ନୂଆଦିଲ୍ଲୀ: ବିଜେପିର ପଶ୍ଚିମବଙ୍ଗ ନେତା ଶୁଭେନ୍ଦୁ ଅଧିକାରୀଙ୍କ ପାଇଁ ଦେଶର ସଲିସିଟର ଜେନେରାଲ ତୁଷାର ମେହେଟା ଅଡ଼ୁଆରେ ପଡ଼ିଛନ୍ତି। ହଠାତ୍ ତାଙ୍କୁ ଭେଟିବା ପାଇଁ ଶୁଭେନ୍ଦୁ ଅଧିକାରୀ ଯାଇଥିବାରୁ ମମତା ବାନାର୍ଜୀଙ୍କ ଟିଏମସି ଏହାକୁ ବିରୋଧ କରିଛି। ଏପରି କି ଦଳର ୩ ଜଣ ସାଂସଦ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଚିଠି ଲେଖି ତୁଷାରଙ୍କ ବହିଷ୍କାର ଦାବି କରିଛନ୍ତି।
ଶୁଭେନ୍ଦୁଙ୍କ ନାଁରେ ଏକାଧିକ ଦୁର୍ନୀତି ଅଭିଯୋଗ ରହିଥିବା ବେଳେ ଏହାର ତଦନ୍ତ ସିବିଆଇ କରୁଛି। ସିବିଆଇ ପକ୍ଷରୁ ମାମଲା ଦେଶର ସଲିସିଟିର ଜେନେରାଲ ଭାବେ ତୁଷାର ମେହେଟା ଲଢ଼ୁଛନ୍ତି। ଏପରି ସ୍ଥିତିରେ ତାଙ୍କୁ ବ୍ୟକ୍ତିଗତ ଭାବେ ଭେଟିବାକୁ ଶୁଭେନ୍ଦୁ ଅଧିକାରୀ ପହଞ୍ଚିବା ଘଟଣାକୁ ଟିଏମସି ସହଜରେ ଗ୍ରହଣ କରିପାରି ନାହିଁ।
ତେବେ ତୁଷାର ମେହେଟା ନିଜ ପ୍ରତିକ୍ରିୟାରେ ଶୁଭେନ୍ଦୁଙ୍କୁ କୌଣସି ପ୍ରକାରର ଭେଟି ନାହାନ୍ତି ଓ ସେ ବିନା ନିମନ୍ତ୍ରଣରେ ଅଫିସରେ ପହଞ୍ଚିଥିଲେ ବୋଲି କହିଛନ୍ତି। ଟିଏମସି ସାଂସଦମାନେ ଲେଖିଥିବା ଚିଠିରେ କହିଛନ୍ତି, “ଅଧିକାରୀଙ୍କ ବିରୋଧରେ ଥିବା ଏକାଧିକ ଅପରାଧିକ ମାମଲାର ତଦନ୍ତ ସିବିଆଇ କରୁଛି।
ଏହିସବୁ ମାମଲାରେ ସିବିଆଇ ପକ୍ଷରୁ ତୁଷାର ମେହେଟା କୋର୍ଟରେ ଉପସ୍ଥିତ ରହୁଛନ୍ତି। ତେଣୁ ସେଭଳି ଜଣେ ବ୍ୟକ୍ତିଙ୍କୁ ଶ୍ରୀ ମହେଟା ଭେଟିବା ତାଙ୍କ ପଦର ନିରପେକ୍ଷତା ପ୍ରତି ପ୍ରଶ୍ନ ଉଠାଇଛି। ତେଣୁ ତାଙ୍କୁ ଦେଶର ସଲିସିଟର ଜେନେରାଲ ପଦରୁ ତୁରନ୍ତ ବିଦା କରାଯିବା ଉଚିତ।”
ଅନ୍ୟପକ୍ଷରେ ମେହେଟା କହିଛନ୍ତି, “ଶୁଭେନ୍ଦୁ ଅଧିକାରୀ ଗତକାଲି ଅପରାହ୍ନ ପ୍ରାୟ ୩ଟା ବେଳେ ମୋ ବାସଭବନ ସ୍ଥିତ ଅଫିସକୁ ଆସିଥିଲେ। ପୂର୍ବରୁ କୌଣସି ସୂଚନା ନ ଦେଇ ସେ ଏଠାକୁ ଆସିଥିଲେ। ପୂର୍ବ କାର୍ଯ୍ୟସୂଚୀ ଅନୁଯାୟୀ ମୁଁ ମୋ ଚ୍ୟାମ୍ବରରେ ମିଟିଂ କରୁଥିବାରୁ ମୋ କର୍ମଚାରୀମାନେ ତାଙ୍କୁ ଅପେକ୍ଷାଗୃହରେ ବସାଇବା ସହ ଚା’ ପିଇବାକୁ ଦେଇଥିଲେ।
ମୋ ବୈଠକ ସରିବା ପରେ ମୋ ପିଏ ମୋତେ ଅଧିକାରୀ ଭେଟିବାକୁ ଆସିଥିବା ସମ୍ପର୍କରେ ଖବର ଦେଇଥିଲେ। କିନ୍ତୁ ମୁଁ ତାଙ୍କୁ ଭେଟି ନ ପାରିବାର ଅକ୍ଷମତା ପ୍ରକାଶ କରିବା ସହ ଖବର ପିଏଙ୍କ ହାତରେ ଦେଇଥିଲି। ଏହାପରେ ସେ ମୋ ପିଏଙ୍କ ସହ କଥା ହୋଇ ମୋ ସହ ବିନା କୌଣସି ଭେଟରେ ଚାଲି ଯାଇଥିଲେ। ତେଣୁ ମୁଁ ଅଧିକାରୀଙ୍କ ସହ ବୈଠକ କରିଛି ବୋଲି ଏଠି ପ୍ରଶ୍ନ ଆସିବା ଠିକ୍ ନୁହେଁ।”
ଏହାକୁ ନେଇ ବିବାଦ ଧୀରେଧୀରେ ବଢ଼ିବାରେ ଲାଗିଛି।