କେନ୍ଦୁଝର(ପ୍ରଣୟ ପାଣି): ଲକ୍ଡାଉନ୍ ବେଳେ ଚାଷ କାମ ସହ ଜଡ଼ିତ ସମସ୍ତ ସେବାକୁ କଟକଣା ମୁକ୍ତ କରାଯାଇଛି। ଚାଷୀଙ୍କ ସୁବିଧା ପାଇଁ ବିଭିନ୍ନ ଲ୍ୟାମ୍ପ୍ସ ଏବଂ ପ୍ୟାକ୍ସ ଖୋଲା ରଖିବାକୁ ନିର୍ଦ୍ଦେଶ ଦିଆଯାଇଛି। ତେବେ କେନ୍ଦୁଝର ଜିଲ୍ଲାରେ ଦେଖାଦେଇଛି ବ୍ୟତିକ୍ରମ। ଜିଲ୍ଲାର ସମସ୍ତ ୪୪ଟି ଲ୍ୟାମ୍ପ୍ସ ଓ ପ୍ୟାକ୍ସ ସଂପୂର୍ଣ୍ଣ ଭାବେ ବନ୍ଦ ରହିଛି।
ଜଙ୍ଘିରା ଲ୍ୟାମ୍ପ ଅଧୀନ ପିଠାଗୋଳାର ଶାଖା ପରିଚାଳକ ମୋହନ ଚରଣ ସାହୁଙ୍କୁ ପୁଲିସ୍ ପିଟିବା ଅଭିଯୋଗରେ ଲ୍ୟାମ୍ପ୍ସ ଓ ପ୍ୟାକ୍ସ ସଂଘ ପକ୍ଷରୁ ନିଆଯାଇଛି ଏଭଳି ପଦକ୍ଷେପ। ଗତକାଲି ଠାରୁ ସଂଘ ସବୁ ଲ୍ୟାମ୍ପ୍ସରେ ତାଲା ପକାଇବାକୁ ନିଷ୍ପତ୍ତି ନେଇଥିଲା। ଫଳସ୍ୱରୂପ ଆଜି ଜିଲ୍ଲାର ୪୪ଟି ଲ୍ୟାମ୍ପ୍ସ ଓ ପ୍ୟାକ୍ସ ସଂପୂର୍ଣ୍ଣ ବନ୍ଦ ରହିଛି। ଫଳରେ ବିହନ ପାଇଁ ଆସୁଥିବା ଚାଷୀ ନାହିଁ ନଥିବା ଅସୁବିଧା ଭୋଗୁଛି।
ଅଭିଯୋଗ ଅନୁଯାୟୀ, ପିଠାଗୋଳାର ଶାଖା ପରିଚାଳକ ମୋହନ ଚରଣ ସାହୁ ଅଫିସ ସାରି ବାହାରକୁ ବାହାରିବା ସମୟରେ ପଣ୍ଡାପଡ଼ା ପୁଲିସ ତାଙ୍କୁ ଲାଠିରେ ପିଟିଥିଲା।