ମୁମ୍ବାଇ: ସାରା ଭାରତରେ ଏବେ ଯେଉଁ ଗୋଟିଏ ଫିଲ୍ମକୁ ନେଇ ସବୁଠୁ ଅଧିକ ଚର୍ଚ୍ଚା। ସେ ଫିଲ୍ମଟି ହେଉଛି ଜେଜିଏଫ୍-ଟୁ। କନ୍ନଡ ସୁପରଷ୍ଟାର ୟସ୍ଙ୍କ ଏହି ଫିଲ୍ମ ହଜାରେ କୋଟି ବ୍ଲକ୍ ଆଡକୁ ଗତି କରୁଛି। ଏତେ ବଡ଼ ଷ୍ଟାରଙ୍କ ପିଲାଦିନ କାହାଣୀ ସମ୍ପର୍କରେ କିନ୍ତୁ ବହୁତ କମ୍ ଲୋକ ଜାଣିଥିବେ। ଆଜିକାଲିର ବଲିଉଡ୍ ଷ୍ଟାରଙ୍କ ଭଳି ୟଶ୍ ନଥିଲେ ଷ୍ଟାର କିଡ୍। ଷ୍ଟାରଡମ୍ ସହ ନଥିଲା କୌଣସି ସମ୍ପର୍କ। ୟଶ୍ ନାଁରେ ପରିଚିତ ଥିବା ଏହି ସୁପରଷ୍ଟାରଙ୍କ ପ୍ରକୃତ ନାଁ ହେଉଛି- ନବୀନ କୁମାର ଗୌଡ଼ା। ନବୀନଙ୍କ ବାପା- ଅର୍ଜୁନ୍ କୁମାର, ପେଶାରେ ଥିଲେ ଜଣେ ସରକାରୀ ବସ୍ ଡ୍ରାଇଭର।
ମା’ ପୁଷ୍ପଲତା ଥିଲେ ଜଣେ ହାଉସ୍ ୱାଇଫ୍। ମହିଶୂରରେ ପାଠ ପଢ଼ିବା ସମୟରେ ହିଁ ଅଭିନୟ ଆଡକୁ ଢ଼ଳିଥିଲେ ୟସ୍। କେଜିଏଫ୍ର ହିରୋ ଭଳି ଭିଲେନ୍ଙ୍କ କାହାଣୀ ବି ସେଭଳି ରୋଚକ। କାରଣ, କେଜିଏଫ୍ ଚାପ୍ଟର ୱାନ୍ରେ ଖଳନାୟକ ଭୂମିକାରେ ଅଭିନୟ କରିଥିବା ଗରୁଡ଼ା ଚରିତ୍ର ସମ୍ପର୍କରେ ଆପଣ ଜାଣିଥିବେ। ହେଲେ ବହୁତ କମ୍ ଲୋକ ଜାଣିଥିବେ ଯେ, ଗରୁଡ଼ା ଭୂମିକାରେ ଅଭିନୟ କରିଥିବା ରାମଚନ୍ଦ୍ର ରାଜୁ, ପେଶାରେ ୟଶ୍ଙ୍କ ବଡ଼ିଗାର୍ଡ ଥିଲେ। କେଜିଏଫ୍ କାହାଣୀ ଶୁଣାଇବାକୁ ୟଶ୍ଙ୍କ ଘରକୁ ଫିଲ୍ମର ନିର୍ଦ୍ଦେଶକ ତାଙ୍କ ଘରକୁ ଆସିଥିବା ସମୟରେ ରାମଚନ୍ଦ୍ର ରାଜୁଙ୍କୁ ଦେଖିଥିଲେ। ରାମଚନ୍ଦ୍ରଙ୍କୁ ଦେଖିବା ପରେ ନିର୍ଦ୍ଦେଶକ ପ୍ରଶ୍ନ କରିଥିଲେ ସିନେମାରେ ଅଭିନୟ କରିବେ କି ?
ସେ କିଛି ଉତ୍ତର ଦେଇନଥିଲେ। କାରଣ, ରାମଚନ୍ଦ୍ର ରାଜୁଙ୍କୁ ଅଭିନୟର ‘ଅ’ ବି ଜଣାନଥିଲା। ଫିଲ୍ମର ନିର୍ଦ୍ଦେଶକ କହିଥିଲେ- ଦାଢ଼ି ବଢ଼ାଇବା ଆରମ୍ଭ କର। ବେଶ କିଛି ଦିନ ଯାଏଁ କୌଣସି ଉତ୍ତର ନଆସିବାରୁ ନିରାଶ୍ ହୋଇଯାଇଥିଲେ ରାମଚନ୍ଦ୍ର ରାଜୁ। ହେଲେ ଅଚାନକ୍ ତାଙ୍କୁ ଅଡିସନ୍ ପାଇଁ ଡାକରା ଆସିଥିଲା। ଆଉ କେଜିଏଫ୍ ଫିଲ୍ମର ମୁଖ୍ୟ ଖଳନାୟକ ଭୂମିକାରେ ଅଭିନୟ କରିଥିଲେ। ଏବେ ରାମଚନ୍ଦ୍ର ରାଜୁଙ୍କ ହାତରେ ତାମିଲ୍, ତେଲୁଗୁ ଏବଂ କନ୍ନଡ ଭାଷାର ଏକାଧିକ ଫିଲ୍ମ। ବିନା କୌଣସି ଗଡ୍ ଫାଦରରେ ସଫଳତାର ଶୀର୍ଷରେ ପହଞ୍ଚିଥିବା ଏହି ସାଉଥ୍ କଳକାରଙ୍କୁ ନେଇ ଏବେ ସବୁଠୁ ଅଧିକ ଚର୍ଚ୍ଚା।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
