ନୂଆଦିଲ୍ଲୀ: ଜମ୍ମୁ-କଶ୍ମୀରରୁ ଧାରା ୩୭୦ ଉଚ୍ଛେଦକୁ ନେଇ ଚାଲିଥିବା ବିବାଦ ମଧ୍ୟରେ ଆଜି ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହ ବଡ଼ ବୟାନ ଦେଇଛନ୍ତି। ସହିଦ ଯବାନଙ୍କୁ ଶ୍ରଦ୍ଧାଞ୍ଜଳି ଜଣାଇବା ନିମନ୍ତେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜମ୍ମୁ-କଶ୍ମୀରରୁ ଧାରା ୩୭୦ ଉଚ୍ଛେଦ କରିଥିବା ଶାହ କହିଛନ୍ତି।
ଅହମଦାବାଦରେ ଆରଏଏଫର ଏକ କାର୍ଯ୍ୟକ୍ରମରେ ଯୋଗଦେଇ ଶାହ କହିଛନ୍ତି, “ଆମ ଦେଶର ସୁରକ୍ଷା ପାଇଁ ସହିଦ ହୋଇଥିବା ଯବାନଙ୍କୁ ଶ୍ରଦ୍ଧାଞ୍ଜଳି ଜଣାଇବା ପାଇଁ ପ୍ରଧାନମନ୍ତ୍ରୀ ମୋଦି ୩୭୦ ଧାରାକୁ ଉଚ୍ଛେଦ କରିଛନ୍ତି।
ଆମେ ଯେତେବେଳେ ପୂର୍ଣ୍ଣ ବହୁମତ ସହ ଦ୍ୱିତୀୟ ଥର କ୍ଷମତା ଦଖଲ କଲୁ, ସେତେବେଳେ ଆମର ପ୍ରଥମ ଲକ୍ଷ୍ୟ ଥିଲା ଜମ୍ମୁ-କଶ୍ମୀରରୁ ଧାରା ୩୭୦ ଉଚ୍ଛେଦ କରିବା। ଏବେ କଶ୍ମୀରରୁ ଧାରା ୩୭୦ ଉଚ୍ଛେଦ ହୋଇଛି।
କଶ୍ମୀର ବିକାଶ ଅଭିମୁଖେ ଯାତ୍ରା ଆରମ୍ଭ କରିବ। ଯଦି କେହି କଶ୍ମୀରରେ ବିଶୃଙ୍ଖଳା ସୃଷ୍ଟି କରିବାକୁ ଚେଷ୍ଟା କରିବ, ତା’ହେଲେ ସେମାନଙ୍କୁ ମନେ ରଖିବାକୁ ହେବ ଯେ ଆମ ବୀର ଯବାନମାନେ ସେଠାରେ ସୁରକ୍ଷା କବଚ ଭାବେ ଛିଡ଼ା ହୋଇଛନ୍ତି। କଶ୍ମୀରରେ ସବୁ କିଛି ଧୀରେ ଧୀରେ ସ୍ୱାଭାବିକ ହେଉଛି। କେବଳ କିଛି ଲୋକ ଏହାକୁ ନେଇ ମିଥ୍ୟା ଅପପ୍ରଚାର କରିବାରେ ଲାଗିଛନ୍ତି।”