ନୂଆଦିଲ୍ଲୀ: କରୋନା ସଂକ୍ରମଣରେ ଗୁରୁତର ହୋଇ ଏକ ଘରୋଇ ଡାକ୍ତରଖାନାରେ ଚିକିତ୍ସିତ ହେଉଥିବା ଆରଏଲଡି ମୁଖ୍ୟ ଅଜିତ ସିଂଙ୍କର ମୃତ୍ୟୁ ଘଟିଛି। ଗୁରୁବାର ସକାଳେ ସେ ନିଃଶ୍ୱାସ ତ୍ୟାଗ କରିଛନ୍ତି। ୮୨ ବର୍ଷୀୟ ଅଜିତ ସିଂ କରୋନା ସଂକ୍ରମିତ ହୋଇଥିଲେ ଏବଂ ଗତ ଦୁଇ ଦିନ ଧରି ତାଙ୍କ ଅବସ୍ଥା ଗୁରୁତର ହୋଇପଡ଼ିଥିଲା। ତାଙ୍କ ଫୁସଫୁସକୁ କରୋନା ସଂକ୍ରମିତ ହୋଇଯାଇଥିବାରୁ ସେ ଗୁରୁତର ହୋଇପଡ଼ିଥିଲେ ବୋଲି ଜଣାପଡ଼ିଛି।
ଚୌଧୁରୀ ଅଜିତ ସିଂ ହେଉଛନ୍ତି ପୂର୍ବତନ ପ୍ରଧାନମନ୍ତ୍ରୀ ଚୌଧରୀ ଚରଣ ସିଂଙ୍କ ପୁଅ। ସେ ୟୁପିର ବାଗପତ ଲୋକସଭା ଆସନରୁ ସାତଥର ଲୋକସଭାକୁ ନିର୍ବାଚିତ ହୋଇଥିଲେ। ଅଜିତ ସିଂ ଦେଶର ଜଣେ ବଡ଼ ଜାଠ ନେତା। ପଶ୍ଚିମ ୟୁପିରେ ତାଙ୍କର ଏକ ସ୍ୱତନ୍ତ୍ର ସ୍ଥାନ ରହିଛି। ସେ କେନ୍ଦ୍ରରେ ବେସାମରିକ ବିମାନ ଚଳାଚଳ ମନ୍ତ୍ରୀ ମଧ୍ୟ ଥିଲେ।
ଚୌଧରୀ ଅଜିତ ସିଂ ୧୯୮୬ ମସିହାରେ ରାଜନୀତିରେ ପ୍ରବେଶ କରିଥିଲେ। ପୂର୍ବତନ ପ୍ରଧାନମନ୍ତ୍ରୀ ଚୌଧୁରୀ ଚରଣ ସିଂ ଅସୁସ୍ଥ ହୋଇପଡିବା ପରେ ୧୯୮୬ରେ ଅଜିତ ରାଜ୍ୟସଭାକୁ ଯାଇଥିଲେ। ୧୯୮୭ରୁ ୧୯୮୮ ପର୍ଯ୍ୟନ୍ତ ସେ ଲୋକ ଦଳ (ଏ) ଏବଂ ଜନତା ପାର୍ଟିର ସଭାପତି ମଧ୍ୟ ଥିଲେ।
୧୯୮୯ରେ ଅଜିତ ସିଂ ତାଙ୍କ ଦଳକୁ ଜନତା ଦଳରେ ମିଶ୍ରଣ କରି ସାଧାରଣ ସମ୍ପାଦକ ହୋଇଥିଲେ। ୧୯୮୯ରେ ଅଜିତ ସିଂ ପ୍ରଥମ ଥର ପାଇଁ ବାଗପାତରୁ ଲୋକସଭାକୁ ନିର୍ବାଚନରେ ହୋଇଥିଲେ। ଏହା ପରେ ତାଙ୍କୁ ଭିପି ସିଂ ସରକାରରେ କେନ୍ଦ୍ର ମନ୍ତ୍ରୀ ହୋଇଥିଲେ। ୧୯୯୧ରେ ସେ ପୁନର୍ବାର ବାଗପାତ ଲୋକସଭା ନିର୍ବାଚନରେ ଜିତିଥିଲେ ଏବଂ ନରସିଂହ ରାଓଙ୍କ ସରକାରରେ ମଧ୍ୟ ମନ୍ତ୍ରୀ ହୋଇଥିଲେ। ୧୯୯୬ରେ ସେ ତୃତୀୟ ଥର ପାଇଁ କଂଗ୍ରେସ ଟିକେଟରେ ଲୋକସଭାକୁ ନିର୍ବାଚିତ ହୋଇଥିଲେ। ପରେ ସେ ଏହି ଆସନରୁ ଇସ୍ତଫା ଦେଇଥିଲେ।
୧୯୯୭ରେ ଅଜିତ ସିଂ ରାଷ୍ଟ୍ରିୟ ଲୋକ ଦଳ ପ୍ରତିଷ୍ଠା କରିଥିଲେ ଏବଂ ପରବର୍ତ୍ତୀ ସମୟରେ ୧୯୯୭ ଉପ-ନିର୍ବାଚନରେ ବାଗପାତରୁ ଲୋକସଭାକୁ ନିର୍ବାଚିତ ହୋଇଥିଲେ। ୧୯୯୮ ନିର୍ବାଚନରେ କିନ୍ତୁ ତାଙ୍କୁ ପରାଜୟର ସାମ୍ନା କରିବାକୁ ପଡିଥିଲା। ତେବେ ୧୯୯୯ ନିର୍ବାଚନରେ ସେ ପୁଣି ଜିତି ଲୋକସଭାରେ ପହଞ୍ଚିଥିଲେ। ୨୦୦୧ ରୁ ୨୦୦୩ ପର୍ଯ୍ୟନ୍ତ ତାଙ୍କ ଦଳ ବିଜେପି ସହିତ ମିଶି ଥିଲ। ଆଉ ସେ ଅଟଳ ବିହାର ବାଜେପୟୀ ସରକାରରେ ମନ୍ତ୍ରୀ ଥିଲେ। ପରେ ୨୦୧୧ ମସିହାରେ, ସେ ୟୁପିଏର ଅଂଶୀଦାର ହୋଇଥିଲେ। ସେ ୨୦୧୧ ରୁ ୨୦୧୪ ପର୍ଯ୍ୟନ୍ତ ମନମୋହନ ସିଂ ସରକାରରେ ମନ୍ତ୍ରୀ ଥିଲେ।
୨୦୧୪ରେ ମୁଜାଫରନଗର ଆସନରୁ ଲୋକସଭା ନିର୍ବାଚନରେ ହାରିବା ପରେ ଅଜିତ ସିଂ ଏକ ବଡ଼ ସମସ୍ୟାର ସମ୍ମୁଖୀନ ହୋଇଥିଲେ। ଏହା ପରେ ଅଜିତ ୨୦୧୯ ମସିହାରେ ମୁଜାଫରନଗରରୁ ଲଢ଼ିଥିଲେ କିନ୍ତୁ ବିଜେପିର ସଞ୍ଜୀବ ବାଲିଆନଙ୍କ ପାଖରୁ ହାରିଥିଲେ। ୨୦୧୩ରେ ମୁଜାଫରନଗରରେ ହୋଇଥିବା ଦଙ୍ଗା ଆରଏଲଡି ରାଜନୀତିରେ ଅନେକ କ୍ଷତି ଘଟାଇଥିଲା। ଏହି ଦଙ୍ଗା ଆରଏଲଡିର ପ୍ରସିଦ୍ଧ ଜାଟ-ମୁସଲିମ ସମୀକରଣକୁ ଭାଙ୍ଗି ଦେଇଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
