ଏପରି ଚାଲିଛି ଚିକିତ୍ସା ସେବା: ସରକାରୀ ଡାକ୍ତରଖାନାରୁ ନର୍ସିଂହୋମକୁ ଯିବାକୁ ଦିଆଯାଉଛି ପରାମର୍ଶ

ବଲାଙ୍ଗିର (ଓଡ଼ିଶା ରିପୋର୍ଟର): ସରକାରୀ ଡାକ୍ତରଖାନାକୁ ଗଲେ ଘରୋଇ ନର୍ସିଂହୋମ୍ ଯିବାକୁ ପରାମର୍ଶ ଦିଆଯାଉଛି। ନିଶ୍ଚିତ ଭାବେ ଏଥିରେ କିଛି ଭିତିରି ରହସ୍ୟ ରହିଛି। ଏହା ସହିତ ଟଙ୍କା ନ ଦେଲେ ଚିକିତ୍ସା କରାଯାଉନାହିଁ। ଏହା କୌଣସି ଫିଲ୍ମର ସଂଳାପ ନୁହେଁ। ଏହା ହେଉଛି ବଲାଙ୍ଗିର ମେଡିକାଲ କଲେଜ ଓ ହସ୍ପିଟାଲ ବିରୋଧରେ ଆସିଥିବା ସଂଗୀନ ଅଭିଯୋଗ। କେବଳ ଏତିକି ନୁହେଁ, ଏଠାକୁ ଜାଣିଶୁଣି ଡାକ୍ତର ଆସୁ ନଥିବା ଓ ପିଲାଜନ୍ମ ହେଳେ ଟଙ୍କା ମାଗାଯିବା ପରି ଅଭିଯୋଗ ମଧ୍ୟ ଲଗାତାର ଆସୁଛି।

ଅଭିଯୋଗ ଅନୁସାରେ, ୯ ମାସର ଗର୍ଭ  ଯନ୍ତ୍ରଣାରେ ଛଟପଟ ହେଉଥିଲେ ବଲାଙ୍ଗିର ଆଗଲପୁର ଅଞ୍ଚଳର ପଦ୍ମା। ହେଲେ ଦିନ ୧୧ଟାରୁ ୩ଟା ଯାଏଁ ଡାକ୍ତର ଆସିଲେ ନାହିଁ। ଚିକିତ୍ସା ପାଇଁ ନର୍ସଙ୍କୁ କହିବାରୁ ଏକ ନିର୍ଦ୍ଦିଷ୍ଟ ଘରୋଇ ନର୍ସିଂହୋମକୁ ନେବା ପାଇଁ ସେ ତାଗିଦ୍ କରିଥିଲେ। ଅନେକ କାକୁତି ମିନତି ପରେ, ଅପରାହ୍ନ ଚାରିଟାରେ ଆଥିଲେ। ହେଲେ ପ୍ରସୂତୀଙ୍କ ଚିକିତ୍ସା କରିବା ପରିବର୍ତ୍ତେ ସିଧା ସିଧା କହିଲେ- ଏଠି ନୁହେଁ ନର୍ସିଂହୋମରେ ଚିକିତ୍ସା କରାଅ। ଶେଷରେ କୌଣସି ଉପାୟ ନ ପାଇ ପଦ୍ମାଙ୍କ ସମ୍ପର୍କୀୟ ଗଣମାଧ୍ୟମର ସାହାରା ନେଇଥିଲେ।

ଏତିକିରେ ସରିନି ବଲାଙ୍ଗିର ଜିଲ୍ଲା ମୁଖ୍ୟ ଚିକିତ୍ସାଳୟର ଭିତିରି କଥା। ପିଲା ଜନ୍ମ ହେବା ମାତ୍ରେ ଏଠାରେ ପରିବାର ଲୋକଙ୍କୁ ଟଙ୍କା ମଗାଯାଇଥାଏ। ଫିକ୍ସଡ୍ ରେଟ୍, ପୁଅ ହେଲେ ୨୦୦୦, ଝିଅ  ହେଲେ ୧୦୦୦। ଟଙ୍କା ନ ଦେଲେ, ଘଣ୍ଟା ଘଣ୍ଟା ଧରି ବିନା ଚିକିତ୍ସାରେ ରୋଗୀ ପଡ଼ି ରହନ୍ତି ବୋଲି ପୂର୍ବରୁ ଅଭିଯୋଗ ଅଛି। ଏଠାରେ ଯେତେବେଳେ ଡାକ୍ତରଙ୍କ ନଥାନ୍ତି, ନର୍ସଙ୍କ ଦବଙ୍ଗଗିରି ଚାଲେ। ଏପରି ଅଭିଯୋଗ ସମ୍ପର୍କରେ ପଚରାଯିବାରେ ସିଡିଏମ୍‌ଓ କହିଛନ୍ତି, “ଅଭିଯୋଗ ଆସିଛି। ଏହାର ତଦନ୍ତ କରାଯିବ।”

ବଲାଙ୍ଗିର ଜିଲ୍ଲା ମୁଖ୍ୟ ଚିକିତ୍ସାଳୟ, ସରକାରୀ ମେଡିକାଲ କଲେଜ ହସପିଟାଲରେ ରୂପାନ୍ତରିତ ହୋଇଛି। ସ୍ତ୍ରୀ ଓ ପ୍ରସୂତି ବିଭାଗରେ ଏଠାରେ ୧୦ ଜଣ ଡାକ୍ତର ଅଛନ୍ତି। ହେଲେ ଗତକାଲି ପଦ୍ମାଙ୍କ ଚିକିତ୍ସା କରବାକୁ ଜଣେ ହେଲେ ଡାକ୍ତରଙ୍କୁ ଦେଖିବାକୁ ମିଳି ନଥିଲା।