କୋଭିଡ୍‌ ନିୟମ ଉଲ୍ଲଙ୍ଘନ କରି ଗିରଫ ହେଲେ ପପୁ ଯାଦବ

ପଟନା: ବିହାରର ପୂର୍ବତନ ସାଂସଦ ଓ ଜନ ଅଧିକାରୀ ପାର୍ଟିର ନେତା ପପୁ ଯାଦବଙ୍କୁ ପଟନାରେ ପୁଲିସ୍ ଗିରଫ କରିଛି । କୋଭିଡ୍ ନିୟମ ଉଲ୍ଲଙ୍ଘନ ମାମଲାରେ ଶନିବାର ପପୁ ଯାଦବଙ୍କ ବିରୋଧରେ ଅମନୌର ଥାନାରେ ଏଫଆଇଆର୍ ଦାୟର କରାଯାଇଥିଲା । ଖୋଦ୍ ପପୁ ଯାଦବ ଟ୍ୱିଟ୍ କରି ନିଜର ଗିରଫଦାରୀର ସୂଚନା ଦେଇଛନ୍ତି । ସେ ଟ୍ୱିଟ୍ କରି ଲେଖିଛନ୍ତି, ମୋତେ ପଟନାର ଗାନ୍ଧି ମଇଦାନ ଥାନାକୁ ନିଆଯାଇଛି ।

ଆଉଏକ ଟ୍ୱିଟରେ ସେ ଲେଖିଛନ୍ତି, କରୋନା କାଳରେ ଲୋକଙ୍କ ଜୀବନ ବଞ୍ଚାଇବା ପାଇଁ ନିଜ ଜୀବନକୁ ବାଜି ଲଗାଇବା ଯଦି ଅପରାଧ, ତାହେଲେ ହଁ ମୁଁ ଅପରାଧୀ । ପିଏମ୍ ସାହେବ, ସିଏମ୍ ସାହେବ ମୋତେ ଫାଶୀ ଦେଇ ଦିଅ, ନହେଲେ ଜେଲ୍ ପଠାଇ ଦିଅ । ମୁଁ ମୁଣ୍ଡ ନୁଆଁଇବି ନାହିଁ, ଅଟକିବି ନାହିଁ । ଲୋକଙ୍କୁ ବଞ୍ଚାଇବି । ବେଇମାନଙ୍କ ମୁଖା ଖୋଲିବା ଜାରି ରଖିବି ।

ଅମନୌରର ସିଏ କୋଭିଡ୍‌-୧୯ ଉଲ୍ଲଙ୍ଘନ କରିବା ମାମଲାରେ ଶନିବାର ଦିନ ପପୁ ଯାଦବଙ୍କ ବିରୋଧରେ ଏଫଆଇଆର୍ ଦାୟର କରିଥିଲେ । ପପୁଙ୍କ ବିରୋଧରେ ବିହାରରେ ଜାରି ରହିଥିବା ଲକଡାଉନର ଉଲ୍ଲଙ୍ଘନ କରିଥିବା ଅଭିଯୋଗ ରହିଛି । ମିଳିଥିବା ସୂଚନା ଅନୁସାରେ, ତାଙ୍କ ବିରୋଧରେ ସରକାରୀ କାମରେ ବାଧା ସୃଷ୍ଟି କରିବା ଏବଂ ଲକଡାଉନ୍ ନିୟମର ଉଲ୍ଲଙ୍ଘନ କରିବା ଭଳି ଅଭିଯୋଗ ରହିଛି ।

ଏହାସହ ମଧେପୁରା ସହ ଜଡିତ ଅନ୍ୟ କିଛି ମାମଲା ମଧ୍ୟ ରହିଛି । ପପୁ ଯାଦବ ବିନା ପାସରେ ମଙ୍ଗଳବାର ସକାଳେ ପିଏମସିଏଚର କୋଭିଡ୍ ୱାର୍ଡରେ ପଶି ଯାଇଥିଲେ। ଏହାସହ ସେ ନିଜ ଅଞ୍ଚଳ ମଧେପୁର ଯିବା ପାଇଁ ମଧ୍ୟ କାର୍ଯ୍ୟକ୍ରମ କରିଥିଲେ ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।