ଜୟପୁର: ରାଜସ୍ଥାନରେ ସୃଷ୍ଟି ହୋଇଥିବା ରାଜନୀତିକ ହଟଚମଟରେ ଶେଷରେ ପୂର୍ଣ୍ଣଚ୍ଛେଦ ପଡ଼ିଛି। ଦଳ ଓ ସରକାରଙ୍କ ବିରୋଧରେ ବିଦ୍ରୋହ ଘୋଷଣା କରିଥିବା ସଚିନ ପାଇଲଟ ଶେଷରେ ମୁଖ୍ୟମନ୍ତ୍ରୀ ଅଶୋକ ଗେହଲଟଙ୍କ ଘରେ ପହଞ୍ଚିଛନ୍ତି। ସଚିନ ଓ ତାଙ୍କ ସମର୍ଥିତ ବିଧାୟକମାନେ ପହଞ୍ଚିବା ପରେ ଗେହଲଟ ହିଁ ସମସ୍ତଙ୍କୁ ସ୍ୱାଗତ କରିଥିଲେ।
ବିଶେଷ କରି ସଚିନଙ୍କୁ ବିବାଦ ପରେ ଗେହଲଟ କେମିତି ସ୍ୱାଗତ କରୁଛନ୍ତି, ତା’ ଉପରେ ସମସ୍ତଙ୍କ ନଜର ଥିଲା। ସମସ୍ତଙ୍କୁ ଜଳକା କରି ସବୁ ରାଗ ଭୁଲି ଗେହଲଟ ଓ ପାଇଲଟ ହାତ ମିଳାଇଛନ୍ତି। ଏହାର ଫଟୋ ମଧ୍ୟ ସାମ୍ନାକୁ ଆସିଛି। ଉଭୟ ବେଶ ଖୁସି ଥିବା ଭଳି ଦେଖିବାକୁ ମିଳୁଛି। ଏହି ସମୟରେ କେସି ଭେନୁଗୋପାଲ ମଧ୍ୟ ଉପସ୍ଥିତ ରହିଥିଲେ।
ଅନ୍ୟପକ୍ଷରେ ଆସନ୍ତାକାଲି ରାଜସ୍ଥାନ ବିଧାନସଭା ଅଧିବେଶନ ବସିବ। ଏଥିପାଇଁ ଆଜି କଂଗ୍ରେସ ବିଧାୟକ ଦଳ ବୈଠକ ଡାକିଥିଲା। ପୂର୍ବ ଯୋଜନା ଅନୁଯାୟୀ ସମସ୍ତ ବିଧାୟକଙ୍କ ସଚିନ ପାଇଲଟ ମଧ୍ୟ ଗେହଲଟଙ୍କ ଘରେ ପହଞ୍ଚିଥିଲେ। ଆସନ୍ତାକାଲି ଦଳର ରଣନୀତି କ’ଣ ହେବ, ସେ ଉପରେ ବୈଠକରେ ଆଲୋଚନା ହୋଇଛି।
ସେହିପରି ଦଳ ବିରୋଧୀ କାମ ପାଇଁ ବିଧାୟକ ବନୱର ଲାଲ ଶର୍ମା ଓ ବିଶଭେନ୍ଦର ସିଂହଙ୍କ ଉପରେ କଂଗ୍ରେସ ଲାଗୁ କାରିଥିବା ନିଲମ୍ବନ ଆଦେଶକୁ ଆଜି ପ୍ରତ୍ୟାହାର କରି ନେଇଛି। ଏହି ଦୁଇ ବିଧାୟକ ସଚିନ ପାଇଲଟଙ୍କ ଘନିଷ୍ଠ। ଉଭୟ ଆଜି କଂଗ୍ରେସ ବିଧାୟକ ଦଳ ବୈଠକରେ ଉପସ୍ଥିତ ରହିଥିଲେ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।