ବେଙ୍ଗାଲୁରୁ: ବାୟୁ ସେନା ପକ୍ଷରୁ ଚାଲିଥିବା ଏରୋ ଇଣ୍ଡିଆ ଶୋ’ରେ ପୁଣିଥରେ ଅଘଟଣ ଘଟିଛି। କିଛିଦିନ ପୂର୍ବରେ ଏରୋ ଇଣ୍ଡିଆ ଶୋ’ ପାଇଁ ଅଭ୍ୟାସ୍ ଚାଲିଥିବା ବେଳେ ମଝି ଆକାଶରେ ଦୁଇଟି ବିମାନ ପରସ୍ପରକୁ ଧକ୍କା ଦେଇଥିଲେ।
ଆଜି ପୁଣିଥରେ ଏରୋ ଇଣ୍ଡିଆ ଶୋ ଚାଲିଥିବା ବେଳେ ଭୟଙ୍କର ଅଗ୍ନିକାଣ୍ଡ ଘଟିଛି। ୟେଲହଙ୍କ ଏୟାର ଫୋର୍ସର ୫ ନଂ ଗେଟ୍ ନିକଟରେ ଥିବା ପାର୍କିଂରେ ଅଗ୍ନିକାଣ୍ଡ ଘଟିଛି। ଅଗ୍ନିକାଣ୍ଡ ଯୋଗୁ ଏଠାରେ ଥିବା ୩୦୦ଟି କାର ପୋଡ଼ି ଜଳି ପାଉଁଶ ହୋଇଯାଇଛି। ଲୋକମାନେ ଏଠାରେ କାର ଥୋଇ ଏରୋ ଇଣ୍ଡିଆ ଶୋ’ ଦେଖୁଥିବା ବେଳେ ଏଭଳି ଅଗ୍ନିକାଣ୍ଡ ଘଟିଛି।
ଏରୋ ଇଣ୍ଡିଆ ଶୋ’ରେ ଭାଗ ନେଇଥିବା ବିମାନ ଗୁଡ଼ିକ ଆଜି ସକାଳେ ସମରକଳା ପ୍ରଦର୍ଶନ କରୁଥିବା ବେଳେ ମଧ୍ୟାହ୍ନ ପ୍ରାୟ ୧୨.୧୭ରେ ଏଭଳି ଅଗ୍ନିକାଣ୍ଡ ଘଟିଥିବା କର୍ଣ୍ଣାଟକା ପୁଲିସ୍ ପକ୍ଷରୁ ସୂଚନା ଦିଆଯାଇଛି। ଅଗ୍ନିକାଣ୍ଡ ପରେ ଦମକଳ ବାହିନୀ ଘଟଣା ସ୍ଥଳରେ ପହଞ୍ଚି ନିଆକୁ ଆୟତ୍ତ କରିଥିଲା। ଏଥିରେ କେହି ମୃତାହତ ହୋଇଥିବା ସୂଚନା ଏଯାଏ ମିଳିନାହିଁ।
ଆଜି ଏରୋ ଇଣ୍ଡିଆ ଶୋ’ରେ ବ୍ୟାଡମିଣ୍ଟନ୍ ତାରକା ପିଭି ସିନ୍ଧୁ ଭାଗ ନେଇଥିଲେ। ସେ ତେଜସ୍ ବିମାନ ଉଡ଼ାଇବା ପରେ ହିଁ ଏଭଳି ଘଟଣା ଘଟିଥିଲା। ଏହି ଅଗ୍ନିକାଣ୍ଡ ପରେ ଶୋ’କୁ ସାମୟିକ ଭାବେ ସ୍ଥଗିତ ରଖାଯାଇଛି। ଅଗ୍ନିକାଣ୍ଡର କାରଣ ଏଯାଏ ଜଣାପଡ଼ି ନାହିଁ।
ତେବେ ପ୍ରାଥମିକ ତଦନ୍ତରୁ ସିଗାରେଟ୍ ନିଆଁରୁ ଏଭଳି ଅଗ୍ନିକାଣ୍ଡ ଘଟିଥିବା କୁହାଯାଉଛି। ଜଣେ କେହି ଶୁଖିଲା ଘାସରେ ସିଗାରେଟ୍ ଟାଣି ପକାଇ ଦେବା ପରେ ଏଥିରୁ ଅଗ୍ନି ସଂଯୋଗ ଘଟି ପ୍ରଥମେ ଗୋଟିଏ କାରରେ ଲାଗିଥିଲେ। ଏହାପରେ ଧିରେଧିରେ ଏହା ସମଗ୍ର ଅଞ୍ଚଳକୁ ବ୍ୟାପୀ ଯାଇଥିଲା।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
