ଜିରା ଗୁଣ୍ଡ ଭିତରୁ ଆସିଲା ଗଞ୍ଜେଇର ଗନ୍ଧ, ପିସ୍ତଲ ସହ ମିଳିଲା ୪୦ କେଜି

କନ୍ଧମାଳ: ଗଞ୍ଜେଇ ଚୋରା ଚାଲଣର ନୂଆ ତରିକା। ପୋଲିସକୁ ଚକମା ଦେଖାଇବା ପାଇଁ ଗାଡିରେ ଢଳା ଯାଉଛି ଜିରା ପାଉଡର। ଏମିତି ଏକ ରାକେଟକୁ ଧରିବାରେ ସଫଳ ହୋଇଛି କମିଶନରେଟ ପୋଲିସ। ପୋଲିସ୍‌ ଏହି ଘଟଣାରେ ୩ ଜଣଙ୍କୁ ଗିରଫ କରିଛି। ଗିରଫ ତିନି ଜଣଙ୍କ ମଧ୍ୟରୁ ଜଣେ ଓଡ଼ିଶାର ହୋଇଥିବା ବେଳେ ଅନ୍ୟ ଦୁଇଜଣ ବାହାରା ରାଜ୍ୟର ହୋଇଥିବା ଜଣାପଡ଼ିଛି। ସେମାନଙ୍କଠାରୁ ଗୋଟିଏ ପିସ୍ତଲ, ୭୦ହଜାର ଟଙ୍କା,୨ଟି କାର୍‌ ସହ ପ୍ରାୟ ୪୦କେଜି ଗଞ୍ଜେଇ ଜବତ କରିଛି।

ପୋଲିସର ସୂଚନା ଅନୁସାରେ ଏମାନେ ଫୁଲବାଣୀରୁ ଗଞ୍ଜେଇ ଆଣି ଚୋରାରେ କର୍ଣ୍ଣାଟକ ଚାଲଣ କରୁଥିଲେ। ପୋଲିସଠାରୁ ବର୍ତ୍ତିବା ପାଇଁ ଏକ ପ୍ରାଇଭେଟ ନମ୍ବର ଥିବା ଗାଡିରେ ଗଞ୍ଜେଇ ଚୋରା ଚାଲଣ କରୁଥିଲେ।

ନିଜର ସୁରକ୍ଷା ପାଇଁ ଏମାନେ ଅନେକ ଜାଗାରେ ଲୋକଙ୍କୁ ପିସ୍ତଲ ଦେଖାଉଥିଲେ।  ଦରକାର ପଡିଲେ ଟଙ୍କା ମଧ୍ୟ ଲାଞ୍ଚ ଦେଇ ଖସି ପଳାଉଥିବା ପୋଲିସ ସୂଚନା ଦେଇଛି।