ଶ୍ରୀନଗର: କଶ୍ମୀର କେଶରକୁ ଭୌଗୋଳିକ ସୂଚକ ଟ୍ୟାଗ୍ ବା ଜିଆଇ ଟ୍ୟାଗ୍ ମିଳିଛି। କେନ୍ଦ୍ର ସରକାର ଏହି ଜିଆଇ ଟ୍ୟାଗର ପ୍ରମାଣପତ୍ର ପ୍ରଦାନ କରିଛନ୍ତି। ଲେଫ୍ଟନାଣ୍ଟ ଗଭର୍ଣ୍ଣର ଜିସି ମୁର୍ମୁ କହିଛନ୍ତି ଯେ, ଏହା କଶ୍ମୀରୀଙ୍କ ପାଇଁ ଐତିହାସିକ ଦିନ।
ଜଣେ ଅଧିକାରୀ କହିଛନ୍ତି, ଜିଆଇ ସାର୍ଟିଫିକେଟ୍ ପରେ ନକଲି କେଶରର ବିକ୍ରି ଉପରେ ରୋକ୍ ଲାଗିବ। ଏଯାବତ ୨୫୦୦ ହେକ୍ଟର କ୍ଷେତ୍ରକୁ ନବୀକରଣ କରାଯାଇଛି ଏବଂ ଚଳିତ ଋତୁରେ ଅଧିକରୁ ଅଧିକ କେଶର ଉତ୍ପାଦନ ହେବ ବୋଲି ଆଶା ରହିଛି।
ଜମ୍ମୁ କଶ୍ମୀରର ଏଲଜି କହିଛନ୍ତି, କଶ୍ମୀର ଉପତ୍ୟକାରେ ଜନ୍ମ ହୋଇଥିବା କେସର ବିଶ୍ୱ ମାନଚିତ୍ରରେ ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିବ। ସେ ଆହୁରି ମଧ୍ୟ କହିଛନ୍ତି ଯେ ଜିଆଇ ଟ୍ୟାଗ୍ ସହିତ କଶ୍ମୀର କେଶର ରପ୍ତାନୀ ବଜାରରେ ଅଧିକ ପ୍ରତିଷ୍ଠିତ ହେବ ଏବଂ ଚାଷୀଙ୍କୁ ଏହାର ସର୍ବୋତ୍ତମ ମୂଲ୍ୟ ମିଳିବାରେ ସହାୟକ ହେବ।
ସୂଚନାଯୋଗ୍ୟ, କଶ୍ମୀରର ଏଲଜି ଭାବେ ଦାୟିତ୍ୱ ଗ୍ରହଣ କରିବା ପରେ ମୁର୍ମୁ କେଶରକୁ ଜିଆଇ ଟ୍ୟାଗ ମିଳିବା ନେଇ ବ୍ୟକ୍ତିଗତ ଭାବରେ ଚେଷ୍ଟା କରୁଥିଲେ।