ଭୁବନେଶ୍ୱର(ଓଡ଼ିଶା ରିପୋର୍ଟର୍): ଘରେ ପିଲାମାନଙ୍କ ପାଇଁ ନିୟମିତ ଭିନ୍ନ ଭିନ୍ନ ସ୍ୱାଦର ଜଳଖିଆ ବା ଖାଦ୍ୟ ସାମଗ୍ରୀ ପ୍ରସ୍ତୁତ କରିବା ଅନେକଙ୍କ ପାଇଁ ବେଳେବେଳେ ଚିନ୍ତା ସୃଷ୍ଚି କରିଥାଏ। ଯଦି ଆପଣ ଏମିତି ଚିନ୍ତାରେ ପଡ଼ିଛନ୍ତି, ତେବେ ଆଜି ଆମେ ଆପଣଙ୍କୁ ଏକ ସହଜ ଓ ସୁଆଦିଆ ଖାଦ୍ୟ ସାମଗ୍ରୀ 'ମଟର ଛୁଇଁ ପରଟା'ର ପ୍ରସ୍ତୁତି ସମ୍ପର୍କରେ ଟିପ୍ସ୍ ଦେବୁ।
ଆବଶ୍ୟକ ସାମଗ୍ରୀ: ଅଟା, ସିଝା ମଟର ଛୁଇଁ ଦାନା, ଅଦା, କଞ୍ଚା ଲଙ୍କା, ଲଙ୍କା ଗୁଣ୍ଡ, ଧନିଆ ଗୁଣ୍ଡ, କଟା ଧନିଆ ପତ୍ର, ଗରମ ମସଲା, ଲୁଣ ଓ ତେଲ।
ପ୍ରସ୍ତୁତି ପ୍ରଣାଳୀ: ପ୍ରଥମେ ଏକ ପାତ୍ରରେ ଅଟା ନେଇ ସେଥିରେ ଆବଶ୍ୟକ ଅନୁସାରେ ଲୁଣ, ଅଳ୍ପ ତେଲ ଓ ପାଣି ଦେଇ ନରମ ଭାବେ ଚକଟନ୍ତୁ। ଏବେ ସିଝା ହୋଇଥିବା ମଟର ଛୁଇଁ ଦାନାରେ କଞ୍ଚା ଲଙ୍କା ଏବଂ ଅଦା ପକାଇ ଗ୍ରାଇଣ୍ଡିଂ କରନ୍ତୁ। ଗ୍ରାଇଣ୍ଡିଂ ପରେ ଏହାକୁ ଏକ ପାତ୍ରକୁ କାଢ଼ି ଏଥିରେ ଲୁଣ, ଲଙ୍କା ଗୁଣ୍ଡ, ଧନିଆ ଗୁଣ୍ଡ, ଗରମ ମସଲା ଓ କଟା ଧନିଆ ପତ୍ର ମିଶାଇ ଦିଅନ୍ତୁ।
ଏବେ ଚକଟା ହୋଇ ରହିଥିବା ଅଟାରୁ ପରଟା ପାଇଁ ଗୋଳା ପ୍ରସ୍ତୁତ କରନ୍ତୁ। ପ୍ରତିଟି ଅଟା ଗୋଳା’କୁ ଅଳ୍ପ ବେଲି ସେଥିରେ ପୂର୍ବରୁ ପ୍ରସ୍ତୁତ ହୋଇଥିବା ମଟର ଛୁଇଁ ପୂର ଦେଇ ଗୋଲ ଗୋଲ କରିବା ପରେ ପୁଣି ବେଲନ୍ତୁ।ଏବେ ତାୱା ଗରମ କରି ବେଲା ହୋଇଥିବା ପରଟାକୁ ସେକନ୍ତୁ। ପରଟାର ଦୁଇ ପଟ ଭଲ ଭାବେ ସେକି ହୋଇଯିବା ପରେ ଏହା ଉପରେ ତେଲ କିମ୍ବା ଘିଅ ଦେଇ ଆହୁରି ସେକନ୍ତୁ। ଦୁଇପଟ ଗୋଲ୍ଡେନ୍ ବ୍ରାଉନ୍ ରଙ୍ଗର ହୋଇଗଲେ, ପରଟା କାଢ଼ି ଦିଅନ୍ତୁ। ଏବେ ପ୍ରସ୍ତୁତ ହୋଇଗଲା ସ୍ୱାଦିଷ୍ଟ 'ମଟର ଛୁଇଁ ପରଟା'। ଏହାକୁ ଆଚାର, ସସ୍ କିମ୍ବା ଦହି ସହ ଖାଆନ୍ତୁ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
