ମୁମ୍ବାଇ : ଜଣାଶୁଣା ଅଭିନେତା ଗୋବିନ୍ଦା ନିଜ ଭଣଜା କୃଷ୍ଣାଙ୍କ ଶୋ’କୁ ନ ଯାଇ “ଦ କପିଲ ଶର୍ମା ଶୋ”ରେ ସାମିଲ ହୋଇଥିଲେ। ‘ଚିଚି ମାମାଙ୍କ’ ଏହି ପଦକ୍ଷେପ ପାଇଁ ଭଣଜା କୃଷ୍ଣା ବହୁତ ଦୁଃଖିତ। ଅବଶ୍ୟ ଏଥିପାଇଁ କୃଷ୍ଣା ନିଜର ଏକ ପରିହାସକୁ ଦାୟୀ କରିଛନ୍ତି। କୁହାଯାଉଛି ଯେ ଗୋବିନ୍ଦା କୃଷ୍ଣାଙ୍କୁ ଉଚିତ୍ ଶିକ୍ଷା ଦେବା ପାଇଁ ଏଭଳି ପଦକ୍ଷେପ ନେଇଛନ୍ତି।
କୃଷ୍ଣା କିଛିଦିନ ତଳେ ମନ୍ତବ୍ୟ ଦେଇଥିଲେ ଯେ “ମୁଁ ଗୋବିନ୍ଦାଙ୍କୁ ମାମା ରଖିଛି”। ଏହି କଥା ପାଇଁ ଗୋବିନ୍ଦା ତାଙ୍କ ଉପରେ ରାଗିଛନ୍ତି। ଗଣମାଧ୍ୟମ ସୂଚନା ଅନୁଯାୟୀ କୃଷ୍ଣାଙ୍କ କହିବା କଥା ହେଉଛି,“ମୁଁ ମାମୁଙ୍କୁ ନିଜ ଶୋ’ରେ ଆସିବା ପାଇଁ କହିବାରୁ ସେ ସମୟ ନାହିଁ କହି ମନା କରିଦେଇଥିଲେ। ଚାରି ଦିନ ପୂର୍ବରୁ ତାଙ୍କୁ ପୁଣି ମେସେଜ କରିବା ପରେ ମୁଁ ଜାଣିଲି ଯେ ସେ ମାଇଁଙ୍କ ସହ କପିଲଙ୍କ ଶୋ’ର ସୁଟିଂ କରୁଛନ୍ତି।”
କୃଷ୍ଣା କହିଛନ୍ତି, “ଏହା ଜାଣିଲା ପରେ ମୋତେ ଧକ୍କା ଲାଗିଥିଲା। ମୋର ଆଶା ଥିଲା ଯେ ସେ ନିଜ ଭଣଜାକୁ ସହଯୋଗ କରିବେ। କିନ୍ତୁ ଲାଗୁଛି ମୋର ଏହି ମନ୍ତବ୍ୟ ପାଇଁ ସେ ରାଗିଛନ୍ତି। ମୁଁ ତାଙ୍କୁ ବୁଝାଇବାକୁ ଚେଷ୍ଟା କରି ଏପରି ମନ୍ତବ୍ୟ ମୁଁ ଥଟ୍ଟାରେ କହି ଦେଇଥିଲି ବୋଲି କହିଥିଲି। ଏହାର ଉଦ୍ଦେଶ୍ୟ ତାଙ୍କ ସମ୍ମାନକୁ ଆଘାତ ଦେବା ନ ଥିଲା। ମୁଁ ତାଙ୍କୁ ମାମା ଡାକିଲେ ମୋର ଷ୍ଟାଟସ ବଢିଯାଏ। ଜଣେ କଳାକାର କେଉଁଠାକୁ ଯିବେ ତାହା ତାଙ୍କର ନିଜ ନିଷ୍ପତ୍ତି ହୋଇପାରେ, କିନ୍ତୁ ପାରିବାରିକ ସଦସ୍ୟ ହୋଇଥିବାରୁ ମୋର ଆଶା ଥିଲା ସେ ପ୍ରଥମେ ମୋ ଶୋ’କୁ ଆସିବେ।”
ଯଦି ଗୋବିନ୍ଦାଙ୍କ କଥା ବିଶ୍ୱାସ କରାଯାଏ ତେବେ କୃଷ୍ଣା ଟିଭିରେ ଅନ୍ୟ ଲୋକଙ୍କୁ ଅପମାନ କରି ପଇସା କମାଉଛନ୍ତି। ସେ କହିଛନ୍ତି,“ମୁଁ କୃଷ୍ଣାର ମନ୍ତବ୍ୟ ଉପରେ ବହୁତ ରାଗିଛି। ମୁଁ ତାକୁ କହିଥିଲି, ଥଟ୍ଟାରେ ଦିଆଯାଇଥିବା ଏଭଳି ବୟାନ ଅପମାନଜନଙ୍କ ହୋଇପାରେ। ସେଥିପାଇଁ ସେ ଏଭଳି ଥଟ୍ଟାରୁ ବିରତ ରହିବା ଉଚିତ୍।”