ଭୋପାଳ: ରାଜସ୍ଥାନରେ ଶାସକ ଦଳ କଂଗ୍ରେସର ସ୍ଥିତି ସଙ୍କଟରେ ଥିବା ବେଳେ ମଧ୍ୟପ୍ରଦେଶର ଆଉ ଜଣେ କଂଗ୍ରେସ ବିଧାୟକ ଇସ୍ତଫା ଦେଇଛନ୍ତି। ମାନ୍ଧାତା ନିର୍ବାଚନ ମଣ୍ଡଳୀର ବିଧାୟକ ନାରାୟଣ ପଟେଲ ବିଧାୟକ ପଦବୀରୁ ଇସ୍ତଫା ଦେଇଛନ୍ତି। ଅସ୍ଥାୟୀ ବାଚସ୍ପତି ରାମେଶ୍ୱର ଶର୍ମାଙ୍କୁ ବିଧାୟକ ଜଣଙ୍କ ଇସ୍ତଫା ପତ୍ର ପଠାଇଛନ୍ତି। ନାରାୟଣ ପଟେଲ ଇସ୍ତଫା ଦେବା ପଛର କାରଣ ବିଜେପିକୁ ଯିବେ ବୋଲି ଚର୍ଚ୍ଚା ହେଉଛି।
ସୂଚନାଯୋଗ୍ୟ, ଏହାର କିଛି ଦିନ ପୂର୍ବରୁ ବୁରାହାନପୁରର ନେପାନଗରର ବିଧାୟକ ସୁମିତ୍ରା ଦେବୀ କସଡେକର ଇସ୍ତଫା ଦେଇଥିଲେ। ବିଧାୟକ ପଦ ଏବଂ ଦଳରୁ ଇସ୍ତଫା ଦେବା ପରେ ସୁମିତ୍ରା ବିଜେପିରେ ସାମିଲ୍ ହୋଇଛନ୍ତି।
ମାର୍ଚ୍ଚରେ ଜ୍ୟୋତିରାଦିତ୍ୟ ସିନ୍ଧିଆ କଂଗ୍ରେସ ଛାଡ଼ି ବିଜେପିରେ ମିଶିଛନ୍ତି। ଏହାପରେ ତାଙ୍କ ସମର୍ଥିତ ବିଧାୟକ ଇସ୍ତଫା ଦେବା ପରେ ରାଜ୍ୟରେ କମଲନାଥ ସରକାରର ପତନ ଘଟିଛି। ଏହାପରେ କଂଗ୍ରେସର ମଧ୍ୟ ଗୋଟିଏ ପରେ ଗୋଟିଏ ବିଧାୟକ ଇସ୍ତଫା ଦେଇଛନ୍ତି। ଏବେ ୨୬ ବିଧାନସଭା ଆସନ ପାଇଁ ଉପନିର୍ବାଚନ ହେବ ବୋଲି ଜଣାପଡ଼ିଛି।