ବିଜେପୁର ଭୋଟ ପରେ କଣ କରୁଛନ୍ତି ୩ ପ୍ରାର୍ଥୀ

ଭୁବନେଶ୍ୱର(ଓଡ଼ିଶା ରିପୋର୍ଟର): ସରିଯାଇଛି ବିଜେପୁର ଭୋଟ୍। ଏବେ ଅପେକ୍ଷା ଜନାଦେଶକୁ। ଆସନ୍ତା ୨୮ ତାରିଖରେ ହେବ ଗଣତି। ଏଥିରୁ ଜଣାପଡିବ କାହା ସପକ୍ଷରେ ଯିବ ଜିତ୍। ପ୍ରଚାର ସରିବାଠୁ ଗଣତିର ବ୍ୟବଧାନ ରହିଛି ୪ଦିନ ରହିଛି।  ମାସକର ଦିନରାତି କସରତ ପରେ ଏବେ କ’ଣ କରୁଛନ୍ତି ବିଜେପୁର ବ୍ୟାଟଲର ୩ ପ୍ରମୁଖ ଯୋଦ୍ଧା। ଏବେ ସେମାନେ ନିଜ ଘରେ କଣ କରୁଛନ୍ତି? ଆସନ୍ତୁ ଦେଖିବା।

ବିଜେପୁରରେ ବିଜେଡି ପକ୍ଷରୁ ପ୍ରତିଦ୍ୱନ୍ଦ୍ୱୀତା କରୁଥିଲେ ରୀତା ସାହୁ। ଗାଁକୁ ଗାଁ ବୁଲି ପାଖାପାଖି ମାସେ କାଳ ଦିନରାତି ଏକ କରି ହାଇ ପ୍ରୋଫାଇଲ୍ ପ୍ରଚାର କରିଥିଲେ। ଭୋଟ୍‌ ପରେ ଏବେ ଫେରିଛନ୍ତି ନୀତି ଦିନିଆ ସଂସାର ଜଞ୍ଜାଳକୁ। ବରପାଲି ଘରେ ସେ ପୂର୍ବଭଳି ରୋଷେଇ କରୁଛନ୍ତି। ବେଳେବେଳେ ନାତୁଣୀକୁ ଧରି ଗେଲ କରୁଛନ୍ତି। ଆଉ କେତେବେଳେ ପୁଅ ସୁମିତଙ୍କ ସହ ମିଶି ଭୋଟ୍ ଗଣିତର ମିଶାଣ ଓ ଫେଡ଼ାଣ ହିସାବ କରୁଛନ୍ତି। ରୀତା କହିଛନ୍ତି ସୁବଳଙ୍କ ଅନୁକମ୍ପା ଓ ନବୀନ ପଟ୍ଟନାୟକଙ୍କ ଲୋକ ପ୍ରିୟତା, ଏ ଦୁଇଟି ଯାକର ପାଓ୍ୱାର ପ୍ଲସରେ ବିଜେପୁରରେ ତାଙ୍କ ବିଜୟ ସୁନିଶ୍ଚିତ।

ଠିକ୍ ସେମିତି ଭୋଟ୍ ପରେ ଅଙ୍କକଷାରେ ବ୍ୟସ୍ତ ଅଛନ୍ତି ବିଜେପି ଯୋଦ୍ଧା ଅଶୋକ ପାଣିଗ୍ରାହୀ। ବରପାଲିସ୍ଥିତ ବାସଭବନରେ ରାତି ପାହିବା ମାତ୍ରେ ପହଞ୍ଚି ଯାଉଛନ୍ତି କର୍ମୀ ଓ ସମର୍ଥକ। କେଉଁ ବୁଥ୍‌ରେ କେତେ ଭୋଟ୍ ମିଳିଥିବ, ତାକୁ ନେଇ ଚାଲୁଛି ହିସାବ କିତାବ। ନିର୍ବାଚନ ଅବଶ୍ୟ ତାଙ୍କ ପାଇଁ ନୂଆ ନୁହେଁ, ହେଲେ ଏଥରକ କିନ୍ତୁ ଥିଲା ଟିକେ ଅଲଗା। ମାଳ ମାଳ କେନ୍ଦ୍ରମନ୍ତ୍ରୀ ଓ ନେତାଙ୍କ ଗହଣରେ ଅଶୋକ କରିଛନ୍ତି ଜବରଦସ୍ତ ପ୍ରଚାର। ଦ୍ୱାର ଦ୍ୱାର ବୁଲି ମାଗିଛନ୍ତି ଭୋଟ୍। ନରେନ୍ଦ୍ର ମୋଦିଙ୍କ ଜନକଲ୍ୟାଣ ଯୋଜନା, ବିଜେପୁରରେ ଭୋଟ୍‌ରେ ପରିଣତ ହୋଇଛି। ତେଣୁ ଅଧିକ ବ୍ୟବଧାନ ବିଜୟୀ ହେବେ ବୋଲି କହିଛନ୍ତି ଅଶୋକ।

କଂଗ୍ରେସ ପ୍ରାର୍ଥୀ ହେଉଛନ୍ତି ପ୍ରଣୟ ସାହୁ। ସେ ବି ଭୋଟ୍ ଅଙ୍କ କଷୁଛନ୍ତି। ବଜୟ ଆଶାରେ ପଛରେ ପଡି ନାହାନ୍ତି। ହାଇପ୍ରୋଫାଇଲ୍ ନହେଲେ ବି ଲୋକଙ୍କ ମନକୁ ଛୁଇଁଲା ଭଳି ପ୍ରଚାର କରିଛନ୍ତି। ତାଙ୍କର ବିଶ୍ୱାସ ବିଜେପୁରବାସୀ ଠିକ୍ ଲୋକକୁ ହିଁ ବାଛିଥିବେ। ପକେଟ୍ ଭୋଟ୍ କେତେ ସେ ହିସାବ ତ ଅଛି, ହେଲେ ବାହାରୁ କେତେ ଆସିଛି ତାକୁ ନେଇ ଚାଲିଛି ହିସାବ।