ମୁମ୍ବାଇ: ପୁଣିଥରେ କରୋନାର ନୂଆ ରୂପ ସମସ୍ତଙ୍କ ଚିନ୍ତା ବଢ଼ାଇଛି। ଦେଶରେ ତାଣ୍ଡବ ରଚିଥିବା କରୋନାର ଡେଲ୍ଟା ଭରିଏଣ୍ଟ ଏବେ ମ୍ୟୁଟେସନ ହୋଇ ଡେଲ୍ଟା ପ୍ଲସର ରୂପ ଧାରଣ କରିଛି। ଏହି ଡେଲ୍ଟା ପ୍ଲସ ଭାରିଏଣ୍ଟ ଏବେ ଧୀରେଧୀରେ ତା’ର କାୟା ବିସ୍ତାର କରିବା ଆରମ୍ଭ କରିଛି।
ଦ୍ୱିତୀୟ ୱେଭରେ ସବୁଠାରୁ ଅଧିକ ପ୍ରଭାବିତ ହୋଇଥିବା ମହାରାଷ୍ଟ୍ରରେ ୨୧ଟି ଡେଲ୍ଟା ପ୍ଲସ ଭାରିଏଣ୍ଟ କେସ୍ ସାମ୍ନାକୁ ଆସିଥିବା ରାଜ୍ୟର ସ୍ୱାସ୍ଥ୍ୟମନ୍ତ୍ରୀ ରାଜେଶ ଟୋପେ ସୂଚନା ଦେଇଛନ୍ତି।
ସେ କହିଛନ୍ତି, ଡେଲ୍ଟା ପ୍ଲସ ଭାରିଏଣ୍ଟ ସମ୍ପର୍କରେ ମହାରାଷ୍ଟ୍ର ସରକାର ବଡ଼ ପଦକ୍ଷେପ ନେଇଛନ୍ତି। ଭାରିଏଣ୍ଟକୁ ଚିହ୍ନଟ କରିବା ପାଇଁ ଜନୋମ ସିକ୍ୱେନ୍ସିଂ କରିବାକୁ ନିଷ୍ପତ୍ତି ହୋଇଛି। ପ୍ରତି ଜିଲ୍ଲାରୁ ଏଥିପାଇଁ ୧୦୦ଟି ଲେଖାଏ ନମୁନା ସଂଗ୍ରହ କରାଯାଇଥିଲା। ମେ’ ୧୫ରୁ ଇତି ମଧ୍ୟରେ ୭୫୦୦ ନମୁନା ସଂଗ୍ରହ ହୋଇଥିଲା ଓ ଏହା ମଧ୍ୟରୁ ୨୧ ଜଣ ଡେଲ୍ଟା ପ୍ଲସ ଭାରିଏଣ୍ଟ ଦ୍ୱାରା ସଂକ୍ରମିତ ହୋଇଥିବା ଜଣାପଡ଼ିଛି।
ରତ୍ନଗିରିରେ ୯ ଜଣ, ଜଲଗାଓଁରେ ୭, ମୁମ୍ବାଇରେ ୨, ପାଲଘର, ସିଦ୍ଧୁଦୁର୍ଗ ଏବଂ ଥାଣେରେ ଜଣେ ଲେଖାଏ ଲୋକ ଡେଲ୍ଟା ପ୍ଲସ ଭାରିଏଣ୍ଟରେ ଆକ୍ରାନ୍ତ ହୋଇଛନ୍ତି। ଅଧିକାରୀମାନେ ଏହି ସଂକ୍ରମିତଙ୍କ ତଥ୍ୟ ହାସଲ କରି ସେମାନଙ୍କ କଣ୍ଟାକ୍ଟ ଟ୍ରେସିଂ କରିବା ଆରମ୍ଭ କରିଛନ୍ତି। ଚିନ୍ତା କରିବାର କୌଣସି କାରଣ ଏଯାଏ ଆସି ନଥିବା ସେ କହିଛନ୍ତି।
ସୂଚନାଯୋଗ୍ୟ, ଡେଲ୍ଟା ଭାରିଏଣ୍ଟର ନୂଆ ରୂପ ହେଉଛି ଡେଲ୍ଟା ପ୍ଲସ। ଡେଲ୍ଟା ଭାରିଏଣ୍ଟ ପ୍ରଥମେ ଭାରତରେ ଚିହ୍ନଟ ହୋଇଥିଲା। ଏହି ଡେଲ୍ଟା ଭାରିଏଣ୍ଟ ପାଇଁ ଦେଶରେ କରୋନା ଦ୍ୱିତୀୟ ୱେଭ ସାମ୍ନାକୁ ଆସିଥିଲା। ଏବେ ଭାରତ ସମେତ ଏକାଧିକ ଦେଶରେ ଡେଲ୍ଟା ଭାରିଏଣ୍ଟ ଚିହ୍ନଟ ହେବାରେ ଲାଗିଛି।