ଭୋପାଳ:ମଧ୍ୟପ୍ରଦେଶରେ କଂଗ୍ରେସ ପକ୍ଷରୁ ବରିଷ୍ଠ ନେତା କମଲ୍ନାଥଙ୍କୁ ମୁଖ୍ୟମନ୍ତ୍ରୀଭାବେ ଘୋଷଣା କରାଯାଇଛି। ସେ ଆସନ୍ତାକାଲି ମୁଖ୍ୟମନ୍ତ୍ରୀ ଭାବେ ପରେଡ ଗ୍ରାଉଣ୍ଡରେ ଦିନ ଦେଢଟାରେ ଶପଥ ନେବେ। ହେଲେ ତା’ପୂର୍ବରୁ ପଦକୁ ଦଳୀୟ କନ୍ଦଳ ପଦାକୁ ଆସିଛି। ସିଏମ ପଦକୁ ନେଇ ଜ୍ୟୋତିରାଦିତ୍ୟ ସିନ୍ଧିଆ ବଡ଼ ଦାବିଦାର ଥିବା ବେଳେ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧି ତାଙ୍କୁ ଉପରେ ଉପରେ ମନାଇଦେଇଥିଲେ ମଧ୍ୟ ସେଥିରେ ତାଙ୍କ ମନ ବୁଝିନାହିଁ।
ଏବେ ଏକ ଭିଡିଓ ସାମ୍ନାକୁ ଆସିଛି। ଯେଉଁଥିରେ ସିନ୍ଧିଆଙ୍କ କିଛି ସମର୍ଥକ ସିନ୍ଧିଆଙ୍କୁ ଘେରି ରହିଛନ୍ତି। ଆଉ ସେମାନେ ତାଙ୍କୁ ଉପ ମୁଖ୍ୟମନ୍ତ୍ରୀ ଓ ପ୍ରଦେଶ କଂଗ୍ରେସ ଅଧ୍ୟକ୍ଷ କରାଯାଉ ବୋଲି ଦାବି କରୁଛନ୍ତି। ସେହି ସମର୍ଥକଙ୍କ ମଧ୍ୟରେ ଚମ୍ବଲ ଏବଂ ଗ୍ୱାଲିଅରର ୧୨ ଜଣ କଂଗ୍ରେସ ବିଧାୟକ ଥିବା ଜଣାପଡ଼ିଛି। ସିନ୍ଧିଆଙ୍କ ସମର୍ଥକଙ୍କ କହିବା ଅନୁଯାୟୀ ଯଦି ରାଜସ୍ଥାନରେ ସଚିନ୍ ପାଇଲଟଙ୍କୁ ଉପମୁଖ୍ୟମନ୍ତ୍ରୀ କରାଯାଇପାରୁଛି ତେବେ ସେହି ଫର୍ମୁଲା ମଧ୍ୟପ୍ରଦେଶରେ କାହିଁକି ପ୍ରୟୋଗ କରାଯାଇପାରିବ ନାହିଁ ? ତେବେ ଜ୍ୟୋତିରାଦିତ୍ୟ ସିନ୍ଧଆ ତାଙ୍କ ସମର୍ଥକମାନଙ୍କୁ ବୁଝାଇବାକୁ ଚେଷ୍ଟା କରୁଥିବା ଜଣାପଡ଼ିଛି।
Around 12 cong MLA’s at @JM_Scindia ‘s residence demanding Deputy CM post and State presidentship for Scindia pic.twitter.com/gQcJu7VReE
— Saurabh shukla (@Saurabh_Ndtv) December 16, 2018
ସୂଚନାଯୋଗ୍ୟ, ନିର୍ବାଚନ ପୂର୍ବରୁ ମଧ୍ୟପ୍ରଦେଶ କଂଗ୍ରେସରେ କାହାକୁ ମୁଖ୍ୟମନ୍ତ୍ରୀ ପ୍ରାର୍ଥୀଭାବେ ଘୋଷଣା କରାଯାଇ ନଥିଲା। କାରଣ ଏହି ପଦକୁ ନେଇ ଗୋଷ୍ଟୀ କନ୍ଦଳ ବଢ଼ିବାର ଆଶଙ୍କା ଥିଲା। ଯଦିଓ ନିର୍ବାଚନ ସମୟରେ ସଙ୍କଟକୁ ଟାଳିବାରେ ଦଳ ସମର୍ଥନ ହୋଇଥିଲା ଏବେ ନିର୍ବାଚନ ସରିବା ପରେ ପୁଣି ସେହି ସମସ୍ୟା ଅଡ଼ୁଆ ସୃଷ୍ଟି କରିଛି। ଯଦି ଏମିତି ପରିସ୍ଥିତି ଜାରି ରହେ ତେବେ ମଧ୍ୟପ୍ରଦେଶରେ ସରକାର ଚାଲିବା ମୁସ୍କିଲ ହୋଇପଡ଼ିବ।
ମଧ୍ୟପ୍ରଦେଶର ୨୩୦ଟି ବିଧାନସଭା ଆସନରୁ କଂଗ୍ରେସକୁ ୧୧୪ଟି ଆସନ ମିଳିଥିବା ବେଳେ ବିଜେପିକୁ ୧୦୯ଟି ଆସନ ମିଳିଥିଲା। ଏଠାରେ ସରକାର ଗଠନ ପାଇଁ ୧୧୬ଟି ସିଟ୍ ଆବଶ୍ୟକ ଥିଲା। ତେବେ ଏଠାରେ କଂଗ୍ରେସକୁ ବିଏସ୍ପି ସମର୍ଥନ ଦେବ ବୋଲି ଘୋଷଣା କରିଥଲା। ତେଣୁ ଏଠାରେ କଂଗ୍ରେସ ସରକାର ଗଠନ କରିପାରିଛି। ହେଲେ ଯଦି ସିଏମ ପଦକୁ ନେଇ ଗୋଷ୍ଟୀ କନ୍ଦଳ ନ ଥମେ ତେବେ କଂଗ୍ରେସ ହାତରୁ ଶାସନଭାର ଚାଲିଯାଇପାରେ ବୋଲି ଚର୍ଚ୍ଚା ହେଉଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
