ନୂଆଦିଲ୍ଲୀ: କରୋନା ମହାମାରୀ ଯୋଗୁଁ ସାରା ବିଶ୍ୱରେ ଶିଶୁ ଶ୍ରମିକ, ଶିଶୁ ଚାଲାଣ ଏବଂ ବେଠି ଶ୍ରମିକ ଆଗକୁ ବଢ଼ିବ। ଏଭଳି ଚିନ୍ତା ପ୍ରକଟ କରିଛନ୍ତି ନୋବେଲ ବିଜେତା କୌଳାଶ ସତ୍ୟାର୍ଥୀ। ଖବର ସରବରାହ ସଂସ୍ଥା ଆଇଏଏନଏସକୁ ସାକ୍ଷାତକାର ଦେଇ ସେ ଏଭଳି କିଛି କହିଛନ୍ତି।
ସତ୍ୟାର୍ଥୀ କହିଛନ୍ତି ଯେ କେତେକ ରାଜ୍ୟରେ ଭାରତର ଶ୍ରମ ଆଇନ ଦୁର୍ବଳ କରାଯାଇଛି। ଏହା ଦ୍ୱାରା ଶିଶୁ ଶ୍ରମିକର ବୃଦ୍ଧି ଘଟିବ। ଏହା ବ୍ୟତୀତ ଦେଶରେ ଦୀର୍ଘ ଦିନ ଧରି ସ୍କୁଲ ବନ୍ଦ ରହିବାରୁ ଅନେକ ପିଲା ଏବେ ବ୍ଯବସାୟରେ ସାମିଲ୍ ହୋଇଥିବା ସେ ଆଶଙ୍କା ପ୍ରକଟ କରିଛନ୍ତି।
ସେ କହିଛନ୍ତି, କୋଭିଡ୍ -19 ମହାମାରୀ ପୂର୍ବରୁ, ଦେଶ ଶିଶୁ ମାନଙ୍କ ସୁରକ୍ଷା ପ୍ରତି ଅଗ୍ରସର ହେଉଥିଲା। ହେଲେ ମହାମାରୀ ଯୋଗୁଁ ବର୍ତ୍ତମାନର ସାମାଜିକ ଅସମାନତା ଏବଂ ସାମାଜିକ ସୁରକ୍ଷାର ଅଭାବ ଦେଖାଦେଇଛି।
କରୋନା ପାଇଁ ସାରା ବିଶ୍ୱରେ ନେତାଙ୍କ ମଧ୍ୟରେ ଅସମାନ ପ୍ରତିକ୍ରିୟା ପ୍ରକାଶ ପାଇଛି। ଗତ କିଛି ଦଶନ୍ଧିର ବିକାଶକୁ ଫେରିବା ପାଇଁ ଆମକୁ ଅନେକ ବିପଦ ସାମ୍ନା କରିବାକୁ ହେବ। ବିପର୍ଯ୍ୟୟରେ ପିଲାମାନେ ସର୍ବାଧିକ ପ୍ରଭାବିତ ହୁଅନ୍ତି। ହେଲେ କରୋନା ବିପର୍ଯ୍ୟୟର ପ୍ରଭାବ ଟିକିଏ ଅଧିକ ରହିଛି। ସାରା ବିଶ୍ୱରେ ଶିଶୁ ଶ୍ରମିକ, ଶିଶୁ ଚାଲାଣ ଯଥେଷ୍ଟ ବୃଦ୍ଧି ହେବ। ପିଲାମାନଙ୍କ ପାଇଁ ଏବେ ଜଟିଳ ସମୟ। ଯଦି ଆମେ ବର୍ତ୍ତମାନ ପୁନରୁଦ୍ଧାର କରିବାରେ ବିଫଳ ହେବା, ତେବେ ଆମେ ଏକ ପିଢ଼ିକୁ ବିପଦ ଘେରକୁ ଠେଲିଦେବା।
ମହାମାରୀ ପ୍ରକୃତିର ତାଣ୍ଡବ। ଯଦି ଲକ୍ଷ ଲକ୍ଷ ପିଲା ଭୋକିଲା ରହନ୍ତି ଏବଂ ଲକ୍ଷ ଲକ୍ଷ ପିଲା ଶିକ୍ଷାରୁ ବଞ୍ଚିତ ହୁଅନ୍ତି, ତେବେ ସେମାନେ ଶିଶୁ ଶ୍ରମିକ ହୋଇଯିବେ ବୋଲି ସେ କହିଛନ୍ତି।
ମହାମାରୀ ସମୟରେ ପିଲାମାନଙ୍କୁ ସୁରକ୍ଷା ଦେବା ପାଇଁ କୌଣସି ସରକାର ଯଥେଷ୍ଟ ଉଦ୍ୟମ କରି ନାହାନ୍ତ ବୋଲି ସେ ଏହି ଅବସରରେ କହିଛନ୍ତି।
ଏବେ ସରକାରକୁ ନିଷ୍ପତ୍ତି ନେବାକୁ ପଡିବ। ବିଦ୍ୟାଳୟ ଖୋଲିବାର ନିଷ୍ପତ୍ତି ଏକ ସହଜ କାମ ନୁହେଁ, ବିଶେଷତଃ ଯେତେବେଳେ ଆମର ଗୋଟିଏ ପଟେ ପିଲାମାନଙ୍କର ସ୍ୱାସ୍ଥ୍ୟ ଏବଂ ଜୀବନ ପ୍ରତି ବିପଦ ଥାଏ ଏବଂ ଅନ୍ୟ ପଟେ ସେମାନଙ୍କ ଶିକ୍ଷାକୁ ପ୍ରତ୍ୟାଖ୍ୟାନ କରାଯାଏ।
ବିଦ୍ୟାଳୟ ବନ୍ଦ ହେବା ଦ୍ୱାରା ଶିଶୁ ଚାଲାଣର ଆଶଙ୍କା ବଢ଼ି ଯାଇଛି ଏବଂ ଏହା ସହିତ ମଧ୍ୟାହ୍ନ ଭୋଜନ ମଧ୍ୟ ବନ୍ଦ କରିଦେଇଛି। ଯାହା ସେମାନଙ୍କର ସ୍ୱାସ୍ଥ୍ୟ ଏବଂ ପୁଷ୍ଟିକର ପ୍ରଭାବକୁ ପ୍ରଭାବିତ କରିଛି। ବିଦ୍ୟାଳୟଗୁଡ଼ିକ ଖୋଲିବା ପାଇଁ ଭାରତ ଏକ ନିର୍ଦ୍ଦିଷ୍ଟ ରୋଡମ୍ୟାପ ପ୍ରସ୍ତୁତ କରିବା ଜରୁରୀ ବୋଲି ସେ କହିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
