ଭୁବନେଶ୍ୱର (ଓଡ଼ିଶା ରିପୋର୍ଟର): କଥାରେ ଅଛି, ରଖେ ହରି ମାରେ କିଏ। ଏହି ଉକ୍ତିଟି ଏଠାରେ କହିବାର କାରଣ, ସୋଶାଲ୍ ମିଡିଆରେ ଏପରି ଏକ ଭିଡିଓ ଭାଇରାଲ୍ ହୋଇଛି, ଯେଉଁଥିରେ ଏକ ୭ ବର୍ଷର ଛୁଆ ଉପରେ କାର୍ ଚଢ଼ି ଚାଲିଯିବା ପରେ ମଧ୍ୟ ସେ ଜୀବିତ ରହିଥିବା ଦେଖିବାକୁ ମିଳୁଛି।
ଏହି ଭିଡିଓଟି ମୁମ୍ବାଇର ବୋଲି ଜଣାପଡ଼ିଛି। କିଛି ପିଲା ରାସ୍ତାରେ ଫୁଟ୍ବଲ୍ ଖେଳୁଥିବାବେଳେ ଏହି ଦୁର୍ଘଟଣା ଘଟିଛି ଏବଂ କାର୍ ଚଢ଼ିଯିବା ସତ୍ୱେ ପିଲାଟି ସୌଭାଗ୍ୟକ୍ରମେ ଅଘଟଣରୁ ବର୍ତ୍ତି ଯାଇଛି।
ଭିଡିଓଟିକୁ ଭଲରେ ଲକ୍ଷ୍ୟ କରନ୍ତୁ। କିଛି ପିଲା ଏକାଠି ଫୁଟବଲ୍ ଖେଳୁଛନ୍ତି। ଏହି ସମୟରେ ଏହି ୭ ବର୍ଷର ପିଲାଟିର ଜୋତାର ଲେସ୍ ହଠାତ୍ ଖସିଯାଇଛି ଏବଂ ସେ ତଳେ ବସି ପଡ଼ି ଜୋତାର ଲେସ୍କୁ ବାନ୍ଧିବା ପାଇଁ ଚେଷ୍ଟା କରୁଛି। ଠିକ୍ ଏହି ସମୟରେ ଜଣେ ମହିଳା ପାଖରେ ଥିବା ନିଜର କାର୍ ଷ୍ଟାର୍ଟ କରୁଛନ୍ତି। କିନ୍ତୁ ପିଲାଟି ତାଙ୍କ କାର୍ର ଠିକ୍ ପାଖରେ ବସି ଲେସ୍ ବାନ୍ଧୁଛି ବୋଲି ସେ ଦେଖିପାରୁନାହାନ୍ତି।
ଏହାପରେ ଦେଖନ୍ତୁ, ମହିଳା ଜଣଙ୍କ ନିଜ କାର୍ ଚଳାଇ ପିଲାଟି ଉପରେ ଚଢ଼ାଇ ଦେଉଛନ୍ତି। କିନ୍ତୁ ସୌଭାଗ୍ୟବଶଃତ ପିଲାଟି କାର୍ର ମଝିରେ ରହିଯାଉଛି ଏବଂ ପରେ କାର୍ଟି ଗଲା ପରେ ସେ ଉଠି ପଡ଼ି ପୁଣି ବଲ୍ ଧରି ଦୌଡ଼ୁଛି। ତେବେ ପିଲାଟିର ଅନ୍ୟ କୌଣସି କ୍ଷତି ହୋଇଛି କି ନାହିଁ, ତାହା ସମ୍ପୂର୍ଣ୍ଣ ଜଣାପଡ଼ିନାହିଁ। ଏହି ସମସ୍ତ ଦୃଶ୍ୟ ସିସିଟିଭି କ୍ୟାମେରାରେ କଏଦ୍ ହୋଇଛି।
https://youtu.be/wLomRkBIWfA
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
