ଭଦ୍ରକରେ ୬ ବର୍ଷର ଶିଶୁକୁ ଅପହରଣ ଓ ହତ୍ୟା ଘଟଣା: ୩ ଅଭିଯୁକ୍ତ ନାବାଳକଙ୍କୁ ପଠାଗଲା ବାଳସୁଧାର ଗୃହ

ଭଦ୍ରକ: ଭଦ୍ରକ ପୁରୁଣାବଜାର ଅଞ୍ଚଳରେ ଜଣେ ୬ ବର୍ଷର ଶିଶୁକୁ ଅପହରଣ ଓ ହତ୍ୟା ଘଟଣାରେ ତିନି ନାବାଳକ ଅଭିଯୁକ୍ତଙ୍କୁ ବାଳସୁଧାର ଗୃହକୁ ପଠାଇ ଦିଆଯାଇଛି। ମୁଖ୍ୟ ଅଭିଯୁକ୍ତ ସେଖ୍ କାଦର୍ ଓ ତାର ଦୁଇ ସହଯୋଗୀଙ୍କୁ ଶୁକ୍ରବାର କୋର୍ଟରେ ହାଜର କରାଯାଇଥିଲା। ତେବେ ଅଭିଯୁକ୍ତଙ୍କ ଜାମିନ ଆବେଦନ ନାମଞ୍ଜୁର ହେବାପରେ ସେମାନଙ୍କୁ ଅନୁଗୋଳ ବାଳସୁଧାର ଗୃହକୁ ପଠାଇ ଦିଆଯାଇଛି।

ପୋଲିସ୍ ଉଚିତ୍ କାର୍ଯ୍ୟାନୁଷ୍ଠାନ ନେଇ ନ ଥିବା ଅଭିଯୋଗ କରି ଗତକାଲି ସନ୍ଧ୍ୟାରେ ଶତାଧିକ ଲୋକ ବଡବଜାର ଥାନା ଆଗରେ ଟାୟାର ଜାଳି ରାସ୍ତା ଅବରୋଧ କରିଥିଲେ। ଉତ୍ତେଜନାକୁ ଦୃଷ୍ଟିରେ ରଖି ଥାନା ପରିସରରେ ବ୍ୟାପକ ପୋଲିସ ମୁତୟନ କରାଯାଇଥିଲା। ଶିଶୁ ହତ୍ୟା ମାମଲାରେ ପୋଲିସ ଅଟକ ରଖିଥିବା ୬ ଅଭିଯୁକ୍ତଙ୍କ ମଧ୍ୟରୁ ୩ ଜଣଙ୍କୁ ଛାଡିଦେବାକୁ ନେଇ ତୀବ୍ର ପ୍ରତିବାଦ କରିଛନ୍ତି ଲୋକେ। ତା’ସହ ମୁଖ୍ୟ ଅଭିଯୁକ୍ତ କାଦିର ଘରୁ ମୃତଦେହ ଉଦ୍ଧାର ହୋଇଥିଲେ ମଧ୍ୟ ତା’ ବାପା ମାଆଙ୍କୁ ତଦନ୍ତ ପରିସରକୁ ନିଆଯାଇ ନ ଥିବାରୁ ମଧ୍ୟ ଉତ୍ତେଜନା ପ୍ରକାଶ ପାଇଥିଲା। ଉତ୍ତ୍ୟକ୍ତ ଲୋକେ ଗତକାଲି ରାତିରେ ଅଭିଯୁକ୍ତଙ୍କ ଘରେ ପଶି ଭଙ୍ଗାରୁଜା କରିଥିଲେ।