ଆଗ୍ରା: ପ୍ରେମ ସମ୍ପର୍କକୁ ନେଇ ଆପଣମାନେ ରିଲରେ ଅନେକ କାହାଣୀ ଦେଖିଥିବେ। ଅନେକ ସମୟରେ ରିଲରେ ଦେଖାଯାଉଥିବା ଫିଲ୍ମ ଅତିରଞ୍ଜିତ ବୋଲି କୁହାଯାଏ ବା ଅଜବ ଗଜବ। ହେଲେ ରିଅଲ୍ ଲାଇଫରେ କିନ୍ତୁ ଏବେ କିଛି ଘଟଣା ନିକଟରେ ଦେଖିବାକୁ ମିଳିଛି ଯାହାକି ଗପ ଲାଗୁଥିଲେ ବି ସତ।
ନିକଟରେ ଗୁଜରାଟ ସୁରଟରେ ପୁଅର ବାହାଘର ପୂର୍ବରୁ କନ୍ୟାର ମା’କୁ ନେଇ ଫେରାର ହୋଇଯାଇଥିଲେ ଜଣେ ବାପା। ଏବେ କିନ୍ତୁ ଜଣେ ୨୨ ବର୍ଷୀୟ ଯୁବକ ୬୦ ବର୍ଷୀୟ ମହିଳାଙ୍କ ପ୍ରେମରେ ପଡ଼ିଥିବା ଦେଖିବାକୁ ମିଳିଛି। ଉତ୍ତର ପ୍ରଦେଶରେ ଶାହାଜାନ ତାଙ୍କ ସ୍ତ୍ରୀ ମମତାଜଙ୍କ ପ୍ରେମର ନିଦର୍ଶନ ଦେବାକୁ ଯାଇ ତାଜମହଲ ତିଆରି କରିଥିଲେ। ଏବେ ସେହି ତାଜମହଲରେ ନିଜର ପ୍ରେମକୁ ଜାହିର କରିବା ପାଇଁ ଏହି ୬୦ ବର୍ଷୀୟ ମହିଳା ଏବଂ ୨୨ ବର୍ଷୀୟ ଯୁବକ ପ୍ରେମ କରୁଥିବା ଦେଖିବାକୁ ମିଳିଛି।
ମହିଳାଙ୍କ ଏଭଳି ପ୍ରମେକୁ ନେଇ ତାଙ୍କ ପୁଅ ଓ ସ୍ୱାମୀ ଆପତ୍ତି ଉଠାଇଥିଲେ। ଏହାପରେ ଥାନାରେ ମାମଲା ପହଞ୍ଚିଥିଲା। ଥାନାରେ ଯୁବକ ଏବଂ ତାଙ୍କ ୬୦ ବର୍ଷୀୟ ପ୍ରେମିକା ମଧ୍ୟ ପହଞ୍ଚି ନିଜର ଯୁକ୍ତି ରଖିଥିଲେ। ଉଭୟ ପରସ୍ପରକୁ ଭଲ ପାଉଛନ୍ତି। ଏଥିପାଇଁ ବିବାହ କରିବାକୁ ଚାହୁଁଛନ୍ତି ବୋଲି କହିଛନ୍ତି।
ସୂଚନାଯୋଗ୍ୟ, ସଂପୃକ୍ତ ମହିଳା ଜଣଙ୍କର ୭ଟି ଛୁଆ ରହିଛି। ଏହାବାଦ ସେ ଜଣେ ଜେଜେ ମା’। ଆଗ୍ରାର ପ୍ରକାଶ ନଗରରେ ସେ ରୁହନ୍ତି। ଆଗ୍ରାରେ ଶାନ୍ତି ଭଙ୍ଗ କରିବା ଅଭିଯୋଗରେ ପୁଲିସ ଏବେ ସଂପୃକ୍ତ ଯୁବକ ବିରୋଧରେ ମାମଲା ଗ୍ରହଣ କରିଛି।