ଝାରସୁଗୁଡ଼ା: ଝାରସୁଗୁଡା ସହର ସ୍ଥିତ ଓଏମପି ଛକ ନିକଟରୁ ଯୁବତୀଙ୍କୁ ଅପହରଣ ଘଟଣାରେ ପୋଲିସ ୪ ଅଭିଯୁକ୍ତକୁ ଗିରଫ କରିଛି। ଆଜି ସମସ୍ତଙ୍କୁ କୋର୍ଟ ଚାଲାଣ କରାଯାଇଛି। ଅଭିଯୁକ୍ତମାନେ ହେଲେ ସମ୍ୱଲପୁରର ବାବୁଲାଲ୍ ପାତ୍ର, ନୃପଲାଲ କୈଲାସ, ଧିନୁ ଓରାମ ଓ ପ୍ରଦୀପ କିସାନ। ଅପହରଣରେ ବ୍ୟବହୃତ ବୋଲେରୋ ଗାଡ଼ିକୁ ପୋଲିସ ଜବତ କରିଛି ।
ବୁଧବାର ଝାରସୁଗୁଡ଼ା ଓଏମପି ଛକ ନିକଟରୁ ସାରସମାଲ ଅଞ୍ଚଳର ଜଣେ ଯୁବତୀଙ୍କୁ ଅପହରଣ କରାଯାଇଥିଲା। ଯୁବତୀ ଜଣକ ସ୍କୁଟିରେ ମନ୍ଦିର ଯିବାକୁ ଘରୁ ବାହାରିଥିଲେ ତେବେ ମନ୍ଦିର ନିକଟ ରାସ୍ତାରୁ ସେ ଅପହରଣ ହୋଇଥିଲେ। ଏନେଇ ତାଙ୍କ ବାପା ଝାରସୁଗୁଡା ଥାନାରେ ଲିଖିତ ଅଭିଯୋଗ କରିଥିଲେ । ଅଭିଯୋଗ ପାଇବା ପରେ ପୋଲିସ ମୋବାଇଲ ଟ୍ରାକିଂ କରି ଉକ୍ତ ବୋଲେରୋକୁ ରାଉରକେଲାର ବିଶ୍ରା ଅଞ୍ଚଳରୁ ଠାବ କରିଥିଲା। ଅପହୃତା ଯୁବତୀଙ୍କୁ ପୋଲିସ ଉଦ୍ଧାର କରିବା ସହ ଅଭିଯୁକ୍ତମାନଙ୍କୁ ଗିରଫ କରିଥିଲା।