ମୁମ୍ବାଇ: ତାଙ୍କର କଣ୍ଠରେ ରହିଛି ନିଆରା ଯାଦୁ। ତାଙ୍କ ଗାଇବା ଶୈଳୀରେ ରହିଛି ଏକ ଭିନ୍ନ ଆକର୍ଷଣ। ତାଙ୍କୁ ଯିଏ ବି ଶୁଣିଛି, ଆଶ୍ଚର୍ଯ୍ୟ ହୋଇଛି। ଏଥିରୁ ବଲିଉଡ୍ର ବଡ଼ ବଡ଼ ଗାୟକ ଓ ସଙ୍ଗୀତ ନିର୍ଦ୍ଦେଶକ ବି ବାଦ୍ ପଡ଼ି ନାହାନ୍ତି। ଆଉ ଶେଷରେ ସମସ୍ତଙ୍କ ମନ ଜିଣି ‘ଇଣ୍ଡିଆନ୍ ଆଇଡଲ୍ ସିଜିନ୍-୧୦’ରେ ବାଜି ମାରି ନେଇଛନ୍ତି ଏହି ଯୁବ ଗାୟକ- ସଲ୍ମାନ୍ ଅଲ୍ଲୀ।
ଗତକାଲି ଅନୁଷ୍ଠିତ ଗ୍ରାଣ୍ଡ୍ ଫିନାଲେରେ ସଲମାନଙ୍କୁ ବିଜୟୀ ଘୋଷଣା କରାଯିବ ସହିତ ପୁରସ୍କାର ପ୍ରଦାନ କରାଯାଇଥିଲା। ଏଥିରେ ‘ଜିରୋ’ ଫିଲ୍ମରେ ଅଭିନୟ କରିଥିବା ଶାହାରୁଖ୍ ଖାନ୍, କଟ୍ରିନା କୈଫ୍ ଓ ଅନୁଷ୍କା ଶର୍ମା ଯୋଗ ଦେଇଥିଲେ। ଏହି ଅବସରରେ ସେମାନେ ’ଜିରୋ’ର ପ୍ରମୋସନ୍ କରିଥିଲେ।
ଗତ ଜୁଲାଇ ୨୯ରୁ ‘ଇଣ୍ଡିଆନ୍ ଆଇଡଲ୍ ସିଜିନ୍ -୧୦’ ଆରମ୍ଭ ହୋଇଥିଲା। ଏଥିରେ ପ୍ରଥମେ ଅନୁ ମଲିକ, ଭିଶାଲ୍ ଦଦ୍ଲାନି ଓ ନେହା କକ୍କର ବିଚାରକ ଥିଲେ। ‘ମି ଠୁ’ ଅଭିଯୋଗ ଆସିବା ପରେ ଅନୁ ମଲିକ ନିଜେ ଶୋ’ ଛାଡ଼ି ଦେଇଥିଲେ। ତାଙ୍କ ସ୍ଥାନ ନେଇଥିଲେ ଜାଭେଦ୍ ଅଲ୍ଲୀ। ଏହି ଶୋ’ରେ ମନୀଷ ପଲ୍ ଉପସ୍ଥାପକ ଥିଲେ।