ବାରକୋଟ: କେନ୍ଦୁନାଳୀ ଗ୍ରାମରେ କଦଳୀ ଚାଷ ନଷ୍ଟ କଲେ ହାତୀପଲ

ବରଗଡ: ବରଗଡ ଜିଲ୍ଲା ବାରକୋଟ ରେଞ୍ଜ ଅନ୍ତର୍ଗତ କେନ୍ଦୁନାଳୀ ଗ୍ରାମରେ ହାତୀପଲଙ୍କ ଉପଦ୍ରବ ଦେଖିବାକୁ ମିଳିଛି । ହାତୀପଲ ମଙ୍ଗଳବାର ଗ୍ରାମବାସୀ କରିଥିବା କଦଳୀ ବଗିଚାକୁ ନଷ୍ଟ କରିଦେଇଥିବା ଅଭିଯୋଗ ହୋଇଛି । ଠାକୁରପାଲୀ ଗ୍ରାମର କିଛି ଚାଷୀ କେନ୍ଦୁନାଳୀ ଗ୍ରାମରେ ଥିବା ସେମାନଙ୍କ ଜମିରେ କଦଳୀ ଚାଷ କରିଥିଲେ। ୩ଜଣ ଚାଷୀ ପ୍ରାୟ ୩ହଜାର କଦଳୀ ଓ ଅନ୍ୟ ଜଣେ ଚାଷୀ ବାଇଗଣ ଚାଷ କରିଥିଲେ । ତେବେ ହାତୀପଲ ଉଭୟ କଦଳୀ ଓ ବାଇଗଣ ଚାଷକୁ ସମ୍ପୂର୍ଣ୍ଣ ନଷ୍ଟ କରିଦେଇଛନ୍ତି । ବର୍ତ୍ତମାନ ଏହି ହାତୀପଲ ଗ୍ରାମ ନିକଟରେ ଅଛନ୍ତି । ଦିନ ହୋଇଥିବାରୁ ହାତୀ ପଲଙ୍କୁ ଘଉଡାଇବାରେ ସମସ୍ୟା ହେଉଛି । ସନ୍ଧ୍ୟା ପରେ ଏମାନଙ୍କୁ ଘଉଡା ଯିବ ବୋଲି ବନ ବିଭାଗ ପକ୍ଷରୁ କୁହାଯାଇଛି । ହାତୀ ପ୍ରାୟ ୨ଲକ୍ଷ ଟଙ୍କାର ଚାଷ ନଷ୍ଟ କରିଦେଇଥିବା ଗ୍ରାମବାସୀ ଅଭିଯୋଗ କରିଛନ୍ତି । ତେବେ ପ୍ରାଥମିକ ତଦନ୍ତରୁ ହାତୀପଲ ଦ୍ୱାରା ପ୍ରାୟ ୩୦ହଜାର ଟଙ୍କାର କ୍ଷତି ହୋଇଥିବା ବନ ବିଭାଗ ପକ୍ଷରୁ ଆକଳନ କରାଯାଇଛି । ଏହି ହାତୀ ପଲରେ କିଛି ଛୁଆ ରହିଥିବା ଗ୍ରାମବାସୀ କହିଛନ୍ତି ।