ଅମିତ ଶାହଙ୍କ ଉପରେ ରାଗିଲେ ପ୍ରକାଶ ରାଜ, କହିଲେ- ଘର ଭାଙ୍ଗିବାକୁ ଚେଷ୍ଟା କରନ୍ତୁନି

ହାଇଦ୍ରାବାଦ: କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କ ବୟାନକୁ ନେଇ ରାଗିଗଲେ ସାଉଥ ସୁପରଷ୍ଟାର ପ୍ରକାର ରାଜ। ଟ୍ୱିଟ୍‌ କରି ତାଙ୍କ ବୟାନକୁ କଲେ ତୀବ୍ର ବିରୋଧ। ଏପରିକି ଗୃହମନ୍ତ୍ରୀଙ୍କୁ ଚେତାବନୀ ମଧ୍ୟ ଦେଇଦେଲେ।

ଫିଲ୍ମ ଇଣ୍ଡଷ୍ଟ୍ରିର ଅନେକ ଲୋକ ରାଜନୈତିକ ପ୍ରସଙ୍ଗକୁ ନେଇ ଖୋଲାଖୋଲି ଭାବରେ ନିଜର ମନ୍ତବ୍ୟ ରଖନ୍ତି। ନିକଟରେ ଗୃହମନ୍ତ୍ରୀ ଅମିତ ଶାହ ହିନ୍ଦୀ ଭାଷାକୁ ନେଇ  ଏକ ବୟାନ ଦେଇଥିଲେ।  ‘ହିନ୍ଦୀକୁ ଇଂରାଜୀର ବିକଳ୍ପ ଭାବେ ବ୍ୟବହାର କରାଯିବା ଉଚିତ ଏବଂ ଅଣ-ହିନ୍ଦୀ ଭାଷାଭାଷୀ ଲୋକମାନେ ଇଂରାଜୀ ବଦଳରେ ହିନ୍ଦୀ କହିବା ଉଚିତ ବୋଲି ଗୃହମନ୍ତ୍ରୀ କହିଥିଲେ।’ ଅମିତ ଶାହଙ୍କ ଏହି ବୟାନକୁ ନେଇ ଏବେ ବିବାଦ ଉପୁଜିଛି। ଅନେକ ଲୋକେ ଏହାକୁ ନେଇ ପ୍ରତିକ୍ରିୟା ଦେଇଛନ୍ତି। ସଙ୍ଗୀତ ନିର୍ଦ୍ଦେଶକ ଏଆର୍ ରେହମାନ୍ ପରେ ଏବେ ପ୍ରକାଶ ରାଜ ମଧ୍ୟ ଏହି ବୟାନକୁ ନେଇ ତୀବ୍ର ବିରୋଧ କରିଛନ୍ତି।

ଅମିତ ଶାହଙ୍କ ବୟାନର ଏକ କ୍ଲିପ୍ ସେୟାର କରି ପ୍ରକାଶ ରାଜ ଟ୍ୱିଟ୍‌ କରିଛନ୍ତି। ସେ ଏଥିରେ ଲେଖିଛନ୍ତି, ‘ଘର ଭାଙ୍ଗିବାକୁ ଚେଷ୍ଟା କରନ୍ତୁ ନାହିଁ ଗୃହମନ୍ତ୍ରୀ। ଆମେ ଆପଣଙ୍କୁ ଚେତାବନୀ ଦେଉଛୁ ଯେ ହିନ୍ଦୀକୁ ଆମ ଉପରେ ଲଦିବା ବନ୍ଦ କରନ୍ତୁ। ଆମେ ଆମର ବିବିଧତାକୁ ଭଲପାଏ। ଆମେ ଆମର ମାତୃଭାଷାକୁ ଭଲପାଉ। ଆମେ ଆମର ପରିଚୟକୁ ଭଲପାଉ।’

ଉଲ୍ଲେଖଥାଉ କି, ପ୍ରକାଶ ରାଜଙ୍କ ମାତୃଭାଷା କନ୍ନଡ ହୋଇଥିଲେ ମଧ୍ୟ ସେ ଦକ୍ଷିଣରେ ତେଲୁଗୁ ଫିଲ୍ମ ବ୍ୟତୀତ ହିନ୍ଦୀ, ତାମିଲ ଭାଷାରେ ମଧ୍ୟ କାମ କରିଛନ୍ତି। ପ୍ରକାଶ ରାଜ ଇଂରାଜୀ ସମେତ ଅନେକ ଭାରତୀୟ ଭାଷାକୁ ଭଲଭାବେ କହିପାରନ୍ତି। ପ୍ରକାଶ ରାଜଙ୍କ ବ୍ୟତୀତ ଅମିତ ଶାହଙ୍କ ବୟାନକୁ ନେଇ ଅଣ-ହିନ୍ଦୀ ଭାଷାଭାଷୀ ରାଜ୍ୟର ଅନେକ ଲୋକ ମଧ୍ୟ ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି।

ପ୍ରକାଶ ରାଜଙ୍କ ପୂର୍ବରୁ ସଙ୍ଗୀତ ନିର୍ଦ୍ଦେଶକ ଏଆର୍ ରହମାନ ମଧ୍ୟ ଅମିତ ଶାହଙ୍କ ବୟାନ ଉପରେ ତୀବ୍ର ପ୍ରତିକ୍ରିୟା ପ୍ରକାଶ କରିଥିଲେ। ସେ ନିଜ ଟ୍ୱିଟରେ ଲେଖିଥିଲେ, ‘ତାମିଲ ଭାଷା ହେଉଛି ଆମର ଅସ୍ତିତ୍ୱର ମୂଳ।’ ତାମିଲ ବ୍ୟତୀତ ଏଆର୍ ରହମାନ ଇଂରାଜୀ ଏବଂ ହିନ୍ଦୀରେ ମଧ୍ୟ କହିପାରନ୍ତି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।