କନ୍ଧମାଳ ଜିଲ୍ଲାର ମାଣ୍ଡିପଙ୍କା ଗାଁର ୩ଜଣ ଆଦିବାସୀ ମହିଳାଙ୍କ ମୃତ୍ୟୁ ଅନାହାରଜନିତ ନୁହେଁ ବରଂ ଫୁଡ୍ ପଏଜନିଂ ପାଇଁ ହୋଇଛି ବୋଲି ରାଜ୍ୟ ଖାଦ୍ୟଯୋଗାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ସ୍ପଷ୍ଟ କରିଛନ୍ତି । ବିରୋଧୀ ଦଳ ପକ୍ଷରୁ ଅନାହାର ମୃତ୍ୟୁକୁ ନେଇ କରାଯାଉଥିବା ହଟ୍ଟଗୋଳ ଓ ଅଭିଯୋଗକୁ ଖଣ୍ଡନ କରି ଆଜି ବିଧାନସଭାରେ ଖାଦ୍ୟଯୋଗାଣ ମନ୍ତ୍ରୀ ଶ୍ରୀ ପାତ୍ର କହିଛନ୍ତି ଯେ, କନ୍ଧମାଳ ଜିଲ୍ଲାର ମାଣ୍ଡିପଙ୍କା ଗାଁରେ ୩ଜଣ ମହିଳାଙ୍କ ମୃତ୍ୟୁ ଘଟଣାର ତଦନ୍ତ ସରକାର କରିଛନ୍ତି । ଏହି ତଦନ୍ତରୁ ଜଣାପଡ଼ିଛି ଯେ ବାସି ଖାଦ୍ୟ ରଖିବାରୁ ତାହା ବିଷାକ୍ତ ହୋଇଯାଇଥିଲା ଯାହାକୁ ଖାଇ ସେମାନଙ୍କର ମୃତ୍ୟୁ ଘଟିଛି ।
ମନ୍ତ୍ରୀ ଶ୍ରୀ ପାତ୍ର କହିଛନ୍ତି ଯେ, ଅନାହାର ଯୋଗୁ ଆମ୍ବଟାକୁଆ ଜାଉ ଖାଇବା ଘଟଣା ସମ୍ପୂର୍ଣ୍ଣ ମିଛ । ବିରୋଧୀ ଦଳ ଅପ୍ରସଙ୍ଗକୁ ପ୍ରସଙ୍ଗ କରୁଛି । ସୁସ୍ଥ ହୋଇ ଘରକୁ ଫେରିଥିବା ଟୁନି ମାଝୀ ସ୍ପଷ୍ଟ କରିଛନ୍ତି ଯେ, ଭାତ ସହ ଆମ୍ବଟାକୁଆ ଜାଉ ଖାଇଥିଲେ । କିନ୍ତୁ ଜାଉ ୩-୪ଦିନର ବାସି ହୋଇଥିବାରୁ ତାହା ବିଷାକ୍ତ ହୋଇଯାଇଥିଲା । କେବଳ ସେତିକି ନୁହେଁ ଯେଉଁ ୩ଜଣ ମହିଳା ପ୍ରାଣ ହରାଇଛନ୍ତି ସେମାନେ ଖାଦ୍ୟାଭାବର ଶିକାର ହେବା ଖବର ମଧ୍ୟ ସତ ନୁହେଁ । କାରଣ ସମ୍ପୃକ୍ତ ମହିଳାମାନେ କିଏ ୧୧ଏକର ତ କିଏ ୧୪ଏକର ଜମିର ମାଲିକ । ଗତ ୨୦୨୩-୨୪ ଖରିଫବର୍ଷରେ ସେମାନେ ସରକାରଙ୍କୁ ଧାନ ମଧ୍ୟ ବିକ୍ରି କରିଛନ୍ତି । ତାଙ୍କ ପରିବାରରେ ଜଣେ ସଦସ୍ୟ ବିଏସଏଫରେ ମଧ୍ୟ ଚାକିରି କରିଛନ୍ତି । ତେଣୁ ଦାରିଦ୍ର୍ୟ ଯୋଗୁ ଅନାହାରରେ ପ୍ରାଣ ହରାଇବା ଘଟଣା ସତ ନୁହେଁ ।
Also Read
ରାଜ୍ୟ ସରକାର ସେହି ଗାଁର ସମସ୍ତ ପରିବାରକୁ ୧୨କିଲୋ ଲେଖାଏଁ ମାଣ୍ଡିଆ ଯୋଗାଇ ଦେଇଛନ୍ତି । ଏହାସହିତ ଖାଦ୍ୟସୁରକ୍ଷା ଯୋଜନାରେ ଚାଉଳ ଯୋଗାଇ ଦିଆଯାଇଛି । ମୃତକଙ୍କ ପରିବାରକୁ ମଧ୍ୟ ଅନୁକମ୍ପାମୂଳକ ସହାୟତା ସରକାର ଯୋଗାଇ ଦେଇଛନ୍ତି । ରାଜ୍ୟ ସରକାର ଏଣିକି ୪୫ଦିନ ପୂର୍ବରୁ ଆଗୁଆ ରାସନ ସାମଗ୍ରୀ ହିତାଧିକାରୀଙ୍କୁ ଯୋଗାଇବାକୁ ଯୋଜନା କରୁଛନ୍ତି ।
ଆଦିବାସୀ ଓ ଦୁର୍ଗମ ଅଂଚଳରେ ଅଧିକ ସଂଖ୍ୟକ ପିଡିଏସ୍ ଆଉଟଲେଟ୍ ଖୋଲିବାକୁ ମଧ୍ୟ ସରକାର ଯୋଜନା କରୁଥିବା ସେ କହିଛନ୍ତି ।
ଅନ୍ୟପକ୍ଷରେ ରାଜ୍ୟ ଖାଦ୍ୟ ସୁରକ୍ଷା କମିଶନ ଅଧ୍ୟକ୍ଷ ଅବନୀକାନ୍ତ ସାହୁ ଓ ଅନ୍ୟ ଦୁଇ ସଦସ୍ୟ ଆଜି ମାଣ୍ଡିପଙ୍କା ଗାଁକୁ ଯାଇ ପ୍ରଭାବିତ ପରିବାର ସଦସ୍ୟଙ୍କ ସମେତ ଗାଁ ଲୋକମାନଙ୍କୁ ଭେଟିଥିବା ଜଣାପଡ଼ିଛି ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
