ଲକ୍ଷ୍ନୌ: ଦେଶରେ କରୋନା ସଂକ୍ରମିତଙ୍କ ସଂଖ୍ୟା ସାମାନ୍ୟ ହ୍ରାସ ପାଇଥିଲେ ହେଁ ରାଜଧାନୀ ଦିଲ୍ଲୀରେ ଏହା ଦ୍ରୁତଗତିରେ ବୃଦ୍ଧି ପାଇବାରେ ଲାଗିଛି। ବର୍ତ୍ତମାନ ଦିଲ୍ଲୀରେ କରୋନାର ୩ୟ ଲହରୀ ଚାଲିଥିବା ସରକାର କହିଛନ୍ତି। ତେଣୁ ଦିଲ୍ଲୀରୁ ଆସୁଥିବା ସବୁ ଲୋକ କରୋନା ପରୀକ୍ଷାର ସମ୍ମୁଖୀନ ହେବେ ବୋଲି ଆଜି ଉତ୍ତର ପ୍ରଦେଶ ସରକାର କହିଛନ୍ତି।
ରାଜ୍ୟରେ କରୋନାର ଦ୍ୱିତୀୟ ଲହରୀ ଉପରେ ବ୍ରେକ ଲଗାଇବାକୁ ୟୁପି ସରକାର ଏପରି ନିଷ୍ପତ୍ତି ନେଇଛନ୍ତି। ଶୁକ୍ରବାର ଅର୍ଥାତ ଆଜି ଠାରୁ ଯିଏ ବି ଦିଲ୍ଲୀରୁ ଉତ୍ତର ପ୍ରଦେଶ ଆସିବେ, ତାଙ୍କର କରୋନା ଟେଷ୍ଟ ବାଧ୍ୟତାମୂଳକ ଭାବେ କରାଯିବ।
ଦିଲ୍ଲୀରୁ ଆସୁଥିବା ଲୋକଙ୍କୁ ଚିହ୍ନଟ କରିବା ପାଇଁ ଏୟାରପୋର୍ଟ କର୍ମଚାରୀ, ସର୍ଭେଲାନ୍ସ ଟିମ, କର୍ପୋରେଟର୍ସ ଓ ଆବାସିକ କଲ୍ୟାଣ ଆସୋସିଏସନ ସହାୟତା କରିବେ। ସେମାନେ ସ୍ୱେଚ୍ଛାକୃତ ଭାବେ ସ୍ଥାନୀୟ ପ୍ରଶାସନକୁ ସୂଚନା ଦେବେ ଓ ତଦ୍ନୁସାରେ ସମସ୍ତଙ୍କର କରୋନା ଟେଷ୍ଟ କରାଯିବ।
ସେହିପରି ରାଜ୍ୟରେ ଥିବା ସମସ୍ତ ଘରୋଇ ପ୍ୟାଥୋଲଜିର କର୍ମଚାରୀଙ୍କ ମଧ୍ୟ କରୋନା ଟେଷ୍ଟ କରାଯିବ। ରାଜ୍ୟରେ ଯେମିତି କରୋନାର ଦ୍ୱିତୀୟ ଲହରୀ ଦେଖା ନ ଯିବ, ସେଥିପାଇଁ ସରକାର ଏଭଳି ପଦକ୍ଷେପ ନେଇଛନ୍ତି।