ଆନନ୍ଦପୁର (ମୁନା ସିଂ): କୁହାଯାଏ, ଆଖିରେ ଆଖି ଥରେ ମିଶିଗଲେ ମନ ଖୋଜେ ମନର ମଣିଷକୁ । ସାଥୀ ଯଦି ପାଖେ ଥାଏ ତେବେ ପାହାଡ଼ ପରି ବିପଦକୁ ସାମନା କରିବାକୁ ମନରେ ଭୟ ଆସେ ନାହିଁ। ସମାଜର କଟକଣା ବି ବାଟ ଓଗାଳି ପାରେ ନାହିଁ।
ଏପରି ପ୍ରେମରେ ପଡ଼ି ସାତ ଜନ୍ମର ସାଥୀ ପାଲଟିଲେ କେନ୍ଦୁଝର ଜିଲ୍ଲା ଆନନ୍ଦପୁର ଥାନା କାଠକଟା ଅଞ୍ଚଳର ଏକ ଆଦିବାସୀ ପ୍ରେମୀ ଯୁଗଳ। କିନ୍ତୁ ଆଦିବାସୀ ସମାଜ ଆଗରେ ସେମାନେ ଦୋଷୀ। କାରଣ ସେମାନେ ହେଉଛନ୍ତି ସମ୍ପର୍କୀୟ ଭାଇଭଉଣୀ। ଫଳରେ ସେମାନଙ୍କୁ ଗ୍ରାମରୁ ବାସନ୍ଦ କରାଯାଇଛି। ପ୍ରେମ ରାଇଜରେ ଉଡ଼ି ବୁଲୁଥିବା ଏହି ପକ୍ଷୀ ମଧ୍ୟ ନୂଆ ଠିକଣା ସନ୍ଧାନରେ ଗାଁ ଛାଡ଼ି ଚାଲି ଯାଇଛନ୍ତି।
ସୂଚନା ଅନୁସାରେ, ଗାଁର ଦୁଇ ସଂପର୍କୀୟ ଭାଇ ଭଉଣୀଙ୍କ ମଧ୍ୟରେ ସମସ୍ତଙ୍କ ଅଗୋଚରରେ ହୋଇଥିଲା ମନ ଦିଆନିଆ । ଏହାପରେ କାଳେ ସମାଜ, ପରିବାର ସେମାନଙ୍କ ମଧ୍ୟରେ ପାଚେରୀ ଛିଡ଼ା କରାଇବେ ତେଣୁ ପରିବାର ଲୋକଙ୍କ ଅଗୋଚରରେ ସେମାନେ ବିବାହ ମଧ୍ୟ କରିଦେଇଥିଲେ । ତେବେ ଏହି ଘଟଣା ପ୍ରଘଟ ହେବା ପରେ ଗାଁରେ ସଭା ବସିଲା।
ଆଦିବାସୀ ପ୍ରଥା ଅନୁସାରେ ଭାଇ ଭଉଣୀ ମଧ୍ୟରେ ପ୍ରେମ ସଂପର୍କ ଏକ ଦଣ୍ଡନୀୟ ଅପରାଧ ହୋଇଥିବାରୁ ଉଭୟଙ୍କୁ ଗାଁରୁ ବାହାର କରାଯାଇଥିବା ସ୍ଥାନୀୟ ଗ୍ରାମବାସୀ କହିଛନ୍ତି। ଯଦି ଉଭୟ କେବେବି ଗ୍ରାମକୁ ଫେରନ୍ତି ତେବେ ସେମାନଙ୍କୁ ଦଣ୍ଡ ଦିଆଯିବ ବୋଲି ଚେତାବନୀ ଦିଆଯାଇଛି । ସେପଟେ ଖବର ପାଇ ଆନନ୍ଦପୁର ଆଇଆଇସି ଗ୍ରାମରେ ପହଞ୍ଚି ଆଲୋଚନା କରିବା ସହ ଘଟଣାର ଅନୁଧ୍ୟାନ କରୁଥିବା କହିଛନ୍ତି ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
