ଚଣ୍ଡିଗଡ: ଚା’ କରିବା ବେଳେ ଅଘଟଣ। ଫାଟିଗଲା ସିଲିଣ୍ଡର। ଆଖିବୁଜିଲେ ଗୋଟିଏ ପରିବାରର ୬ ଜଣ। ଆଜି ସକାଳୁ ହରିୟାଣାର ପାନିପଥ ଜିଲ୍ଲାରେ ଘଟିଛି ଏଭଳି କିଛି ଦୁଃଖଦ ଘଟଣା।
ଆଜି ସକାଳୁ ପାନିପତ ଜିଲ୍ଲାରେ ଚା’ ତିଆରି କରିବା ବେଳେ ସିଲିଣ୍ଡରରେ ହଠାତ୍ ନିଆଁ ଲାଗିଯାଇଥିଲା। ଏହାପରେ ବିସ୍ଫୋରଣ ଘଟିଥିଲା। ଏଥିରେ ଗୋଟିଏ ପରିବାରର ୬ ଜଣଙ୍କ ମୃତ୍ୟୁ ହୋଇଛି। ମୃତକଙ୍କ ମଧ୍ୟରେ ୪ ଜଣ ଛୋଟ ଛୁଆ ଅଛନ୍ତି।
ପୁଲିସ କହିବା ମୁତାବକ, ପରିବାର ଲୋକେ ସିଲିଣ୍ଡରରେ ନିଆଁ ଲାଗିବା ଦେଖି ଘରୁ ବାହାରିବା ପାଇଁ ଚେଷ୍ଟା କରିଥିଲେ କିନ୍ତୁ ଘରର କବାଟ ଖୋଲିନଥିଲା। ଏହି କାରଣରୁ ଗୋଟିଏ ପରିବାରର ୬ଜଣଙ୍କ ମୃତ୍ୟୁ ହୋଇଯାଇଛି। ଯେଉଁ ପରିବାର ସହ ଏହି ଦୁର୍ଘଟଣା ଘଟିଛି, ସେହି ପରିବାର ପାନିପଥରେ ଏକ ଭଡା ଘରେ ରହୁଥିଲେ।
ତେବେ ସିଲିଣ୍ଡରରେ କେମିତି ନିଆଁ ଲାଗିଲା ଏବେ ଯାଏଁ କୌଣସି ସଠିକ୍ ତଥ୍ୟ ଜଣାପଡିନାହିଁ। ପୁଲିସ୍ ଘଟଣା ସ୍ଥଳରେ ପହଞ୍ଚି ଘଟଣାର ଯାଞ୍ଚ ଜାରି ରଖିଛି।