ନୂଆଦିଲ୍ଲୀ: ସିବିଆଇ ମଧ୍ୟରେ ସୃଷ୍ଟି ହୋଇଥିବା ବିବାଦ ବିସ୍ଫୋରକ ରୂପ ଧାରଣ କରିଛି। ସିବିଆଇ ମୁଖ୍ୟ ପଦରୁ ଆଲୋକ ବର୍ମା ବିଦା ହେବା ପରେ ଓଡ଼ିଆ କ୍ୟାଡର ଆଇପିଏସ୍ ଏମ୍ ନାଗେଶ୍ୱର ରାଓଙ୍କୁ ସିବିଆଇର ଅନ୍ତରୀଣ ମୁଖ୍ୟ କରାଯାଇଛି।
ତେବେ ସେ ଦାୟିତ୍ୱ ନେଉ ନେଉ ପୂର୍ବତନ ସିବିଆଇ ମୁଖ୍ୟ ଆଲୋକ ବର୍ମା ଯେଉଁ ସବୁ ନିର୍ଦ୍ଦେଶ ଦେଇଥିଲେ, ସେଗୁଡ଼ିକୁ ବଦଳାଇ ଦେଇଛନ୍ତି।
ଦାୟିତ୍ୱ ନେବା ପରେ ସିବିଆଇ ମୁଖ୍ୟ ଭାବେ ଆଲୋକ ବର୍ମା ଯେଉଁ ସବୁ ବଦଳି ନିଷ୍ପତ୍ତି ନେଇଥିଲେ, ତା’ ଉପରେ ଶ୍ରୀ ରାଓ ରୋକ ଲଗାଇଛନ୍ତି। ବୁଧବାର ଶ୍ରୀ ବର୍ମା ସିବିଆଇ ମୁଖ୍ୟ ଭାବେ ଦାୟିତ୍ୱ ଗ୍ରହଣ କରିବା ପରେ ୧୧ଟି ବଦଳି ଆଦେଶ ଏବଂ ୫ଟି ନୂଆ ନିର୍ଦ୍ଦେଶନାମା ଜାରି କରିଥିଲେ।
ବିଶେଷ କରି ଶ୍ରୀ ବର୍ମାଙ୍କ ଘନିଷ୍ଠ ଓ ତାଙ୍କ ଡେପୁଟି ରାକେଶ ଆସ୍ଥାନାଙ୍କ ବିରୋଧରେ ତଦନ୍ତ କରୁଥିବା ଅଫିସରମାନଙ୍କ ବଦଳି କରି ମୁଖ୍ୟାଳୟକୁ ଆଣିଥିଲେ। ହେଲେ ଶ୍ରୀ ରାଓ ଏହା ଉପରେ ରୋକ ଲଗାଇଛନ୍ତି।