ବାଗଦାଦ: ଇରାକ୍ରେ ସ୍ଥିତି ଅଣାୟତ। ଦେଖାଦେଇଛି ଅରାଜକତା ସ୍ଥିତି। ଇରାକର ପ୍ରଭାବଶାଳୀ ସିୟା ଧର୍ମଗୁରୁ ମୁକ୍ତଦା-ଅଲ୍-ସଦର ସୋମବାର ରାଜନୀତିରୁ ସନ୍ନ୍ୟାସ ନେବେ ବୋଲି ଘୋଷଣା କରିବା ପରେ ପ୍ରବଳ ଉତ୍ତେଜନା ଦେଖାଦେଇଛି। ଅଲ୍-ସଦରରଙ୍କ ସମର୍ଥକ ଓ ଇରାନ୍ ସମର୍ଥିତ ଲୋକଙ୍କ ମଧ୍ୟରେ ତୀବ୍ର ସଙ୍ଘର୍ଷ ଘଟିଛି। ଏଥିରେ ୧୫ଜଣ ବିକ୍ଷୋଭକାରୀଙ୍କ ମୃତ୍ୟୁ ଘଟିଥିବା ବେଳେ ୧୦ରୁ ଅଧିକ ଲୋକେ ଗୁରୁତର ଆହତ ହୋଇଛନ୍ତି।
ଭିଡ଼ ଭିତରେ ବିକ୍ଷୋଭକାରୀମାନେ ରାଷ୍ଟ୍ରପତି ଭବନ ଓ ସରକାରୀ ଭବନ ଉପରେ ମଧ୍ୟ ଆକ୍ରମଣ କରିଛନ୍ତି। ତେବେ ଆମେରିକା ଦୂତାବାସର କର୍ମଚାରୀଙ୍କୁ ହେଲିକପ୍ଟର ଜରିଆରେ ଗ୍ରୀନ୍ ଜୋନରୁ ବାହାରକୁ ନିଆଯାଇଛି। ବିକ୍ଷୋଭକାରୀଙ୍କୁ କାବୁ କରିବା ପାଇଁ ସୁରକ୍ଷାକର୍ମୀ ଟିୟର ଲୁହ ବୁହା ଗ୍ୟାସ୍ ବ୍ୟବହାର କରିଥିଲେ। କିଛି ବିକ୍ଷୋଭକାରୀ ରାଷ୍ଟ୍ରପତି ଭବନରେ ଥିବା ହଲ୍ ଭିରତକୁ ପଶିଯାଇଥିଲେ ଏବଂ ସେଠାରେ ଥିବା ସୁଇମିଂ ପୁଲରେ ଗାଧୋଇ ଥିଲେ। ସେନା ଅଲ୍-ସଦରଙ୍କ ସମର୍ଥକଙ୍କୁ ସରକାରୀ ଭବନରୁ ତୁରନ୍ତ ହଟିବାକୁ ଓ ଶାନ୍ତି ବଜାୟ ରଖିବାକୁ ଅପିଲ୍ କରିଛି। ଏଥିସହ ବିକ୍ଷୋଭକୁ ଦୃଷ୍ଟିରେ ରଖି କର୍ଫ୍ୟୁ ଜାରି କରାଯାଇଛି।
ଅଲ୍-ସଦର୍ଙ୍କ ସନ୍ନ୍ୟାସ ଘୋଷଣା ଦେଶରେ ପ୍ରଥମ ଘଟଣା ନୁହେଁ। ପୂର୍ବରୁ ମଧ୍ୟ ସେ ଏଭଳି ଘୋଷଣା କରିସାରିଛନ୍ତି। ବର୍ତ୍ତମାନର ବିବାଦ ଭିତରେ ଅଲ୍-ସଦରଙ୍କ ଏହି ନିଷ୍ପତ୍ତି ପ୍ରତିଦ୍ୱନ୍ଦ୍ୱୀଙ୍କ ବିରୋଧରେ ଆଗୁଆ ରହିବାର ଆଉ ଏକ ପ୍ରୟାସ ବୋଲି ଅନେକେ ମତ ଦେଇଛନ୍ତି। ତେବେ ଏଥର ତାଙ୍କର ଏହି ଘୋଷଣା ଦେଶର ସ୍ଥିତିକୁ ଆହୁରି ଖରାପ କରିବ ବୋଲି କେତେକ ଆଶଙ୍କା କରିଛନ୍ତି।
ଇରାକ୍ରେ ଗତ ୧୦ ମାସ ହେବ କୌଣସି ସ୍ଥାୟୀ ପ୍ରଧାନମନ୍ତ୍ରୀ ନାହାନ୍ତି। କୌଣସି ମନ୍ତ୍ରିମଣ୍ଡଳ କିମ୍ବା ସରକାର ମଧ୍ୟ ନାହିଁ। ଏହି କାରଣରୁ ରାଜନୈତିକ ଅରାଜକତାର ପରିସ୍ଥିତି ଦେଖାଦେଇଛି। ଅର୍ଥାତ୍ ଶ୍ରୀଲଙ୍କାରେ ରାଜନୈତିକ ସଙ୍କଟ ପରେ ବିକ୍ଷୋଭକାରୀମାନେ ସଂସଦକୁ ବନ୍ଧକ ରଖିଥିଲେ। ବର୍ତ୍ତମାନ ଇରାକରେ ମଧ୍ୟ ଠିକ୍ ସେହିଭଳି କିଛି ପରିସ୍ଥିତି ସୃଷ୍ଟି ହୋଇଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
