ମୁମ୍ବାଇ: କିସ୍ କରି ହଟହଟା ହେଲେ ଯୁବକ। ଟ୍ରେନ୍ ଭିତରେ ଜଣେ ଯୁବତୀଙ୍କୁ କିସ୍ କରିବା ଏବେ ଜଣେ ଯୁବକଙ୍କୁ ମହଙ୍ଗା ପଡିଛି। ତାଙ୍କୁ ଏଥିପାଇଁ ମିଳିଛି ଶାସ୍ତି। ଏପରିକି ତାଙ୍କୁ ଏଥିପାଇଁ ଯିବାକୁ ପଡିବ ଜେଲ୍। କୋର୍ଟ ତାଙ୍କୁ ଏକ ବର୍ଷ ପାଇଁ ଜେଲ୍ ଦଣ୍ଡାଦେଶ ଶୁଣାଇଛନ୍ତି। ଏଥିସହ ୧୦ ହଜାର ଟଙ୍କା ଜରିମାନା ମଧ୍ୟ ଦେବାକୁ ନିର୍ଦ୍ଦେଶ ଦେଇଛନ୍ତି।
ନିକଟରେ ମୁମ୍ବାଇର ଏକ ଅଦାଲତ ଏଭଳି ଦଣ୍ଡାଦେଶ ଶୁଣାଇଛନ୍ତି। ୩୭ ବର୍ଷୀୟ ଜଣେ ବ୍ୟବସାୟୀ ମୁମ୍ବାଇର ଲୋକାଲ ଟ୍ରେନ୍ରେ ଯାତ୍ରା କରିବା ବେଳେ ଜଣେ ଯୁବତୀଙ୍କୁ କିସ୍ କରିଦେଇଥିଲେ। ୨୦୧୫ରେ ଏହି ଘଟଣା ଘଟିଥିଲା। ଏନେଇ ଯୁବତୀ ଜଣକ ଥାନାରେ ଅଭିଯୋଗ କରିଥିଲେ। କଥା ଯାଇ କୋର୍ଟରେ ପହଞ୍ଚିଥିଲା। ଏହି ମାମଲାର ଶୁଣାଣି ଏବେ କୋର୍ଟ କରିଛନ୍ତି।
ଅଭିଯୁକ୍ତ ବ୍ୟବସାୟୀ କୋର୍ଟରେ ଯୁକ୍ତି ଦର୍ଶାଇଥିଲେ ଯେ ସେ ଉଦ୍ଦେଶ୍ୟମୂଳକ ଭାବେ ଯୁବତୀ ଜଣଙ୍କୁ କିସ୍ କରିନାହାଁନ୍ତି। ବରଂ ପାଖରେ ଠିଆ ହୋଇଥିବା ବ୍ୟକ୍ତି ତାଙ୍କୁ ଠେଲି ଦେଇଥିଲେ। ଏହା ପରେ ସେ ସାମ୍ନାରେ ବସିଥିବା ଯୁବତୀଙ୍କ ଉପରେ ପଡ଼ିଯାଇଥିଲେ ଏବଂ ତାଙ୍କ ଓଠ ଯୁବତୀଙ୍କ ଗାଲରେ ବାଜିଥିଲା। କିନ୍ତୁ କୋର୍ଟ ସମସ୍ତ ଯୁକ୍ତିକୁ ପ୍ରତ୍ୟାଖ୍ୟାନ କରି ଦଣ୍ଡ ଶୁଣାଇଛନ୍ତି।
ଟାଇମ୍ସ ଇଣ୍ଡିଆର ରିପୋର୍ଟ ମୁତାବକ, ୩୭ ବର୍ଷୀୟ କିରଣ ହୋନାବରଙ୍କୁ ମହାନଗର ନିଗମ ମାଜିଷ୍ଟ୍ରେଟ ଭି.ପି କେଦାର ଏହି ମାମଲାରେ ଦୋଷୀ ସାବ୍ୟସ୍ତ କରିଛନ୍ତି। ମାଜିଷ୍ଟ୍ରେଟ୍ କହିଛନ୍ତି ଯେ, ଏଫ୍ଆଇଆର୍ ଦର୍ଶାଉଛି ଯେ ଟ୍ରେନରେ ଚଢ଼ିବା ପରେ ଅଭିଯୁକ୍ତ ଯୁବତୀଙ୍କ ସାମ୍ନାରେ ବସି ତାଙ୍କ ଆଡକୁ ଚାହିଁ ରହିଥିଲା। ସେ କହିଛନ୍ତି ଯେ ମହିଳାମାନଙ୍କର ପାଖରେ ଅଣଭର୍ବାଲ୍ ସୂତ୍ରଗୁଡ଼ିକୁ ବୁଝିବା ଓ ଜାଣିବା ପାଇଁ ଅନ୍ତର୍ନିହିତ ଦକ୍ଷତା ରହିଛି। ତେଣୁ ଏହା କୁହାଯାଇପାରିବ ନାହିଁ ଯେ ଯୁବତୀ ଅଜଣାତରେ ଏହି ଅଭିଯୋଗ କରିଛନ୍ତି।
ରିପୋର୍ଟରେ କୁହାଯାଇଛି ଯେ ଯୁବତୀ ଏବଂ ତାଙ୍କ ସାଙ୍ଗମାନେ ସାକ୍ଷୀ ଥିଲେ। ଉଭୟ ସାକ୍ଷ୍ୟ ଦେଇଥିଲେ। ଏହା ବ୍ୟତୀତ ଅନ୍ୟ ଦୁଇଜଣ ମଧ୍ୟ ସାକ୍ଷ୍ୟ ଦେଇଛନ୍ତି। ସେ ଦେଖିଥିଲେ ଯେ ଯୁବତୀ ଜଣକ ଚିତ୍କାର କରିବା ପରେ ସାଥୀ ଯାତ୍ରୀମାନେ ଅଭିଯୁକ୍ତଙ୍କୁ ମାଡ ମାରିଥିଲେ। କୋର୍ଟ କହିଛନ୍ତି, 'ଏହା ପ୍ରତ୍ୟକ୍ଷ, ଠୋସ୍ ଏବଂ ସକରାତ୍ମକ ପ୍ରମାଣ ଦ୍ୱାରା ପ୍ରମାଣିତ ହୋଇଛି ଯେ ଅଭିଯୁକ୍ତ ଯୁବତୀଙ୍କ ଡାହାଣ ଗାଲକୁ ଚୁମ୍ବନ ଦେଇଛି।'
ଏହି ଘଟଣାରେ କୋର୍ଟ ବ୍ୟବସାୟୀଙ୍କୁ ଦୋଷୀ ସାବ୍ୟସ୍ତ କରିବା ସହ ୧୦ ହଜାର ଟଙ୍କା ଜରିମାନା ମଧ୍ୟ ଦେବାକୁ କହିଛନ୍ତି। ଯଦିଓ ଏହି ମାମଲାରେ ସର୍ବାଧିକ ଦଣ୍ଡ ପାଞ୍ଚ ବର୍ଷ ଜେଲ ରହିଛି, କିନ୍ତୁ କୋର୍ଟ ଉକ୍ତ ବ୍ୟକ୍ତିଙ୍କୁ ମାତ୍ର ଏକ ବର୍ଷ ଦଣ୍ଡାଦେଶରେ ଦଣ୍ଡିତ କରିଛନ୍ତି। ଅଭିଯୁକ୍ତଙ୍କ ବିରୋଧରେ ପୂର୍ବରୁ କୌଣସି ଅପରାଧିକ ମାମଲା ନାହିଁ ବୋଲି କୋର୍ଟ କହିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
