୫ବର୍ଷ ପରେ ସରକାର ଚେତିଲେ, ରାଜ୍ୟରେ ନିଷିଦ୍ଧ ହେଲା ହର୍ବିସାଇଡ୍ ପାରାକ୍ୱେଟ୍

ଶେଷରେ ରାଜ୍ୟ ସରକାରଙ୍କ ଚେତା ପଶିଛି । ବିଷାକ୍ତ ହର୍ବିସାଇଡ୍ ପାରାକ୍ୱେଟ୍ ବିକ୍ରି, ମହଜୁଦ୍‌, ବିତରଣ, ଉତ୍ପାଦନ ଓ ବ୍ୟବହାର ଉପରେ କଟକଣା ଜାରି କରିଛନ୍ତି । ପ୍ରାଥମିକ ଭାବେ ଏହି କଟକଣା ମାତ୍ର ଦୁଇମାସ ପାଇଁ ବଳବତ୍ତର ରହିବ ଓ ପରେ ଗବେଷଣା ପ୍ରତିଷ୍ଠାନ ଓ ଅନ୍ୟ ଅଂଶୀଦାରଙ୍କଠୁ ବିଜ୍ଞାନସମ୍ମତ ମତାମତ ପାଇବା ପରେ ଏହି ରସାୟନ ପଦାର୍ଥ ଉପରେ ସ୍ଥାୟୀ ନିଷେଧାଦେଶ ପାଇଁ ଭାରତ ସରକାରଙ୍କୁ ପ୍ରସ୍ତାବ ଦେବେ ବୋଲି ଜଣାପଡ଼ିଛି । ଏହି ବିଷାକ୍ତ ରସାୟନ ପଦାର୍ଥ ଉପରେ କଟକଣା ଜାରି ପାଇଁ ରାଜ୍ୟର ଡାକ୍ତରମାନେ ଦୀର୍ଘ ୫ବର୍ଷ ଧରି ସରକାରଙ୍କୁ ପରାମର୍ଶ ଦେଇ ଆସୁଥିଲେ । ଏପରିକି ଏହା ଉପରେ କଟକଣା ନିମନ୍ତେ ସମ୍ବଲପୁର ଜିଲ୍ଲାର ଡାକ୍ତରମାନେ ୨୦୧୯ ସେପ୍ଟେମ୍ବର ମାସରେ ଦୁଇଦିନିଆ ଆମରଣ ଅନଶନ ମଧ୍ୟ କରିଥିଲେ ।

ଆଜି ରାଜ୍ୟ କୃଷି ଓ କୃଷକ ସଶକ୍ତିକରଣ ବିଭାଗ ପକ୍ଷରୁ ଜାରି ବିଜ୍ଞପ୍ତି ଅନୁସାରେ ବିଷାକ୍ତ ହର୍ବିସାଇଡ୍ ପାରାକ୍ୱେଟର ବିକ୍ରି,ଉତ୍ପାଦନ, ବିତରଣ ଓ ମହଜୁଦଠୁ ଆରମ୍ଭ କରି ବ୍ୟବହାରକୁ ସମଗ୍ର ରାଜ୍ୟରେ ନିଷିଦ୍ଧ କରାଯାଇଛି । କୀଟନାଶକ ଅଧିନିୟମ-୧୯୬୮ ଅନୁସାରେ ଏହି ନିଷୋଧାଦେଶ ପ୍ରାଥମିକ ଭାବେ ଦୁଇମାସ ପାଇଁ ବଳବତ୍ତର ରହିବ । ଗବେଷଣା ପ୍ରତିଷ୍ଠାନ ଓ ଅନ୍ୟ ଷ୍ଟେକହୋଲଡରଙ୍କଠୁ ବିଜ୍ଞାନସମ୍ମତ ମତାମତ ପାଇବା ପରେ ରାଜ୍ୟ ସରକାର ଏହା ଉପରେ ସ୍ଥାୟୀ ନିଷେଧାଦେଶ ଜାରି ପାଇଁ ଭାରତ ସରକାରଙ୍କୁ ପ୍ରସ୍ତାବ ଦେବେ । ‘ମୋ ସରକାର’ ଉପକ୍ରମ ଅଧୀନରେ ହିତାଧିକାରୀଙ୍କଠୁ ମିଳିଥିବା ମତାମତ ଆଧାରରେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ଏହି ବିଷାକ୍ତ ରସାୟନ ବ୍ୟବହାର କରି ଯେପରି କୌଣସି ମଣିଷଙ୍କ ଜୀବନ ନଯାଏ ସେଥିପାଇଁ ପାରାକ୍ୱେଟ୍ ନିଷିଦ୍ଧ କରିବା ବିଷୟରେ ଯାଂଚ ନିମନ୍ତେ କୃଷି ଓ କୃଷକ ସଶକ୍ତିକରଣ ବିଭାଗକୁ ପରାମର୍ଶ ଦେଇଥିଲେ । ସାର୍ବଜନୀନ ନିରାପତ୍ତାକୁ ଦୃଷ୍ଟିରେ ରଖି ମଣିଷ ଓ ପ୍ରାଣ ଉପରେ ଏହାର ରସାୟନିକ କୁପ୍ରଭାବକୁ ରୋକିବା ପାଇଁ ପାରାକ୍ୱେଟକୁ ନିଷିଦ୍ଧ କରାଯାଇଛି ।

ଅନ୍ୟ ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ଅନୁସାରେ ଅଧିକୃତ ବିକ୍ରେତାଙ୍କ ଦ୍ୱାରା କୀଟନାଶକ ଓ କୃଷି ରସାୟନିକ ଦ୍ରବ୍ୟର ବିକ୍ରି ନିମନ୍ତେ ରାଜ୍ୟ ସରକାର ଏବେ କୃଷି ବିଭାଗର ଅଧିକୃତ ଅଧିକାରୀ, ସମ୍ପୃକ୍ତ ସରକାରୀ ବିଭାଗ, ଓୟୁଏଟିର ବୈଜ୍ଞାନିକମାନଙ୍କ ପ୍ରେସକ୍ରିପସନକୁ ବାଧ୍ୟତାମୂଳକ କରିଛନ୍ତି । ଏନେଇ ଖୁବଶୀଘ୍ର କୃଷି ବିଭାଗ ପକ୍ଷରୁ ଗାଇଡଲାଇନ୍ ଜାରି କରାଯିବ ।

ସୂଚନାଯୋଗ୍ୟ, ସମ୍ବଲପୁର ଜିଲ୍ଲା ବୁର୍ଲା ସରକାରୀ ମେଡିକାଲ କଲେଜର ଡାକ୍ତରମାନେ ଏହି ହର୍ବିସାଇଡ୍ ପାରାକ୍ୱେଟକୁ ରାଜ୍ୟରେ ସମ୍ପୂର୍ଣ୍ଣ ନିଷିଦ୍ଧ କରିବା ପାଇଁ ୨୦୧୮ ମସିହାରେ ରାଜ୍ୟ ସ୍ୱାସ୍ଥ୍ୟ ସଚିବଙ୍କୁ ଚିଠି ଲେଖି ପରାମର୍ଶ ଦେଇଥିଲେ । ଏହାସହିତ ବିଭାଗୀୟ ମନ୍ତ୍ରୀଙ୍କୁ ମଧ୍ୟ ଦାବିପତ୍ର ଦେଇଥିଲେ । କିନ୍ତୁ ସରକାର ଏଥିପ୍ରତି ଦୃଷ୍ଟି ନଦେବାରୁ ୨୦୧୯ ସେପ୍ଟେମ୍ବର ୧୫ତାରିଖରେ ଦୁଇଦିନିଆ ଆମରଣ ଅନଶନରେ ବସିଥିଲେ । ସେତେବେଳେ ଏହି ଡାକ୍ତରମାନେ ପାରାକ୍ୱେଟ୍ ଯୋଗୁ ମାତ୍ର ଦୁଇବର୍ଷ ମଧ୍ୟରେ ପ୍ରାୟ ୧୭୪ଜଣଙ୍କ ଜୀବନ ଯାଇଥିବା ନେଇ ଅଭିଯୋଗ କରିଥିଲେ । ଏହି ବିଷାକ୍ତ ରସାୟନ ପ୍ରଭାବରେ ମଣିଷର କିଡନୀ, ଲିଭର ଓ ଫୁସଫୁସ୍ ସମସ୍ୟା ଦେଖା ଦେଇଥାଏ । ଏହି ରସାୟନର କୌଣସି ଆଣ୍ଟିଡୋଟ୍ ନଥିବାରୁ ପାରାକ୍ୱେଟ୍ ସଂସ୍ପର୍ଶରେ ଆସିଥିବା ରୋଗୀଙ୍କ ଶରୀରରେ ବିଭିନ୍ନ ପ୍ରକାରର ସମସ୍ୟା ଦେଖାଦେଇଥାଏ ଓ ସେମାନଙ୍କ ଜୀବନ ଚାଲିଯାଇଥାଏ ବୋଲି ଡାକ୍ତରମାନେ କହିଥିଲେ । ସମ୍ବଲପୁର ସହରର ପ୍ରସିଦ୍ଧ ଡାକ୍ତର ଶଙ୍କର ରାମଚନ୍ଦାନୀ ଏହି ପାରାକ୍ୱେଟ ଉପରେ ନିଷେଧାଦେଶ ନିମନ୍ତେ ଚାଲିଥିବା ଅଭିଯାନର ନେତୃତ୍ୱ ନେଉଥିଲେ ।