ରାଞ୍ଚି: ଭାରତୀୟ କ୍ରିକେଟର ତଥା ପୂର୍ବତନ ଟିମ୍ ଇଣ୍ଡିଆ ଅଧିନାୟକ ମହେନ୍ଦ୍ର ସିଂହ ଧୋନି ଏବେ ଝାଡ଼ଖଣ୍ଡରେ ସର୍ବାଧିକ ଟିକସ୍ଦାତା ହୋଇଛନ୍ତି। ସେ ୨୦୧୭-୧୮ରେ ୧୨.୧୭ କୋଟି ଟଙ୍କା ଟିକସ ଦେଇଛନ୍ତି। ୨୦୧୬-୧୭ ଆର୍ଥିକ ବର୍ଷ ତୁଳନାରେ ଧୋନି ଅଧିକ ୧.୨୪ କୋଟି ଟଙ୍କା ଦେଇଛନ୍ତି। ଅର୍ଥାତ ଧୋନିଙ୍କ ଆୟ ବଢ଼ିଛି ବୋଲି ଜଣେ ଆୟକର ଅଧିକାରୀ କହିଛନ୍ତି। ସେ କହିଛନ୍ତି, ଧୋନି ୨୦୧୬-୧୭ ଆର୍ଥିକ ବର୍ଷରେ ୧୦.୯୩ କୋଟି ଟଙ୍କା ଟିକସ୍ ଦେଇଥିଲେ। କିନ୍ତୁ ସେ ସର୍ବାଧିକ ଟିକସଦାତା ହୋଇ ନଥିଲେ। ତେବେ ଅଧିକାରୀ ଜଣଙ୍କ ୨୦୧୬-୧୭ରେ କିଏ ସର୍ବାଧିକ ଟିକସଦାତା ଥିଲେ, ତାଙ୍କ ନାଁ କହିବାକୁ ମନା କରିଦେଇଛନ୍ତି।
ଉଲ୍ଲେଖଯୋଗ୍ୟ, ଇଂଲଣ୍ଡ ବିପକ୍ଷ ଦିନିକିଆ ଓ ଟି-୨୦ରେ ଧୋନି ଭଲ ବ୍ୟାଟିଂ କରି ନଥିବାରୁ, ତାକୁ ସମାଲୋଚନାର ଶରବ୍ୟ ହେବାକୁ ପଡ଼ିଥିଲା। ସେ ୩ଟି ଟି-୨୦ରେ ମାତ୍ର ୩୨ ରନ୍ ଓ ସମାନ ସଂଖ୍ୟକ ଦିନିକିଆରେ ମାତ୍ର ୭୯ ରନ୍ କରିଥିଲେ। ଧୋନିଙ୍କ ଧିମା ବ୍ୟାଟିଂ ପାଇଁ ଭାରତ ଇଂଲଣ୍ଡଠାରୁ ୨-୧ରେ ଦିନିକିଆ ସିରିଜ୍ ହାରିଥିଲା ବୋଲି କିଛି ସମାଲୋଚକ କହିଥିଲେ। ମ୍ୟାଚ୍ ଶେଷରେ ଧୋନି ଅମ୍ପାୟରଙ୍କଠାରୁ ବଲ୍ ମାଗି ରଖିବାରୁ ସେ ଅବସର ନେବେ ବୋଲି ମଧ୍ୟ ଚର୍ଚ୍ଚା ହୋଇଥିଲା।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
