ଅନୁଗୁଳ(ବିରଜା ଦାସ) : ଅନୁଗୋଳ ଜିଲ୍ଲା ବଅଁରପାଳ ଥାନା ବୁଢାପଙ୍କ ଗାଁ ଛକରେ ଦୋକାନ ଭଙ୍ଗା ବେଳେ ଆଜି ଅଘଟଣ ଘଟିଛି। ଏନ୍ଏଚ୍-୫୫ ପ୍ରଶସ୍ତୀକରଣ ପାଇଁ ସକାଳୁ ଜବରଦଖଲ ଉଚ୍ଛେଦ ଚାଲିଥିଲା। ହେଲେ ଜେସିବି ସାହାଯ୍ୟରେ ଏକ ଦୋକାନ ଘର ଭଙ୍ଗା ଚାଲିଥିବା ବେଳେ ଦୁର୍ଘଟଣା ଘଟି ୩ ଶ୍ରମିକ ଗୁରୁତର ହୋଇଛନ୍ତି। ଗୁରୁତରଙ୍କ ମଧ୍ୟରୁ ୨ ଜଣଙ୍କ ଘର ବନ୍ତଳା ଥାନା ଅଧୀନ ବଡ଼କେରାରେ ହୋଇଥିବା ବେଳେ ଜଣଙ୍କ ଘର ଅନୁଗୋଳ ଥାନା ଅଧୀନ କୁରୁଡୁଳୁରେ ବୋଲି ଜଣାଯାଇଛି।
ସୂଚନାଯୋଗ୍ୟଯେ, ଏନ୍ଏଚ୍-୫୫ ପ୍ରଶସ୍ତୀକରଣ ପାଇଁ ଉଚ୍ଛେଦ ନିମନ୍ତେ ଜଣେ ଠିକାଦାରଙ୍କୁ କାମ ଦିଆଯାଇଥିଲା। ଆଜି ବୁଢ଼ାପଙ୍କ ନିକଟରେ ଜଣେ ବ୍ୟକ୍ତିଙ୍କ ଘର ଭଙ୍ଗାଯାଉଥିବା ବେଳେ ହଠାତ୍ ଛାତ ଖସି ପଡ଼ିଥିଲା। ଫଳରେ ଘର ଭଙ୍ଗା କାର୍ଯ୍ୟରେ ନିୟୋଜିତ ୩ ଶ୍ରମିକଙ୍କ ଉପରେ ଛାତ ପଡ଼ିଯିବାରୁ ସେମାନେ ଗୁରୁତର ହୋଇଥିଲେ। ଘଟଣା ସମ୍ପର୍କରେ ଖବର ପାଇ ବଅଁରପାଳ ପୁଲିସ୍ ପହଞ୍ଚିବା ସହ ଅଗ୍ନିଶମ ବିଭାଗକୁ ଖବର ଦେଇଥିଲେ। ପୁଲିସ୍, ସ୍ଥାନୀୟ ଲୋକେ ଓ ଅଗ୍ନିଶମ ବିଭାଗ କର୍ମଚାରୀ ଛାତ ତଳୁ ୩ ଶ୍ରମିକଙ୍କୁ ଉଦ୍ଧାର କରି ଅନୁଗୋଳ ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଇଥିଲେ। ସେମାନଙ୍କ ମଧ୍ୟରୁ ଜଣଙ୍କ ଅବସ୍ଥା ଗୁରୁତର ରହିଛି।
ଏହି ଦୁର୍ଘଟଣା କିପରି ଘଟିଲା ଓ ଏଥିପାଇଁ କିଏ ଦାୟୀ, ସେ ନେଇ ବଅଁରପାଳ ପୁଲିସ୍ ଅଧିକ ତଦନ୍ତ ଜାରି ରଖିଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
