ବ୍ରହ୍ମପୁର(ଜଗନ୍ନାଥ ସାହୁ): ବାଇକ୍ ପାର୍କିଂକୁ କେନ୍ଦ୍ର କରି ଜଣେ ମହିଳାଙ୍କ ସାମ୍ନାରେ ତାଙ୍କ ପୁଅକୁ ବ୍ୟାଟ୍ରେ ୪ ଜଣ ଯୁବକ ନିସ୍ତୁକ ପିଟି ଥିବା ବେଳେ ଏହାର ଭିଡିଓ ଭାଇରାଲ୍ ହୋଇଛି। ଗଞ୍ଜାମ ଜିଲ୍ଲା ବୈଦ୍ୟନାଥପୁର ଥାନା ଅଞ୍ଚଳରେ ଏ ଘଟଣା ଘଟିଥିବା ବେଳେ ପୁଲିସ୍ ମୋଟ ୫ ଜଣଙ୍କୁ ଗିରଫ କରିଛି।
ପୁଲିସ୍ ନିକଟରେ ହୋଇଥିବା ଅଭିଯୋଗ ଅନୁଯାୟୀ, ଗତ ୨୮ ତାରିଖରେ ଘଟିଥିଲା ଏଭଳି ଏକ ଅମାନୁଷିକ କାଣ୍ଡ। ବୈଦ୍ୟନାଥପୁର ଥାନା ଅନ୍ତର୍ଗତ ପଣ୍ଡା କଲୋନୀ ନିକଟରେ ଥିବା ଏକ କଲ୍ୟାଣ ମଣ୍ଡପକୁ ଏକ ବାହାଘରରେ ଯୋଗ ଦେବାକୁ ଯାଇଥିଲେ ସୁନୀଲ ମହାରଣା। ସେ ଉକ୍ତ ମଣ୍ଡପ ନିକଟରେ ଥିବା ରାଜା ମିଶ୍ର ନାମକ ଯୁବକଙ୍କ ଘର ସମ୍ମୁଖରେ ଇକ୍ ରଖି ଦେଇଥିଲେ। ଏହାଦେଖି ରାଜା ତାଙ୍କୁ ଗାଳିଗୁଲଜ କରିବା ସହ ଆକ୍ରମଣ କରିଥିଲେ। ଆଉ ଏହାର ଜବାବରେ ସୁନୀଲ ଓ ତାଙ୍କ ସାଙ୍ଗମାନେ ମିଶି ରାଜାଙ୍କୁ ଏକ କ୍ରିକେଟ ବ୍ୟାଟରେ ନିସ୍ତୁକ ପିଟିଥିଲେ। ଆଉ ଏହି ଦୃଶ୍ୟ ନିକଟରେ ଥିବା ସିସିଟିଭିରେ ରେକର୍ଡ ହୋଇଯାଇଥିଲା। ଏହାପରେ ସେମାନେ ଖଣ୍ଡା ଆଣି ମଧ୍ୟ ଆକ୍ରମଣ କରିବାକୁ ଉଦ୍ୟମ କରିଥିଲେ। ହେଲେ ରାଜାଙ୍କ ମା’ ସାମ୍ନାକୁ ଚାଲି ଆସିଥିଲେ। ତାଙ୍କ ମା’ଙ୍କ ହାତରେ ଖଣ୍ଡାର ଚୋଟ ବାଜିଥିଲା।
ଏହି ମାମଲାରେ ପୁଲିସ୍ ଉଭୟ ପକ୍ଷର ଅଭିଯୋଗ ଆଧାରରେ ଆଶିଷ ମହାରଣା, ପିଣ୍ଟୁ ବେହେରା, ସୁନୀଲ ମହାରଣା ଓ କାଳିଆ ସାହୁଙ୍କୁ ଗିରଫ କରିଥିବା ବେଳେ ଆକ୍ରମଣର ଶିକାର ହୋଇଥିବା ରାଜା ମିଶ୍ରଙ୍କୁ ବି ଗିରଫ କରିଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
