ବ୍ରହ୍ମପୁର (ଜଗନ୍ନାଥ ସାହୁ) : କରୋନାରେ ଆକ୍ରାନ୍ତ ହୋଇ ଚେନ୍ନାଇରେ ଇକ୍ମୋ ଚିକିତ୍ସା ପାଉଛନ୍ତି ଅମୃତ ପ୍ରଧାନ। ୭୦ରୁ ଅଧିକ ଦିନ ଧରି ସେ ସେଠାରେ ଚିକିତ୍ସିତ ହେଉଛନ୍ତି। ସମ୍ପୂର୍ଣ୍ଣ ସୁସ୍ଥ ହେବା ପାଇଁ ତାଙ୍କୁ ଆହୁରି ୨ ମାସ ଲାଗିବ। ହେଲେ ପାଖରେ ସମ୍ୱଳ ନାହିଁ। ଏଥିପାଇଁ ଆଉ ଥରେ ସହାୟତା ଭିକ୍ଷା କରିଛନ୍ତି ଅମୃତଙ୍କ ବାପା ମଦନ ମୋହନ ପ୍ରଧାନ ଓ ମାଆ ସବିତା।
ବ୍ରହ୍ମପୁର ବାସୁଦେବନଗର ଅଞ୍ଚଳର ଅମ୍ରିତ ପ୍ରଧାନ। ଡାକ୍ତରଙ୍କ ଚିକିତ୍ସା ଯୋଗୁ ତାଙ୍କ ସ୍ୱାସ୍ଥ୍ୟ ଅବସ୍ଥାରେ ସାମାନ୍ୟ ସୁଧାର ଆସୁଛି। ସେପଟେ ଏକ ମାତ୍ର ପୁଅ ଅମୃତର ଆଶୁ ଆରୋଗ୍ୟ କାମନା କରି ତାଙ୍କ ବାପା ଓ ମାଆ ମନ୍ଦିରରୁ ମନ୍ଦିର ବୁଲି ଭଗବାନଙ୍କ ଶରଣ ପଶୁଛନ୍ତି। ଶୀଘ୍ର ପୁଅ ଆରୋଗ୍ୟ ହୋଇ ଘରକୁ ଫେରୁ ବୋଲି ଭଗବାନଙ୍କ ନିକଟରେ ପ୍ରାର୍ଥନା କରୁଛନ୍ତି। ଆଜି ବ୍ରହ୍ମପୁରର ପ୍ରସିଦ୍ଧ ବିନାୟକ ପୀଠରେ ପୁଅ ପାଇଁ ମାନସିକ ରଖି ପୂଜା କରିଛନ୍ତି ବାପା-ମାଆ।
କରୋନାରେ ଆକ୍ରାନ୍ତ ହୋଇ କୋଭିଡ୍ ମେଡିକାଲ୍ରେ ଚିକିତ୍ସିତ ହୋଇଥିଲେ। ମାତ୍ର ତାଙ୍କ ସ୍ୱାସ୍ଥ୍ୟ ଅବସ୍ଥା ଉନ୍ନତି ଆସିନଥିଲା। ଡାକ୍ତରଙ୍କ ପରାମର୍ଶରେ ଜୁନ ୩ ତାରିଖରେ ଅମ୍ରିତଙ୍କୁ ଭୁବନେଶ୍ୱରରୁ ଚେନ୍ନାଇକୁ ଏୟାରଲିଫ୍ଟ କରାଯାଇଥିଲା। ସେଠାରେ ତାଙ୍କୁ ଏକ ଘରୋଇ ହସ୍ପିଟାଲ୍ରେ ଇକ୍ମୋ ଚିକିତ୍ସା କରାଯାଉଛି। ରାଜ୍ୟ ତଥା ରାଜ୍ୟ ବାହାରର ବିଭିନ୍ନ ବଦାନ୍ୟ ବ୍ୟକ୍ତିଙ୍କଠାରୁ ମିଳିଥିବା ସହାୟତାରେ ତାଙ୍କର ଚିକିତ୍ସା ଚାଲିଛି। ଚିକିତ୍ସା ପାଇଁ ଦିନକୁ ପ୍ରାୟ ୩ ଲକ୍ଷ ଟଙ୍କା ଖର୍ଚ୍ଚ ହେଉଛି। ଦୀର୍ଘ ୭୦ ଦିନ ଧରି ସେଠାରେ ଚିକିତ୍ସା ଚାଲୁ ରହିଥିବା ବେଳେ ବର୍ତ୍ତମାନ ସୁଦ୍ଧା ୨ କୋଟିରୁ ଊର୍ଦ୍ଧ୍ୱ ଅର୍ଥ ଖର୍ଚ୍ଚ ହୋଇ ସାରିଲାଣି।
ପୁଅ ଚିକିତ୍ସାରେ ବାପା-ମାଆଙ୍କ ସଞ୍ଚିତ ଅର୍ଥ ସରିଗଲାଣି। ଏଭଳି ସ୍ଥଳରେ ଆହୁରି ୨ ମାସ ଧରି ସେଠାରେ ଅମୃତ ଚିକିତ୍ସା ହେବ ବୋଲି ଡାକ୍ତରଖାନା ପକ୍ଷରୁ କୁହାଯାଇଛି। ତେଣୁ ଆଗକୁ ଆହୁରି ଅର୍ଥ ଆବଶ୍ୟକ ପଡ଼ିବ। ସହାୟତା ପାଇଁ ରାଜ୍ୟ ସରକାରଙ୍କଠାରେ ଗୁହାରି କରିଥିଲେ ଅମୃତଙ୍କ ବାପା-ମାଆ। କିନ୍ତୁ ଏଯାଏଁ କୌଣସି ସହାୟତା ମିଳିନାହିଁ। ମେଡିକାଲରେ ଭର୍ତ୍ତି ହୋଇଥିବାରୁ ଠିକ୍ରେ ଘରେ ନରହି ମନ୍ଦିରରୁ ମନ୍ଦିର ବୁଲି ପୁଅର ଆଶୁ ଆରୋଗ୍ୟ କାମନା କରୁଛନ୍ତି ବାପା-ମାଆ। ବଦାନ୍ୟ ବ୍ୟକ୍ତିମାନେ ସହାୟତା ପ୍ରଦାନ କଲେ, ତାଙ୍କ ପୁଅ ଘରକୁ ସୁସ୍ଥ ହୋଇ ଫେରି ଆସିବ ବୋଲି କହିଛନ୍ତି ପରିବାର ଲୋକେ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
