ଭୁବନେଶ୍ୱର(ଓଡ଼ିଶା ରିପୋର୍ଟର): ହେଲମେଟ୍ ଚେକିଂଠାରୁ ଆରମ୍ଭ କରି ଗାଡ଼ିକାଗଜପତ୍ର। ତାସହିତ ଗାଡ଼ି ଡ୍ରାଇଭିଂ ବେଳେ ମଦ୍ୟପାନ ଚେକିଂ। ରାଜଧାନୀ ଠାରୁ ରାୟଗଡ଼ା। ଗଳିକନ୍ଦିରେ ଚଢ଼ାଉ। ଛକ ଛକରେ ଛାନଭିନ୍। ନୂଆ ମୋଟରଯାନ ଆଇନ୍ ଆସିବା ପରେ ଏମିତି ସାରାରାଜ୍ୟରେ ଏକପ୍ରକାର ଆତଙ୍କ ଖେଳାଇ ଦେଇଥିଲା। ହେଲେ ଏବେ ଟ୍ରାଫିକ୍ କୋକୁଆ ଭୟ ନୁହେଁ ବରଂ ସଭିଙ୍କୁ ଘାରିଛି କରୋନା ଭୟ। ଲୋକେ ଆଉ ଘରୁ ବାହାରୁ ନାହାନ୍ତି। ତେବେ ଏହି କରୋନା ମଦ୍ୟପଙ୍କୁ ଏକପ୍ରକାର ସୁହାଇଛି।
କାରଣ ଛୁଆଁଛୁଇଁ ଉପରେ କଟକଣା ଥିବାରୁ ବ୍ରେଥ୍ ଆନାଲାଇଜର୍ ଟେଷ୍ଟ ଉପରେ ରୋକ ଲଗାଯାଇଛି। ଆଗରୁ ମଦ୍ୟପଙ୍କୁ ଧରୁଥିଲା ମେସିନ। ହେଲେ ଏବେ ସେଇ ମେସିନ୍କୁ ଫୁଙ୍କିବେନି ମଦ୍ୟପ। ବ୍ରେଥ୍ ଆନାଲାଇଜର୍ ଟେଷ୍ଟ ବନ୍ଦ ପାଇଁ ପୋଲିସ ଡିଜି ଅଭୟ ନିର୍ଦ୍ଦେଶ ଦେଇଛନ୍ତି।। ଏନେଇ ସବୁ ଏସ୍ପି ଏବଂ ଡିସିପିମାନଙ୍କୁ ନିର୍ଦ୍ଦେଶ ଦିଆଯାଇଛି। କରୋନା ସଂକ୍ରମଣ ରୋକିବା ପାଇଁ ଏମିତି ପଦକ୍ଷେପ ନିଆଯାଇଛି।