ଗୋପୀଙ୍କୁ ହଇରାଣ କରି ଫସିଗଲେ… କି ଦଣ୍ଡ ପାଇଲେ ଦେଖନ୍ତୁ ଭିଡିଓ

<p>ବରଗଡ଼: ବରଗଡ଼ ଟାଉନ୍ ଥାନା ପରିସରରେ ଗତକାଲି ଦେଖିବାକୁ ମିଳିଥିଲା ଭିନ୍ନ ଏକ ଦୃଶ୍ୟ। ଧରା ହୋଇ ଆସୁଥିଲେ ଜଣେ ପରେ ଜଣେ ଅପରାଧୀ। କାନ ଧରି ଉଠବସ ହେଉଥିଲେ। ନିର୍ମମ ପ୍ରହାର ଖାଉଥିଲେ। ଆଉ ଭୁଲ୍ କରିବେ ନାହିଁ ବୋଲି କହୁଥିଲେ। ତା&rsquo;ସହିତ ଗାଳି ବି ଖାଉଥିଲେ।</p><p>ଏମାନଙ୍କ ନାଁରେ ଥିଲା ଭିନ୍ନ ଭିନ୍ନ ଅଭିଯୋଗ। କିଏ ଗୋପୀମାନଙ୍କ ଦହି ହାଣ୍ଡି ଭାଙ୍ଗି ଥିଲା ତ କିଏ ସେମାନଙ୍କ ଶରୀରରେ ହାତ ମାରି ଦେଇଥିଲା। ଆଉ କିଏ ଗୋପୀମାନଙ୍କ ବସ୍ତ୍ର ଚୋରି କରିଥିଲା। ଏବେ ଆପଣମାନେ ଜାଣି ଯିବେଣି ଘଟଣାଟି କ&rsquo;ଣ? ଥାନାରେ ଉପସ୍ଥିତ ଥିଲେ ଖୋଦ୍ କଂସ ମହାରାଜ। ମଥୁରା ରାଜ୍ୟର ଆଇନ, ଶୃଙ୍ଖଳା ସ୍ଥିତି ବିଷୟରେ ଜାଣିବାକୁ ପହଞ୍ଚିଥିଲେ ଥାନାରେ। ସେଠାରେ ମନ୍ତ୍ରୀଙ୍କଠାରୁ ଜାଣିବାକୁ ପାଇଲେ ଯେ କିଛି ଲୋକ ରାଜ୍ୟରେ ଚୋରି, ଡାକାୟତି ସହିତ ଅନ୍ୟାନ୍ୟ ପ୍ରକାରର ଅପରାଧ ଘଟାଉଛନ୍ତି। ମନ୍ତ୍ରୀ ତାଙ୍କ ଆଗରେ ବର୍ଣ୍ଣନା କରିଥିଲେ କିପରି ଜଣେ ଅସାମାଜିକ ବ୍ୟକ୍ତି ଗୋପୀମାନଙ୍କ ଦହି ହାଣ୍ଡି ଭାଙ୍ଗି ଦେଇଥିଲେ। ଏହା ଶୁଣି ରାଗ ତମତମ କଂସ ମହାରାଜ ତାକୁ ସଙ୍ଗେ ସଙ୍ଗେ ସେଠାରେ ହାଜର କରିବାକୁ ନିର୍ଦ୍ଦେଶ ଦେଇଥିଲେ। ରାଜାଙ୍କ ସମ୍ମୁଖରେ ହାଜର ହେବା ମାତ୍ରେ ତାର ସତେ ଯେମିତି ହଂସା ଉଡ଼ି ଯାଇଥିଲା। ସଙ୍ଗେ ସଙ୍ଗେ ନିଜେ କରିଥିବା କୁକର୍ମ ବଖାଣି ଦୋଷ ମାନି ଯାଇଥିଲା। ତା&rsquo;ପରେ ତାକୁ ଦଶ ଥର ଉଠବସ ହେବାକୁ କହିଥିଲେ କଂସ ମହାରାଜ। ଏହା ପରେ ତା&rsquo; ଉପରେ ଗଦା ପ୍ରହାର କରିବାକୁ ଦେଇଥିଲେ ନିର୍ଦ୍ଦେଶ। ତତ୍&zwnj;କ୍ଷଣାତ୍ ତାଙ୍କ ନିର୍ଦ୍ଦେଶ ପାଳନ କରାଯାଇଥିଲା।</p><p>ତା&rsquo;ପରେ ଆସିଲେ ଆଉ ଜଣେ ଅପରାଧୀ। ସେ ଗୋପୀମାନଙ୍କୁ ଧରି ପକାଇ ଥିଲା ବୋଲି କହିଥିଲା। ଏହା ଏକ ଜଘନ୍ୟ ଅପରାଧ ବୋଲି କହି ଚିତ୍କାର କରି ଉଠିଥିଲେ ମଥୁରା ନରେଶ। ତାକୁ କାନ ଧରି ଏମିତି ଭୁଲ୍ ଆଉ କରିବି ନାହିଁ ବୋଲି କହିବାକୁ ନିର୍ଦ୍ଦେଶ ଦେଇଥିଲେ। ସେ ସଙ୍ଗେ ସଙ୍ଗେ ଆଦେଶ ପାଳନ କରିଥିଲା। ତା&rsquo;ପରେ ଖାଇଥିଲା ଗଦା ପ୍ରହାର। ଗୋପୀଙ୍କ ବସ୍ତ୍ର ଚୋରାଇଥିବା ବ୍ୟକ୍ତିର ମଧ୍ୟ ସମଦଶା ହୋଇଥିଲା।</p><p>ତାଙ୍କ ଦେଶରେ ନାରୀଙ୍କ ଉପରେ କୌଣସି ପ୍ରକାର ଅପରାଧକୁ ସହ୍ୟ କରାଯିବ ନାହିଁ ବୋଲି କଂସ ମହାରାଜ କହିଥିଲେ।</p><p>ମହାରାଜଙ୍କ ଥାନା ପରିଦର୍ଶନ, ନ୍ୟାୟ ବିଚାର ଓ ଦଣ୍ଡବିଧାନ ସମୟରେ ରାଜ୍ୟର ଅନେକ ପ୍ରଜା ମଧ୍ୟ ଉପସ୍ଥିତ ଥିଲେ। ବରଗଡ଼ ଧନୁଯାତ୍ରାର ଏହା ହିଁ ଆକର୍ଷଣୀୟ ଅଂଶ। ଧନୁଯାତ୍ରା ୧୧ ଦିନ ଯାକ ସେଠାରେ ରାଜତନ୍ତ୍ର ପ୍ରତିଷ୍ଠା ହୁଏ। ଗଣତନ୍ତ୍ରର ସମସ୍ତ ପ୍ରଭାବଶାଳୀ ନେତା ଓ ଅଫିସର କେବଳ ଜଣେ ଜଣେ ସାଧାରଣ ପ୍ରଜା ହିସାବରେ ଗଣତି ହୁଅନ୍ତି। ମହାରାଜ କଂସ ଯେଉଁଠି ବସନ୍ତି ସେଠି ଆରମ୍ଭ ହୁଏ ତାଙ୍କ ଦରବାର। ଅନ୍ୟ ସମସ୍ତେ ତାଙ୍କ ପ୍ରଶ୍ନର ଉତ୍ତର ଦିଅନ୍ତି। ଏହା ହିଁ ବରଗଡ଼ ଧନୁଯାତ୍ରାର ପରମ୍ପରା ଓ ଆକର୍ଷଣ।</p>

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।