ଦେଶରେ ପ୍ରଥମ: ଦିନକରେ ୭୫ ହଜାରରୁ ଅଧିକ ପଜିଟିଭ, ୧୦୨୩ ମୃତ

ନୂଆଦିଲ୍ଲୀ: ପୁଣିଥରେ ଭାରତରେ ରେକର୍ଡ ଭାଙ୍ଗିଛି ମହାମାରୀ କରୋନା ଭାଇରସ। ପ୍ରଥମଥର ପାଇଁ ଗୋଟିଏ ଦିନରେ ରେକର୍ଡ ୭୫ ହଜାରରୁ ଅଧିକ ଲୋକ ଏହି ପ୍ରାଣଘାତୀ ଭାଇରସରେ ଆକ୍ରାନ୍ତ ହୋଇଛନ୍ତି। ରେକର୍ଡ ସଂଖ୍ୟଙ୍କ ଆକ୍ରାନ୍ତ ଚିହ୍ନଟ ହେବା ପରେ ଦେଶରେ ମୋଟ ସଂକ୍ରମିତଙ୍କ ସଂଖ୍ୟା ୩୩ ଲକ୍ଷ ପାର୍‌ କରିଯାଇଛି। ସେହିପରି ଦିନକରେ କରୋନା ୧୦୨୩ ଜଣଙ୍କ ମୁଣ୍ଡ ନେବାରୁ ମୋଟ ମୃତକଙ୍କ ସଂଖ୍ୟା ୬୦ ହଜାର ଡେଇଁଛି।

ସ୍ୱାସ୍ଥ୍ୟ ମନ୍ତ୍ରଣାଳୟର ସୂଚନା ଅନୁଯାୟୀ, ଗତ ୨୪ ଘଣ୍ଟାରେ ରେକର୍ଡ ୭୫,୭୬୦ ଜଣ ଲୋକ କରୋନାରେ ଆକ୍ରାନ୍ତ ହୋଇଛନ୍ତି। ଏହାକୁ ମିଶାଇ ଦେଶରେ ମୋଟ ସଂକ୍ରମିତଙ୍କ ସଂଖ୍ୟା ୩୩,୧୦,୨୩୫କୁ ବୃଦ୍ଧି ପାଇଛି। ସେହିପରି ଦେଶରେ କରୋନା ଜନିତ ମୃତ୍ୟୁସଂଖ୍ୟା ୬୦,୪୭୨ ଛୁଇଁଛି।

ତେବେ ୨୪ ଘଣ୍ଟାରେ ୫୬,୦୧୩ ଜଣ ଆରୋଗ୍ୟ ଲାଭ କରିବା ସମସ୍ତଙ୍କୁ ଆଶ୍ୱସ୍ତ କରିଛି। ନୂଆ ଆରୋଗ୍ୟଙ୍କୁ ମିଶାଇ ଦେଶରେ ଏଯାଏ ୨୫,୨୩,୭୭୨ରେ ପହଞ୍ଚି ଯାଇଛି। ଏହାର ଦେଶରେ ୭,୨୫,୯୯୧ ଆକ୍ଟିଭ କେସ ରହିଛି। ସେହିପରି ଆରୋଗ୍ୟ ହାର ୭୬% ପାର କରିଛି ଓ ମୃତ୍ୟୁହାର ୧.୮୩% ରହିଛି।

ଅନ୍ୟପକ୍ଷରେ ବୁଧବାର ସମଗ୍ର ଦେଶରେ ୯,୨୪,୯୯୮ଟି ନମୁନା ପରୀକ୍ଷା କରାଯାଇଛି। ଏହାକୁ ମିଶାଇ ଦେଶରେ ମୋଟ ୩ କୋଟି ୮୫ ଲକ୍ଷରୁ ଅଧିକ ନମୁନା ପରୀକ୍ଷା କରାଗଲାଣି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।