ଭୁବନେଶ୍ୱର(ଓଡ଼ିଶା ରିପୋର୍ଟର): ଲୋକଙ୍କୁ ନୂଆ ଟ୍ରାଫିକ୍ ଆଇନ୍ ସମ୍ପର୍କରେ ସଚେତନ କରିବାକୁ ଆସି ମଧ୍ୟ-ଭୁବନେଶ୍ୱର ବିଧାୟକ ଅନନ୍ତ ନାରାୟଣ ଜେନା ହଟହଟା ହୋଇଛନ୍ତି। ବେଆଇନ ଭାବେ ଗାଡ଼ି ପାର୍କିଂ କରି ଦେଇଥିବା ଅଭିଯୋଗରେ ବିଧାୟକ ୫୦୦ ଟଙ୍କା ତଣ୍ଡ ଗଣିଛନ୍ତି। ଭୁବନେଶ୍ୱରସ୍ଥିତ ଏଜି ଛକକୁ ଚକଲେଟ୍ ଓ ଲିଫଲେଟ୍ ବାଣ୍ଟିବାକୁ ଆଜି ଅନନ୍ତ ଆସିଥିଲେ। ଏହି ସମୟରେ ତାଙ୍କ ଡ୍ରାଇଭର ବେଆଇନ ଭାବେ ଗାଡ଼ି ପାର୍କିଂ କରି ଦେଇଥିଲେ। ଫଳରେ ସମସ୍ତଙ୍କ ପାଇଁ ସମାନ ଆଇନ ନିୟମରେ ଡିସିପି ଅନୁପ ସାହୁଙ୍କ ଉପସ୍ଥିତିରେ ବିଧାୟକଙ୍କୁ ଏହି ଜରିମାନା ଦେବାକୁ ପଡ଼ିଛି।
ଏ ସମ୍ପର୍କରେ ଗଣମାଧ୍ୟମ ଆଗରେ ନିଜ ଦୋଷ ସ୍ୱୀକାର କରିଛନ୍ତି ବିଧାୟକ। ବିଧାୟକ କହିଛନ୍ତି, “ଆଇନ ଆଗରେ ସମସ୍ତେ ସମାନ ।ମୋ ଡ୍ରାଇଭରର ପାର୍କିଂ ଭୁଲ ଥିଲା। ଜରିମାନା ଆଦାୟ କଲେ। ଯିଏ ଭୁଲ କରିବ, ଦଣ୍ଡିତ ହେବ। ” ଆଇନ ମାନିବାନି କାହିଁକି ବୋଲି ସେ ଓଲଟା ପ୍ରଶ୍ନ କରିଛନ୍ତି । ଏହି ସମୟରେ ସେଠାରେ ଉପସ୍ଥିତ ଡିସିପି ଅନୁପ ସାହୁ କହିଛନ୍ତି, “ଆଇନ ସମସ୍ତଙ୍କ ପାଇଁ ସମାନ। ଯିଏ ଅମାନ୍ୟ କରିବ, ଫାଇନ୍ ଦେବ”।
ଅନ୍ୟପକ୍ଷରେ ରାଜମହଲ ଛକରେ କାଲି ପୁଲିସ୍- ପବ୍ଲିକ୍ ମଧ୍ୟରେ ଖଣ୍ଡ ଯୁଦ୍ଧ ହେବା ପରେ ଆଜି ଭୁବନେଶ୍ୱର ଏଜି ଛକରେ କମିଶନରେଟ୍ ପୁଲିସ ପକ୍ଷରୁ ସଚେତନତା କାର୍ଯ୍ୟକ୍ରମ କରାଯାଉଛି। କାଲି ଲୋକଙ୍କ ଉପରକୁ ଲାଠି ଚାର୍ଜ କରିବା ପରେ ଆଜି ଚକଲେଟ୍ ଦେଇ ଓ ଲିଫଲେଟ୍ ବାଣ୍ଟି ପୁଲିସ୍ ନୂଆ ଟ୍ରାଫିକ୍ ଆଇନ୍ ସମ୍ପର୍କରେ ଲୋକଙ୍କୁ ସଚେତନ କରୁଛି । ହେଲମେଣ୍ଟ ପିନ୍ଧିବା, ସିଟ୍ ବେଲ୍ଟ ବାନ୍ଧିବା, ଓଭରଟେକ୍ ନକରିବା ଭଳି ବିଭିନ୍ନ ଟ୍ରାଫିକ୍ ନିୟମ ସମ୍ପର୍କରେ ଲୋକଙ୍କୁ ଅବଗତ କରାଉଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
