ଜାକର୍ତ୍ତା: ରବିବାର ରାତିରେ ଇଣ୍ଡୋନେସିଆରେ ୬.୯ ତୀବ୍ରତାର ଭୂମିକମ୍ପ ଅନୁଭୂତ ହୋଇଛି। ଫଳରେ କର୍ତ୍ତୃପକ୍ଷ ସୁନାମି ପାଇଁ ଲୋକଙ୍କୁ ସତର୍କ କରିବା ସହ ସେମାନଙ୍କୁ ସୁରକ୍ଷିତ ସ୍ଥାନକୁ ନେବା ଆରମ୍ଭ କରିଛନ୍ତି। ମୋଲୁକ୍କା ଉପକୂଳର ଉତ୍ତର ସୁଲାୱେସି ଏବଂ ଉତ୍ତର ମାଲୁକୁ ମଧ୍ୟରେ ଏହା ସୃଷ୍ଟି ହୋଇଥିବା କୁହାଯାଉଛି। ଇଣ୍ଡୋନେସିଆର ଭୂତତ୍ତ୍ୱ ସଂସ୍ଥା ଉପକୂଳବାସୀଙ୍କ ପାଇଁ ସତର୍କ ସୂଚନା ଜାରି କରିଛନ୍ତି।
ଧନଜୀବନ ହାନି ବା ଅନ୍ୟ କ୍ଷୟକ୍ଷତି ବାବଦରେ ଏ ପର୍ଯ୍ୟନ୍ତ ଜଣାପଡ଼ିନାହିଁ। ଜଣେ ସ୍ଥାନୀୟ ବାସିନ୍ଦା ବୁଡି ନର୍ଜିଆଣ୍ଟୋଙ୍କ କହିବା ଅନୁଯାୟୀ, ସେ ଶୋଇବାକୁ ଯାଉଥିବା ବେଳେ ହଠାତ ଝରକା ହଲିବାକୁ ଲାଗିଲା। ଭୟରେ ସେ ବାହାରକୁ ଦୌଡ଼ିଥିଲେ ଏବଂ ତାଙ୍କ ପଡ଼ୋଶୀମାନେ ମଧ୍ୟ ଭୟଭୀତ ହୋଇ ବାହାରକୁ ଧାଇଁଥିଲେ ବୋଲି ସେ କହିଛନ୍ତି। ଏହି ଭୂମିକମ୍ପ ବାବଦରେ ସୂଚନା ଦେଇଥିବା ଆମେରିକା ଜିଓଲୋଜିକାଲ ସର୍ଭେ ସଂସ୍ଥା ପକ୍ଷରୁ କୁହାଯାଇଛି, ଦୁର୍ବଳ ଏବଂ ତ୍ରୁଟିପୂର୍ଣ୍ଣ ଭାବେ ନିର୍ମିତ କୋଠା ଏହାଦ୍ୱାରା ପ୍ରଭାବିତ ହୋଇଥିବା ଆଶଙ୍କା କରାଯାଉଛି।