କୋଭିଡ୍ ଆକ୍ରାନ୍ତଙ୍କୁ ଘରୋଇ ହସ୍ପିଟାଲରେ ମିଳିବ ମାଗଣା ଚିକିତ୍ସା

ଭୋପାଳ: କରୋନା ଆକ୍ରାନ୍ତଙ୍କୁ ମାଗଣା ଚିକିତ୍ସା ପାଇଁ ମଧ୍ୟପ୍ରଦେଶ ସରକାର ଏକ ନୂଆ ଯୋଜନା ଆରମ୍ଭ କରିବାକୁ ଯାଉଛନ୍ତି। ଏହି ଯୋଜନା ଅଧୀନରେ ରାଜ୍ୟର ଗରିବ ଏବଂ ମଧ୍ୟବିତ୍ତ ଶ୍ରେଣୀର ଲୋକ ଘରୋଇ ଡାକ୍ତରଖାନାରେ ମାଗଣାରେ କରୋନା ଚିକିତ୍ସା ପାଇପାରିବେ। ଯେଉଁ ଘରୋଇ ହସ୍ପିଟାଲ ରାଜ୍ୟ ସରକାରଙ୍କ ସହ ଅନୁବନ୍ଧିତ ଥିବେ, ସେହି ହସ୍ପିଟାଲରେ ଏହି ମାଗଣା କୋଭିଡ ଚିକିତ୍ସା ମିଳିବ। ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନ ଏହି ଘୋଷଣା କହିଛନ୍ତି।

ଆୟୁଷ୍ମାନ ଭାରତ ଯୋଜନାରେ ଯେଉଁ ଘରୋଇ ଡାକ୍ତରଖାନା ସାମିଲ ରହିଛନ୍ତି, ସେହି ହସ୍ପିଟାଲଗୁଡ଼ିକୁ ରାଜ୍ୟ ସରକାର ସ୍ୱତନ୍ତ୍ର ପ୍ୟାକେଜ ପ୍ରଦାନ କରିବେ। ଆଉ ଏହି ହସ୍ପିଟାଲ ଗୁଡ଼ିକ କୋଭିଡ ଚିକିତ୍ସା ଯୋଗାଇବେ। କରୋନା ଆକ୍ରାନ୍ତଙ୍କୁ ସିଟି ସ୍କାନ, ଔଷଧ, ରେମଡେସିଭିର ଇଞ୍ଜେକ୍ସନ, ଅକ୍ସିଜେନ ଇତ୍ୟାଦି ମଧ୍ୟ ମାଗଣାରେ ଉପଲବ୍ଧ ହେବ।

ଏବେ ସୁଦ୍ଧା ରାଜ୍ୟର ଆୟୁଷ୍ମାନ ଭାରତ ଯୋଜନା ଅଧୀନରେ ଦୁଇ କୋଟି ୪୨ ଲକ୍ଷ କାର୍ଡ ପ୍ରସ୍ତୁତ କରାଯାଇଛି. ଯାହା ଜନସଂଖ୍ୟାର ୮୮ ପ୍ରତିଶତ। ସମସ୍ତ ସରକାରୀ ଚୁକ୍ତିଭିତ୍ତିକ ଡାକ୍ତରଖାନାରେ କରୋନାର ମାଗଣା ଚିକିତ୍ସା ପାଇବେ। ଆୟୁଷ୍ମାନ ଭାରତ ଯୋଜନା ଅଧୀନରେ ବର୍ତ୍ତମାନ ୩୨୮ଟି ଘରୋଇ ଡାକ୍ତରଖାନା ସହ ଜଡିତ ଅଛନ୍ତି, ଯେଉଁଥିରେ ୨୩ ହଜାର ୯୪୬ ବେଡ୍ ଉପଲବ୍ଧ। ଆୟୁଷ୍ମାନ ଭାରତ ଯୋଜନା ଅଧୀନରେ ଆସନ୍ତା ତିନିମାସ ଧରି ରାଜ୍ୟର ୬୮ଟି ଘରୋଇ ଡାକ୍ତରଖାନା ସରକାରଙ୍କ ସହ ଜଡିତ ଥିବା ସୂଚନା ରହିଛି।

ସରକାର ନିଷ୍ପତ୍ତି ନେଇଛନ୍ତି ଯେ ଆୟୁଷ୍ମାନ ଭାରତ ଯୋଜନା ଅନୁଯାୟୀ ଯଦି ପରିବାରର କୌଣସି ସଦସ୍ୟଙ୍କର ଆୟୁଷ୍ମାନ କାର୍ଡ ଥାଏ, ତେବେ ପରିବାରର ଅନ୍ୟ ସଦସ୍ୟମାନେ ମଧ୍ୟ ମାଗଣା ଚିକିତ୍ସା ପାଇପାରିବେ। କୋଭିଡ ଚିକିତ୍ସା ପାଇଁ ଡାକ୍ତରଖାନାରେ ଭର୍ତ୍ତି ହେବା ପରେ ଜିଲ୍ଲାପାଳ ସେମାନଙ୍କ ଆୟୁଷ୍ମାନ କାର୍ଡ ତିଆରି କରିବାର ବ୍ୟବସ୍ଥା କରିବେ।

ସରକାର ଆୟୁଷ୍ମାନ ଭାରତ ପ୍ୟାକେଜ୍ ହାରକୁ ୪୦% ବୃଦ୍ଧି କରିଛନ୍ତି, ଯାହା ଦ୍ୱାରା ଘରୋଇ ଡାକ୍ତରଖାନା ଏହି ଯୋଜନା ଅଧୀନରେ କରୋନା ଆକ୍ରାନ୍ତଙ୍କ ଉତ୍ତମ ଚିକିତ୍ସା କରିପାରିବ। ଏହି ପ୍ୟାକେଜରେ ରୁମ୍ ଭଡା, ଖାଦ୍ୟ, ଚେକ୍ ଅପ୍, ପରାମର୍ଶ ଦେୟ, ପାରାମେଡିକାଲ୍ ଫି ଇତ୍ୟାଦି ଅନ୍ତର୍ଭୁକ୍ତ।

ସୂଚନାଯୋଗ୍ୟ, ଅନେକ ଆକ୍ରାନ୍ତ ଅର୍ଥ ଅଭାବରୁ ଉତ୍ତମ ଚିକିତ୍ସା ପାଇ ପାରୁ ନାହାନ୍ତି। ତେଣୁ ଏଭଳି ସ୍ଥିତିରେ ଶିବରାଜ ସିଂ ସରକାର ରାଜ୍ୟବାସୀଙ୍କ ପାଇଁ ଏକ ବଡ଼ ଉପହାର ଦେଇଛନ୍ତି। ଆଉ ଏହାର ଲାଭ ସାଧାରଣ ଲୋକଙ୍କ ପାଖରୁ ମଧ୍ୟବିତ୍ତ ପରିବାର ଲୋକେ ପାଇବାକୁ ଯାଉଛନ୍ତି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।