ଦୋଷୀ ନେତାଙ୍କୁ ଆଜୀବନ ବ୍ୟାନ୍ ପିଆଇଏଲକୁ ବିରୋଧ

ନୂଆଦିଲ୍ଲୀ: ଯେକୌଣସି ମାମଲାରେ ଦୋଷୀ ସାବ୍ୟସ୍ତ ହେଲେ ରାଜନେତାଙ୍କୁ ଜୀବନସାରା ନିର୍ବାଚନ ଲଢ଼ିବାକୁ ଅନୁମତି ଦିଆନଯାଉ।  ଏ ନେଇ ସୁପ୍ରିମକୋର୍ଟରେ ଏକ ପିଆଇଏଲ୍ ବା ଜନସ୍ୱାର୍ଥ ମାମଲା ଦାଏର ହୋଇଛି। ବିଜେପି ନେତା ତଥା ଆଇନଜୀବୀ ଅଶ୍ୱୀନ ଉପାଧ୍ୟାୟ ଏହି ପିଆଇଏଲ ଦାଏର କରିଛନ୍ତି। ତେବେ ସରକାର କୋର୍ଟରେ ଏହାକୁ ବିରୋଧ କରି ସତ୍ୟପାଠ ଦାଖଲ କରିଛନ୍ତି।

ଅଧିକ ପଢନ୍ତୁ : ସାଢ଼େ ୭ ଘଣ୍ଟା ବୈଠକରେ ସରକାର ଓ ଚାଷୀଙ୍କ ମଧ୍ୟରେ କ’ଣ ଆଲୋଚନା ହେଲା?

ଜଣେ ନିର୍ବାଚିତ ପ୍ରତିନିଧି କୌଣସି ମାମଲାରେ ଦୋଷୀ ସାବ୍ୟସ୍ତ ହେଲେ ଛଅ ବର୍ଷ ପାଇଁ ନିର୍ବାଚନ ଲଢ଼ି ନପାରିବା ନେଇ ନିୟମ ରହିଛି। ଏବେ ଏହାକୁ ଆଜୀବନ କରିବା ଦରକାର ବୋଲି ନିଜ ପିଆଇଏଲରେ ଦାବି କରିଛନ୍ତି ଶ୍ରୀ ଉପାଧ୍ୟାୟ। ରିପ୍ରେଜେଣ୍ଟେସନ ଅଫ୍ ପିପୁଲସ ଆକ୍ଟ (ଆରପିଏ)ର ନିୟମକୁ ଆଧାର କରି ସେ ଏହି ଦାବି କରିଛନ୍ତି।

ଅନ୍ୟପକ୍ଷରେ ସରକାର ଏହି ମାମଲାରେ ପକ୍ଷ ରଖି କହିଛନ୍ତି, ୧୯୫୧ ମସିହା ଆରପିଏ ଆଇନର ମୂଳ ଲକ୍ଷ୍ୟ ଅନୁସାରେ ଏହି ପିଆଇଏଲ୍ ଦାବି ଯୁକ୍ତିସଂଗତ ନୁହେଁ।

ଅଶ୍ୱୀନ ଉପାଧ୍ୟାୟ କହିଛନ୍ତି, ଯେତେବେଳେ ଜଣେ କାର୍ଯ୍ୟନିର୍ବାହୀ/ନ୍ୟାୟପାଳିକାର ସଦସ୍ୟ ସାମାନ୍ୟ ଅପରାଧରେ ଦୋଷୀ ସାବ୍ୟସ୍ତ ହୁଅନ୍ତି, ସେତେବେଳେ ତାଙ୍କ ଚାକିରି ପଳାଏ। କିନ୍ତୁ ଜଣେ ନିର୍ବାଚିତ ପ୍ରତିନିଧି ହତ୍ୟା, ଦୁଷ୍କର୍ମ, ଚୋରା ଚାଲାଣ, ଟଙ୍କା ହେରଫେର ଓ ଡକାୟତି ଇତ୍ୟାଦି ଅଭିଯୋଗରେ ଦୋଷୀ ସାବ୍ୟସ୍ତ ହେଲେ ଜେଲରୁ ବାହାରିବାର ସର୍ବାଧିକ ଛଅ ବର୍ଷ ପାଇଁ ନିର୍ବାଚନରେ ​​ପ୍ରତିଦ୍ୱନ୍ଦ୍ୱିତା କରିପାରିବେନି। ତେଣୁ ଆରପିଏର ଧାରା ୮ , ୯ ଏବଂ ସମ୍ବିଧାନର ଧାରା ୧୪ ଅନୁଯାୟୀ ସେମାନଙ୍କ ନିର୍ବାଚନ ଲଢ଼ିବା ଉପରେ ସଂପୂର୍ଣ୍ଣ ରୋକ୍ ଲଗାଯିବା ଦରକାର।

ତେବେ ସେ ତାଙ୍କ ଆବେଦନରେ ଏହା ବି କହିଛନ୍ତି ଯେ, ଦୋଷୀ ସାବ୍ୟସ୍ତ ବ୍ୟକ୍ତି ନିଜର ରାଜନୀତିକ ଦଳ ଗଠନ କରିପାରିବେ କିମ୍ବା ଜେଲରେ ରହି ରାଜନୀତିକ ଦଳର ଅଧିକାରୀ ହୋଇପାରିବେ।

ସୂଚନାଯୋଗ୍ୟ, ସାରା ଦେଶରେ ୪,୪୪୨ଟି ଅପରାଧିକ ମାମଲା ରାଜନେତାଙ୍କ ନାଁରେ ରହିଛି। ସେଥିମଧ୍ୟରୁ କେବଳ ସାଂସଦ ଓ ବିଧାୟକଙ୍କ ନାଁରେ ୨,୫୫୭ ମାମଲା ରହିଛି, ଯେଉଁଗୁଡ଼ିକ ବିଚାରାଧୀନ ରହିଛି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।