ନୂଆଦିଲ୍ଲୀ: ରାଜସ୍ଥାନ ସରକାର ଏବଂ ବିଦ୍ରୋହୀ କଂଗ୍ରେସ ବିଧାୟକଙ୍କ ମଧ୍ୟରେ ଚାଲିଥିବା ବିବାଦ ଏବେ ସୁପ୍ରିମକୋର୍ଟରେ ପହଞ୍ଚିଛି। ବିଧାୟକଙ୍କୁ ଅଯୋଗ୍ୟ ନିଷ୍ପତ୍ତି ବାବଦରେ ରାଜସ୍ଥାନ ହାଇକୋର୍ଟ ଦେଇଥିବା ରାୟକୁ ଚ୍ୟାଲେଞ୍ଜ କରି ବାଚସ୍ପତି ସିପି ଜୋଶୀ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି। ତୁରନ୍ତ ଶୁଣାଣି କରିବାକୁ ବାଚସ୍ପତି ଦାବି କରିଥିଲେ, ହେଲେ ସୁପ୍ରିମକୋର୍ଟ ଏଭଳି ଶୁଣାଣି କରିବାକୁ ରାଜି ହୋଇ ନାହାନ୍ତି।
ବାଚସ୍ପତି ସିପି ଜୋଶୀ କହିଛନ୍ତି, ସୁପ୍ରିମକୋର୍ଟଙ୍କ ଗାଇଡ ଲାଇନକୁ ହାଇକୋର୍ଟ ଉଲ୍ଲଂଘନ କରିଛନ୍ତି। ବାଚସ୍ପତି ବିଧାୟକଙ୍କୁ ଅଯୋଗ୍ୟ ଘୋଷଣା କରିପାରିବାର କ୍ଷମତା ରହିଛି ବୋଲି ପ୍ରେସ କନଫରେନସ କରି କହିଛନ୍ତି ବାଚସ୍ପତି। ସୁପ୍ରିମକୋର୍ଟରେ ରାଜସ୍ଥାନ ବାଚସ୍ପତିଙ୍କ ପାଇଁ ଆଇନଜୀବୀ ସୁନୀଲ ଫର୍ଣ୍ଣାଡିଜ ମାମଲା ଦାୟର କରିଛନ୍ତି। ସେହିପରି ସିପି ଜୋଶୀଙ୍କ ଓକିଲ ଭାବରେ କପିଲ ଶିବଲ ପକ୍ଷ ରଖିଛନ୍ତି। କପିଲ ଶିବଲ ଆଜି ଏହି ମାମଲାର ଶୁଣାଣି କରିବାକୁ ନିବେଦନ କରିଥିଲେ। ହେଲେ କୋର୍ଟ ଆଜି ଶୁଣାଣି କରିବେ ନାହିଁ ବୋଲି କହିଛନ୍ତି।
ସିପି ଜୋଶୀ କହିଛନ୍ତି, ବିଧାୟକଙ୍କୁ ଅଯୋଗ୍ୟ ଘୋଷଣା କରିବାର ଅଧିକାର ବାଚସ୍ପତିଙ୍କ ପାଖରେ ରହିଛି। ତେଣୁ କଂଗ୍ରେସର ବିଦ୍ରୋହୀ ବିଧାୟକଙ୍କୁ ନୋଟିସ ଜାରି କରାଯାଇଛି ବୋଲି ସିପି ଜୋଶୀ କହିଛନ୍ତି। ହେଲେ ରାଜସ୍ଥାନ ହାଇକୋର୍ଟ ଜୁନ୍ 24 ଯାଏ ବାଚସ୍ପତି ବିଦ୍ରୋହୀ ବିଧାୟକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିପାରିବେ ନାହିଁ ବୋଲି କହିଛନ୍ତି। ଏହାପରେ ରାଜସ୍ଥାନ ସଚିବାଳୟ ଉଚ୍ଚନ୍ୟାୟଳୟଙ୍କ ନିଷ୍ପତ୍ତିକୁ ସୁପ୍ରିମକୋର୍ଟରେ ଚ୍ୟାଲେଞ୍ଜ କରିଛନ୍ତି।