ବିଜେପୁରରେ ଘନଘନ ବୁଲୁଛନ୍ତି ପାଣ୍ଡିଆନ୍‌ !

ଭୁବନେଶ୍ୱର (ଓଡ଼ିଶା ରିପୋର୍ଟର): ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବ୍ୟକ୍ତିଗତ ସଚିବ ଭି.କାର୍ତ୍ତିକେୟନ୍‌ ପାଣ୍ଡିଆନଙ୍କ ପିଛା ଛାଡୁନି ବିବାଦ। କେନ୍ଦ୍ରାପଡ଼ା ସାଂସଦ ବୈଜୟନ୍ତ ପଣ୍ଡା ଓ ପୂର୍ବତନ ବିଧାୟକ ରମାରଞ୍ଜନ ବଳିଆରସିଂହଙ୍କ ପରେ, ବିଜେପି ଆଜି ପାଣ୍ଡିଆନ୍‌ଙ୍କୁ ଟାର୍ଗେଟ କରିଛି। କହିଛି, ପ୍ରଶାସନିକ କାର୍ଯ୍ୟ ଛାଡ଼ି ପାଣ୍ଡିଆନ୍‌ ବାରମ୍ୱାର ବିଜେପୁର ଯାଇ ସେଠି ବିଜେଡିର ସ୍ଥିତି ପରଖୁଛନ୍ତି। ଆଜି ଏମିତି ଅଭିଯୋଗ ଆଣିଛନ୍ତି ବିଜେପି ରାଷ୍ଟ୍ରୀୟ ମୁଖପାତ୍ର ସମ୍ବିତ ପାତ୍ର।

ସେ କହିଛନ୍ତି- “ଗତ ପଞ୍ଚାୟତ ନିର୍ବାଚନ ଫଳାଫଳ ଓ ବର୍ତ୍ତମାନ ସ୍ଥିତିରେ ବିଜେପିର ଅଗ୍ରଗତିକୁ ନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବିଚଳିତ ହୋଇ ପଡ଼ିଛନ୍ତି। ସେଥିପାଇଁ ବିଜେପୁର ଉପନିର୍ବାଚନ ଜିତିବାକୁ ବେଆଇନ୍‌ ଭାବେ ୧୫ଶହ କୋଟି ଟଙ୍କାର ଟେଣ୍ଡର ପାରିତ କରିଛନ୍ତି। ଏହାକୁ ରାଜନୈତିକ ଉଦ୍ଦେଶ୍ୟରେ ବିଜେପୁର ନିର୍ବାଚନରେ ଖର୍ଚ୍ଚ କରିବା ପାଇଁ ବ୍ୟବସ୍ଥା କରାଯାଉଛି। ବିଜେଡିକୁ ଫାଇଦା ଦେବା ପାଇଁ ବିଡିଓମାନେ ଏହି ଅର୍ଥ ଖର୍ଚ୍ଚ କରୁଛନ୍ତି। ଏହି କାର୍ଯ୍ୟକୁ ନୀରିକ୍ଷଣ କରୁଛନ୍ତି ଜିଲ୍ଲାପାଳ। ଏମାନଙ୍କୁ ନୀରିକ୍ଷଣ କରୁଛନ୍ତି ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ଭି.କାର୍ତ୍ତିକେୟନ୍‌ ପାଣ୍ଡିଆନ୍‌। ସେ ବାରମ୍ୱାର ବିଜେପୁର ଯାଇ ବିଜେଡିର ସ୍ଥିତି ପରଖୁଛନ୍ତି। ଅନ୍ୟପକ୍ଷରେ, ଏସ୍‌ପି ଓ ଏସ୍‌ଡିପିଓମାନେ ଆଇନ୍‌ଶୃଙ୍ଖଳା ପରିସ୍ଥିତି ସୁଧାରିବା ପରିବର୍ତ୍ତେ ଅସାମାଜିକ ଲୋକଙ୍କୁ ପ୍ରଶ୍ରୟ ଦେଉଛନ୍ତି। ବର୍ତ୍ତମାନ କହିବାକୁ ଗଲେ- ଜିଲ୍ଲାପାଳ, ଏସ୍‌ପି ଓ ବିଡିଓଙ୍କ କାର୍ଯ୍ୟାଳୟ ବିଜେଡି ଅଫିସରେ ପରିଣତ ହୋଇଗଲାଣି।”

ସମ୍ବିତ ଆହୁରି କହିଛନ୍ତି- “ଶ୍ରମମନ୍ତ୍ରୀ ସୁଶାନ୍ତ ସିଂହଙ୍କ ଭାଇ ସୁବ୍ରତ ସିଂହ, ବାହାର ରାଜ୍ୟରୁ ଗୁଣ୍ଡାମାନଙ୍କୁ ଆଣି ବିଜେପୁରରେ ଗୁଣ୍ଡାରାଜ ଚଳାଇଛନ୍ତି। ଏପରିକି ବିଜେପି କର୍ମକର୍ତ୍ତାଙ୍କ ଘରେ ପଶି ଗୁଳି କରୁଛନ୍ତି। ଏହାର ଜ୍ୱଳନ୍ତ ଉଦାହରଣ ପୂର୍ବରୁ ଦେଖିବାକୁ ମିଳିଛି। ଏ ସମସ୍ତ ଅଭିଯୋଗ ଆଜି ଆମେ ନିର୍ବାଚନ କମିଶନଙ୍କୁ ଜଣାଇଛୁ।”

ଏହିସବୁ ଅଭିଯୋଗ ନେଇ ଆଜି ବିଜେପି ଦିଲ୍ଲୀରେ କେନ୍ଦ୍ରୀୟ ନିର୍ବାଚନ କମିଶନଙ୍କ ପାଖରେ ଅଭିଯୋଗ କରିଛନ୍ତି। ଏହି ସମୟରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ପ୍ରଭାରୀ ଅରୁଣ ସିଂହ ଓ ସମ୍ବିତ ପାତ୍ର ପ୍ରମୁଖ ଉପସ୍ଥିତ ଥିଲେ।