ନୂଆଦିଲ୍ଲୀ: ଆସାମ ଏବଂ ମିଜୋରାମ ମଧ୍ୟରେ ଦୀର୍ଘ ଦିନ ଧରି ଚାଲିଥିବା ସୀମା ବିବାଦ ସମସ୍ୟାର ହେବ ସମାଧାନ। ଗୁରୁବାର ଦୁଇ ରାଜ୍ୟ ମଧ୍ୟରେ ହୋଇଥିବା ଆଲୋଚନାରେ ଏହି ନିର୍ଯାସ ବାହାରିଛି। ଉଭୟ ରାଜ୍ୟ ଆଲୋଚନା ଜରିଆରେ ସମସ୍ୟାର ସମାଧାନ କରିବେ ବୋଲି ନିଷ୍ପତ୍ତି ନେଇଛନ୍ତି। ଏଥିସହ ଦୁଇ ରାଜ୍ୟର ସୀମାରେ ଯେଉଁ ସ୍ଥାନକୁ ନେଇ ବିବାଦ ରହିଛି ସେହି ସ୍ଥାନରୁ ପୁଲିସ ଫୋର୍ସ ମୁତୟନ ନକରିବାକୁ ମଧ୍ୟ ଦୁଇ ରାଜ୍ୟ ନିଷ୍ପତ୍ତି ନେଇଛନ୍ତି। ଏହାବାଦ ଆସାମ ସରକାର ମିଜୋରାମକୁ ନଯିବା ପାଇଁ ଯେଉଁ ଟ୍ରାଭେଲ ଆଡଭାଇଜରି ଜାରି କରିଥିଲେ ତାକୁ ବାତିଲ କରିବାକୁ ଆସାମ ସରକାର ନିଷ୍ପତ୍ତି ନେଇଛନ୍ତି।
ଗୁରୁବାର ଉଭୟ ରାଜ୍ୟର ପ୍ରତିନିଧିଙ୍କ ମଧ୍ୟରେ ଆଲୋଚନା ହୋଇଥିଲା। ଏହାପରେ ଆସାମ ଏବଂ ମିଜୋରାମ ସରକାର ଏକାଠି ଏକ ବିବୃତ୍ତି ଜାରି କରିଛନ୍ତି। ଯେଉଁଥିରେ ଆନ୍ତଃ ରାଜ୍ୟ ସୀମା ଅଞ୍ଚଳରେ ଶାନ୍ତି ବଜାୟ ରଖିବାକୁ ଉଭୟ ରାଜ୍ୟ ସରକାର ସହମତି ପ୍ରକାଶ କରିଛନ୍ତି। ଦୁଇ ରାଜ୍ୟର ନିଷ୍ପତ୍ତିକୁ କେନ୍ଦ୍ର ସରକାର ସ୍ୱାଗତ କରିଛନ୍ତି। ଏଥିସହ ଉଭୟ ରାଜ୍ୟ ବିବାଦୀୟ ସୀମା ଅଞ୍ଚଳରେ ପାଟ୍ରୋଲିଂ ଏବଂ ସୁରକ୍ଷା ପାଇଁ ପୁଲିସ ମୁତୟନ କରିବେ ନାହିଁ ବୋଲି ସହମତି ପ୍ରକାଶ ପାଇଛି।
ବିବାଦୀୟ ଅଞ୍ଚଳ ଭିତରେ ଆସାମ-ମିଜୋରାମ ସୀମାରେ କରିମଗଞ୍ଜ, ହାଇଲକାଣ୍ଡି ଏବଂ ଆସାମର କଚର ଜିଲ୍ଲା ଏବଂ ମିଜୋରାମର ମମିତ ଏବଂ କୋଲାସିବ ଜିଲ୍ଲା ଅନ୍ତର୍ଭୁକ୍ତ। ଦୁଇ ରାଜ୍ୟ ମଧ୍ୟରେ ଯାନବାହାନ ଚଳାଚଳ ଆରମ୍ଭ କରିବାକୁ ସହମତି ପ୍ରକାଶ ପାଇଛି। ଏହି ମିଳିତ ବିବୃତ୍ତି ବେଳେ ଦୁଇ ରାଜ୍ୟର ମନ୍ତ୍ରୀ ଏବଂ ବରିଷ୍ଠ ପ୍ରଶାସନିକ ଅଧିକାରୀ ଉପସ୍ଥିତ ଥିଲେ। ଆସାମର ମନ୍ତ୍ରୀ ଅଶୋକ ସିଙ୍ଗଲ ଟ୍ୱିଟ କରି ଏହି ବିବୃତ୍ତି ପୋଷ୍ଟ କରିଛନ୍ତି।
ସୂଚନାଯୋଗ୍ୟ, ଜୁଲାଇ ୨୬ରେ ଦୁଇ ରାଜ୍ୟ ସୀମାରେ ଥିବା ବିବାଦୀୟ ଅଞ୍ଚଳରେ ସଂଘର୍ଷ ହୋଇଥିଲା। ଏଥିରେ ଆସାମର ପାଞ୍ଚ ଜଣ ପୁଲିସ୍ ସମେତ ମୋଟ୍ ୬ ଜଣଙ୍କର ମୃତ୍ୟୁ ଘଟିଛି। ଏଥିସହ କଚର ଜିଲ୍ଲାର ଏସପିଙ୍କ ସମେତ ୫୦ରୁ ଅଧିକ ଲୋକ ଆହତ ହୋଇଥିଲେ। ଏହାପରେ କେନ୍ଦ୍ର ଗୃହ ମନ୍ତାଳୟ ବିବାଦୀୟ ଅଞ୍ଚଳରେ କେନ୍ଦ୍ରୀୟ ସୁରକ୍ଷା ଟିମ୍ ନିୟୋଜିତ କରିଥିଲା। ଏହାପରେ ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହ ଦୁଇ ରାଜ୍ୟର ମୁଖ୍ୟମନ୍ତ୍ରୀଙ୍କ ସହିତ ଆଲୋଚନା କରି ଏକାଠି ବସି ବିବାଦର ସମାଧାନ କରିବାକୁ କହିଥିଲେ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
