବର୍ଷେ ନୁହେଁ କି ଦୁଇ ବର୍ଷ ନୁହେଁ। ୧୫ ବର୍ଷ ଧରି ଚାଲିଥିବା ଏକ ବେଆଇନ କ୍ଲିନିକ୍ ଉପରେ ଆଜି ପ୍ରଶାସନ ପକ୍ଷରୁ କରାଯାଇଛି ଚଢ଼ାଉ। ତା’ସହିତ ଜଣେ ନକଲି ଡାକ୍ତରଙ୍କୁ କରାଯାଇଛି ଗିରଫ। ଘଟଣାଟି ବଲାଙ୍ଗିର ଜିଲ୍ଲା ସଇଁତଳା ଥାନା ଟିକ୍ରାପଡ଼ାର। ଗିରଫ ନକଲି ଡାକ୍ତରଙ୍କ ନାଁ ବିଦ୍ୟୁତ୍ କୁମାର ବିଶ୍ୱାସ। ତାଙ୍କୁ କୋର୍ଟ ଚାଲାଣ କରାଯାଇଛି।
ବିଦ୍ୟୁତ୍ କୁମାର ବିଶ୍ୱାସଙ୍କ ଘର ପଶ୍ଚିମବଙ୍ଗରେ। ସେ ମାତ୍ର ଯୁକ୍ତ ଦୁଇ ପର୍ଯ୍ୟନ୍ତ ପଢ଼ିଥିବା ଜଣାପଡ଼ିଛି। ଆବଶ୍ୟକ ଶିକ୍ଷାଗତ ଯୋଗ୍ୟତା ନଥାଇ କିମ୍ବା କୌଣସି ପ୍ରକାର ଲାଇସେନ୍ସ ନ ଥାଇ ୧୫ ବର୍ଷ ହେବ ବିଦ୍ୟୁତ୍ କୁମାର ବିଶ୍ୱାସ ଟିକ୍ରାପଡ଼ାରେ କ୍ଲିନିକ୍ ଖୋଲି ଲୋକଙ୍କୁ ଚିକିତ୍ସା କରୁଥିବା ନେଇ ଅଭିଯୋଗ ହୋଇଥିଲା। ଫଳରେ ଆଜି ସଇଁତଳା ପୁଲିସ ଓ ଡ୍ରଗ୍ସ ଇନ୍ସପେକ୍ଟର ମିଳିତ ଭାବେ ଉକ୍ତ କ୍ଲିନିକ୍ ଉପରେ ଚଢ଼ାଉ କରିଥିଲେ। ଚଢ଼ାଉ ବେଳେ ତାଙ୍କ କ୍ଲିନିକ୍ରୁ ବହୁ ଔଷଧ ଜବତ କରାଯାଇଥିଲା।